1 ⴷⴻⴳ ⵓⵢⵓⵔ ⵡⵉⵙⵙ ⵜⴻⵏⵄⴰⵛ, ⵡⴻⵏⵏⵉ ⴷ ⴰⵢⵓⵔ ⵏ ⴰⴷⴰⵔ, ⴷⴻⴳ ⵡⴰⵙⵙ ⵡⵉⵙⵙ ⵜⵍⴻⵟⵟⴰⵛ ⵥⴻⴳ ⵓⵢⵓⵔ ⵏⵏⵉ, ⵓⵎⵉ ⴷⴷ-ⵜⵉⵡⴻⴹ ⵍⵡⴻⵇⵜ ⵉ ⴷⵉ ⵜⵓⵖⴰ ⴰⴷ ⴳⴳⴻⵏ ⴰⵡⴰⵍ ⵏ ⵓⵊⴻⴵⵉⴷ ⴷ ⵓⵥⴻⵔⴼ ⵏⵏⴻⵙ, ⴷⴻⴳ ⵡⴰⵙⵙ ⵉ ⴷⵉ ⵜⵓⵖⴰ ⵜⵜⵔⴰⵊⴰⵏ ⵍⵄⴻⴷⵢⴰⵏ ⵏ ⵡⵓⴷⴰⵢⴻⵏ ⴰⴷ ⵅⴰⵙⴻⵏ ⵎⵎⴻⵏⴹⴰⵔⴻⵏ, ⵜⵓⵖⴰ ⵍⵃⴰⵍ ⵙ ⵍⵄⴻⴽⵙ, ⵎⴰⵖⴰⵔ ⵓⴷⴰⵢⴻⵏ ⵎⵎⴻⵏⴹⴰⵔⴻⵏ ⵅ ⵢⴻⵏⵏⵉ ⵜⴻⵏ ⵉⵛⴰⵔⵀⴻⵏ. 2 ⵙⵙⵎⵓⵏⴻⵏ ⵓⴷⴰⵢⴻⵏ ⴷⵉ ⵜⵏⴻⴷⴷⴰⵎ ⵏⵙⴻⵏ ⴷⵉ ⵎⴰⵔⵔⴰ ⵍⵄⴰⵎⴰⵍⴰⵜ ⵏ ⵓⵊⴻⴵⵉⴷ ⴰⵃⴰⵛⵡⵉⵔⵓⵛ, ⵎⴰⵃⴻⵏⴷ ⴰⴷ ⵡⵜⴻⵏ ⵉⵏⵏⵉ ⵜⵓⵖⴰ ⵉⵜⵜⴻⵅⵙⴻⵏ ⴰⴷ ⴷⴰⵢⵙⴻⵏ ⴳⴳⴻⵏ ⵍⵖⴰⵔ ⵓⵛⴰ ⵓⵍⴰ ⴷ ⵉⵊⵊ ⵎⴰ ⵉⵥⴻⵎⵎⴰⵔ ⴰⴷ ⵉⵇⵇⵉⵎ ⵉⴱⴻⴷⴷ ⵥⵥⴰⵜⵙⴻⵏ, ⵎⵉⵏⵥⵉ ⵎⴰⵔⵔⴰ ⵍⴻⴳⵏⵓⵙ ⵜⵓⵖⴰ ⴼⴻⵛⵍⴻⵏ ⵙ ⵜⵉⴳⴳⵯⵓⴷⵉ ⵥⴻⴳ ⵡⵓⴷⴰⵢⴻⵏ. 3 ⵎⴰⵔⵔⴰ ⵍⵃⵓⴽⴽⴰⵎ ⵏ ⵍⵄⴰⵎⴰⵍⴰⵜ ⴷ ⵉⵊⴻⴵⵉⴷⴻⵏ ⵉ ⵉⴵⴰⵏ ⵙⴰⴷⵓ ⵓⵊⴻⴵⵉⴷ ⴷ ⵍⵡⵓⵍⴰⵜ ⴷ ⵉⵎⵙⴻⵅⵅⴰⵔⴻⵏ ⵏ ⵓⵊⴻⴵⵉⴷ ⵡⵛⵉⵏ ⴰⴼⵓⵙ ⵉ ⵡⵓⴷⴰⵢⴻⵏ, ⵎⵉⵏⵥⵉ ⵜⵉⴳⴳⵯⵓⴷⵉ ⵏ ⵎⵓⵔⴷⴰⵅⴰⵢ ⵜⴻⵡⴹⴰ ⵅⴰⵙⴻⵏ, 4 ⵎⵉⵏⵥⵉ ⵎⵓⵔⴷⴰⵅⴰⵢ ⵜⵓⵖⴰ ⵖⴰⵔⴻⵙ ⵛⵛⴰⵏ ⴷⵉ ⵜⴰⴷⴷⴰⵔⵜ ⵏ ⵓⵊⴻⴵⵉⴷ ⵓⵛⴰ ⵍⴻⵅⴱⴰⵔ ⵏⵏⴻⵙ ⵉⴼⴼⴻⵖ ⵖⴰⵔ ⵎⴰⵔⵔⴰ ⵍⵄⴰⵎⴰⵍⴰⵜ, ⵎⵉⵏⵥⵉ ⴰⵔⵢⴰⵥ ⵎⵓⵔⴷⴰⵅⴰⵢ ⵜⵓⵖⴰ ⵛⵛⴰⵏ ⵏⵏⴻⵙ ⵉⴳⴳⵓⵔ ⵢⴰⵔⴻⵏⵏⵉ ⵄⴰⴷ. 5 ⵖⴻⵍⴱⴻⵏ ⵡⵓⴷⴰⵢⴻⵏ ⵎⴰⵔⵔⴰ ⵍⵄⴻⴷⵢⴰⵏ ⵏⵙⴻⵏ ⴰⵎ ⵜⴻⵏ ⵛⵛⴰⵜⴻⵏ ⵙ ⵙⵙⵉⴼ, ⵙ ⵡⴻⵏⵖⴰⵢ ⴷ ⵓⵀⴻⵍⵍⴻⴽ. ⴳⴳⵉⵏ ⴰⴽ-ⴷ ⵍⵄⴻⴷⵢⴰⵏ ⵏⵙⴻⵏ ⵎⴰⵎⵎⴻⵛ ⵅⵙⴻⵏ. 6 ⴷⵉ ⵍⵇⴻⵍⵄⴰ ⵏ ⵛⵓⵛⴰⵏ ⵏⵖⵉⵏ ⵓ ⵀⴻⵍⵍⴽⴻⵏ ⵓⴷⴰⵢⴻⵏ ⵅⴻⵎⵙⴰ-ⵎⵢⴰ ⵏ ⵢⴻⵔⵢⴰⵥⴻⵏ. 7 ⵓⵍⴰ ⴷ ⴼⴰⵔⵛⴰⵏⴷⴰⵜⴰ ⴷ ⴷⴰⵍⴼⵓⵏ ⴷ ⴰⵛⴼⴰⵜ 8 ⴷ ⴼⵓⵔⴰⵜⴰ ⴷ ⴰⴷⴰⵍⵢⴰ ⴷ ⴰⵔⵉⴷⴰⵜⴰ 9 ⴷ ⴼⴰⵔⵎⴰⵛⵜⴰ ⴷ ⴰⵔⵉⵙⴰⵢ ⴷ ⴰⵔⵉⴷⴰⵢ ⴷ ⵡⴰⵢⵥⴰⵜⴰ,

10 ⵄⴻⵛⵔⴰ ⵏ ⵉⵃⴻⵏⵊⵉⵔⴻⵏ ⵏ ⵀⴰⵎⴰⵏ, ⵎⵎⵉⵙ ⵏ ⵀⴰⵎⴰⴷⴰⵜ, ⵍⴻⵄⴷⵓ ⵏ ⵡⵓⴷⴰⵢⴻⵏ, ⵏⵖⵉⵏ ⵜⴻⵏ, ⵎⴰⵛⴰ ⵡⴰⵔ ⵙⵙⵡⵉⵥⵥⴹⴻⵏ ⵛⴰ ⵉⴼⴰⵙⵙⴻⵏ ⵏⵙⴻⵏ ⵖⴰⵔ ⵜⴽⴻⵛⵛⴰⴹⵜ.

11 ⴷⴻⴳ ⵡⴰⵙⵙ ⵏⵏⵉ ⴷ ⵉⵊⵊ ⵉⵡⵢⴻⵏ-ⴷⴷ ⵇⴻⴷⴷⴰ ⵏ ⵉⵎⴻⵜⵜⴰⵏ ⵥⵥⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ ⴷⵉ ⵍⵇⴻⵍⵄⴰ ⵏ ⵛⵓⵛⴰⵏ.

12 ⵉⵏⵏⴰ ⵓⵊⴻⴵⵉⴷ ⵉ ⵜⵊⴻⴵⵉⴷⵜ ⵉⵙⵜⵉⵔ: “ⴷⵉ ⵍⵇⴻⵍⵄⴰ ⵏ ⵛⵓⵛⴰⵏ ⵓⴷⴰⵢⴻⵏ ⵏⵖⵉⵏ ⵓ ⵀⴻⵍⵍⴽⴻⵏ ⵅⴻⵎⵙⴰ-ⵎⵢⴰ ⵏ ⵢⴻⵔⵢⴰⵥⴻⵏ ⵓⵍⴰ ⴷ ⵄⴻⵛⵔⴰ ⵏ ⵉⵃⴻⵏⵊⵉⵔⴻⵏ ⵏ ⵀⴰⵎⴰⵏ. ⵎⵉⵏ ⵉ ⵖⴰ ⵢⵉⵍⵉ ⴳⴳⵉⵏ ⵄⴰⴷ ⴷⵉ ⵍⵄⴰⵎⴰⵍⴰⵜ ⵏⵏⴻⵖⵏⵉ ⵏ ⵓⵊⴻⴵⵉⴷ!!? ⵎⵉⵏ ⴷⵉⵏ ⵄⴰⴷ ⵖⴰⵔⴻⵎ ⴷ ⴰⵙⵉⵜⴻⵎ? ⴰⴷ ⴰⵎ ⵉⵎⵎⴻⵡⵛ! ⵎⵉⵏ ⵜⴻⵙⵙⵉⵜⵉⵎⴻⴷ? ⴰⴷ ⵖⴰⵔⴻⵎ ⵢⵉⵍⵉ!”

13 ⵅⴻⵏⵏⵉ ⵜⴻⵏⵏⴰ ⵉⵙⵜⵉⵔ: “ⵎⴰⵍⴰ ⵎⵍⵉⵃ ⵉ ⵓⵊⴻⴵⵉⴷ, ⴻⵊⵊ ⴰⴷ ⵉⵎⵎⴻⵡⵛ ⵜⵜⴻⵙⵔⵉⵃ ⵉ ⵡⵓⴷⴰⵢⴻⵏ ⵉ ⵉⴵⴰⵏ ⴷⵉ ⵛⵓⵛⴰⵏ ⵓⵍⴰ ⴷ ⵜⵉⵡⴻⵛⵛⴰ ⵎⴰⵃⴻⵏⴷ ⴰⴷ ⴳⴳⴻⵏ ⵄⵍⴰⵃⵙⴰⴱ ⴰⵥⴻⵔⴼ ⵏ ⵡⴰⵙⵙ-ⴰ ⵓⵛⴰ ⴻⵊⵊ ⴰⴷ ⴰⵢⵍⴻⵏ ⵄⴻⵛⵔⴰ ⵏ ⵉⵃⴻⵏⵊⵉⵔⴻⵏ ⵏ ⵀⴰⵎⴰⵏ ⵖⴰⵔ ⵜⴻⵃⵏⴰⵛⵜ.”

14 ⵅⴻⵏⵏⵉ ⵉⵏⵏⴰ ⵓⵊⴻⴵⵉⴷ, ⴰⴷ ⴳⴳⴻⵏ ⴰⵎⵎⵓ. ⵍⴻⵅⴷⴻⵏⵏⵉ ⵉⵜⵜⵡⴰⵙⵙⵓⴼⴼⴻⵖ-ⴷⴷ ⵉⵊⵊ ⵏ ⵓⵥⴻⵔⴼ ⴷⵉ ⵛⵓⵛⴰⵏ ⵓⵛⴰ ⵓⵢⵍⴻⵏ ⵄⴻⵛⵔⴰ ⵏ ⵉⵃⴻⵏⵊⵉⵔⴻⵏ ⵏ ⵀⴰⵎⴰⵏ.

15 ⵓⴷⴰⵢⴻⵏ ⵏⵏⵉ ⵉⴵⴰⵏ ⴷⵉ ⵛⵓⵛⴰⵏ, ⵎⵓⵏⴻⵏ ⵄⴰⵡⴻⴷ ⴷⴻⴳ ⵡⴰⵙⵙ ⵡⵉⵙⵙ ⴰⵔⴱⴻⵄⵟⴰⵛ ⵏ ⵓⵢⵓⵔ ⵏ ⴰⴷⴰⵔ ⵓⵛⴰ ⵏⵖⵉⵏ ⵜⴻⵍⵜ-ⵎⵢⴰⵜ ⵏ ⵢⴻⵔⵢⴰⵥⴻⵏ, ⵎⴰⵛⴰ ⵡⴰⵔ ⵙⵙⵡⵉⵥⵥⴹⴻⵏ ⵛⴰ ⵉⴼⴰⵙⵙⴻⵏ ⵏⵙⴻⵏ ⵖⴰⵔ ⵜⴽⴻⵛⵛⴰⴹⵜ.

16 ⵎⵓⵏⴻⵏ ⵄⴰⵡⴻⴷ ⵡⵓⴷⴰⵢⴻⵏ ⵏⵏⴻⵖⵏⵉ ⴷⵉ ⵍⵄⴰⵎⴰⵍⴰⵜ ⵏ ⵓⵊⴻⴵⵉⴷ ⵃⵉⵎⴰ ⴰⴷ ⴽⴽⴰⵔⴻⵏ ⴷⵉ ⵟⵟⵡⴻⵄ ⵏ ⵜⵓⴷⴰⵔⵜ ⵏⵙⴻⵏ ⵓ ⵃⵉⵎⴰ ⴰⴷ ⵟⵟⴼⴻⵏ ⵍⴻⵀⵏⴰ ⵥⵉ ⵖⴰⵔ ⵍⵄⴻⴷⵢⴰⵏ ⵏⵙⴻⵏ. ⵏⵖⵉⵏ ⵅⴻⵎⵙⴰ ⵓ-ⵙⴻⴱⵄⵉⵏ-ⴰⵍⴻⴼ ⵏ ⵢⴻⵔⵢⴰⵥⴻⵏ ⵊⴰⵔ ⵉⵏⵏⵉ ⵜⴻⵏ ⵉⵛⴰⵔⵔⵀⴻⵏ, ⵎⴰⵛⴰ ⵡⴰⵔ ⵙⵙⵡⵉⵥⵥⴹⴻⵏ ⵛⴰ ⵉⴼⴰⵙⵙⴻⵏ ⵏⵙⴻⵏ ⵖⴰⵔ ⵜⴽⴻⵛⵛⴰⴹⵜ.

17 ⵎⴰⵏ ⴰⵢⴰ ⵉⵎⵙⴰⵔ ⴷⴻⴳ ⵡⴰⵙⵙ ⵡⵉⵙⵙ ⵜⵍⴻⵟⵟⴰⵛ ⵏ ⵓⵢⵓⵔ ⵏ ⴰⴷⴰⵔ ⵓ ⴷⴻⴳ ⵡⴰⵙⵙ ⵡⵉⵙⵙ ⴰⵔⴱⴻⵄⵟⴰⵛ ⵥⵥⴰⵢⴻⵙ ⴰⵔⴻⵢⵢⵃⴻⵏ ⵓⵛⴰ ⴳⴳⵉⵏ ⵜ ⴷ ⵉⵊⵊ ⵏ ⵡⴰⵙⵙ ⵏ ⵥⵥⴰⵔⴷⴻⵜ ⴷ ⵍⴻⴼⵔⴰⵃⴻⵜ.

18 ⵓⴷⴰⵢⴻⵏ ⵏⵏⵉ ⵉⴵⴰⵏ ⴷⵉ ⵛⵓⵛⴰⵏ, ⵎⵓⵏⴻⵏ ⴷⴻⴳ ⵡⴰⵙⵙ ⵡⵉⵙⵙ ⵜⵍⴻⵟⵟⴰⵛ ⵏ ⵓⵢⵓⵔ ⵓⵍⴰ ⴷⴻⴳ ⵡⴰⵙⵙ ⵡⵉⵙⵙ ⴰⵔⴱⴻⵄⵟⴰⵛ ⵓⵛⴰ ⵏⵉⵜⵏⵉ ⴰⵔⴻⵢⵢⵃⴻⵏ ⴷⴻⴳ ⵡⴰⵙⵙ ⵡⵉⵙⵙ ⵅⴻⵎⵎⴻⵙⵟⴰⵛ ⵓⵛⴰ ⴳⴳⵉⵏ ⵜ ⴷ ⵉⵊⵊ ⵏ ⵡⴰⵙⵙ ⵏ ⵥⵥⴰⵔⴷⴻⵜ ⴷ ⵍⴻⴼⵔⴰⵃⴻⵜ.

19 ⵙ ⵓⵢⴻⵏⵏⵉ ⵓⴷⴰⵢⴻⵏ, ⵉⵏⵏⵉ ⵉⴵⴰⵏ ⴷⵉ ⵍⴽⴰⵎⴱⵓ, ⵉⵏⵏⵉ ⵉⵥⴻⴷⴷⵖⴻⵏ ⴷⵉ ⵜⵏⴻⴷⴷⴰⵎ ⴷⵉ ⵍⴽⴰⵎⴱⵓ, ⴳⴳⵉⵏ ⴰⵙⵙ ⵡⵉⵙⵙ ⴰⵔⴱⴻⵄⵟⴰⵛ ⵏ ⵓⵢⵓⵔ ⵏ ⴰⴷⴰⵔ ⴷ ⵉⵊⵊ ⵏ ⵍⵄⵉⴷ ⵏ ⵍⴻⴼⵔⴰⵃⴻⵜ ⴷ ⵥⵥⴰⵔⴷⴻⵜ ⵓ ⴷ ⵉⵊⵊ ⵏ ⵡⴰⵙⵙ ⴷ ⴰⵚⴻⴱⵃⴰⵏ, ⴰⵙⵙ ⵉ ⴷⵉ ⵙⵙⴻⴽⴽⴰⵏ ⴰⵔⵔⵉⵖⴰⵍⵓⵜ ⵉⵊⵊ ⵉ ⵡⴻⵏⵏⴻⵖⵏⵉ. 20 ⵉⵥⴻⵎⵎ ⵎⵓⵔⴷⴰⵅⴰⵢ ⵉⵎⴻⵥⵔⵓⵢⴻⵏ-ⴰ ⵓⵛⴰ ⵉⵙⵙⴻⴽⴽ ⵜⵉⴱⵔⴰⵜⵉⵏ ⵉ ⵎⴰⵔⵔⴰ ⵓⴷⴰⵢⴻⵏ ⵏⵏⵉ ⵉⴵⴰⵏ ⴷⵉ ⵎⴰⵔⵔⴰ ⵍⵄⴰⵎⴰⵍⴰⵜ ⵏ ⵓⵊⴻⴵⵉⴷ ⴰⵃⴰⵛⵡⵉⵔⵓⵛ, ⵉ ⵢⴻⵏⵏⵉ ⵉⴵⴰⵏ ⵢⵓⴷⵙⴻⵏ ⴷ ⵉⵏⵏⵉ ⵉⴵⴰⵏ ⵉⴳⴳⵯⴻⵊⴻⵏ, 21 ⵎⴰⵃⴻⵏⴷ ⴰⴷ ⵜⴻⵏ ⴰⵔⵔⴻⵏ ⴰⴷ ⵃⴹⴰⵏ ⴰⵙⵙ ⵡⵉⵙⵙ ⴰⵔⴱⴻⵄⵟⴰⵛ ⵏ ⵓⵢⵓⵔ ⵏ ⴰⴷⴰⵔ ⵓⵍⴰ ⴷ ⵡⴰⵙⵙ ⵡⵉⵙⵙ ⵅⴻⵎⵎⴻⵙⵟⴰⵛ ⵥⵥⴰⵢⴻⵙ ⵥⴻⴳ ⵓⵙⴻⴳⴳⵯⴰⵙ ⴰⵍ ⴰⵙⴻⴳⴳⵯⴰⵙ ⵏⵏⴻⵖⵏⵉ, 22 - ⵄⵍⴰⵃⵙⴰⴱ ⵓⵙⵙⴰⵏ ⵉ ⴷⵉ ⵟⵟⴼⴻⵏ ⵓⴷⴰⵢⴻⵏ ⴰⵔⵔⴰⵃⴻⵜ ⵥⵉ ⵍⵄⴻⴷⵢⴰⵏ ⵏⵙⴻⵏ, ⵓ ⵄⵍⴰⵃⵙⴰⴱ ⴰⵢⵓⵔ ⵏⵏⵉ ⵜⵓⵖⴰ ⵉ ⴷ ⴰⵙⴻⵏ ⵉⴱⴻⴷⴷⵍⴻⵏ ⵥⵉ ⵍⴻⵃⵥⴻⵏ ⵖⴰⵔ ⵔⴻⴼⵔⴰⵃⴻⵜ ⵓ ⵥⴻⴳ ⵡⴻⵛⴹⴰⵏ ⵖⴰⵔ ⵡⴰⵙⵙ ⴰⵚⴻⴱⵃⴰⵏ - , ⵃⵉⵎⴰ ⴰⴷ ⵜⴻⵏ ⴰⵔⵔⴻⵏ ⴷ ⵓⵙⵙⴰⵏ ⵏ ⵥⵥⴰⵔⴷⴻⵜ ⴷ ⵍⴻⴼⵔⴰⵃⴻⵜ ⵓ ⵃⵉⵎⴰ ⴽⵓⵍ ⵉⵊⵊ ⴰⴷ ⵉⵙⵙⴻⴽⴽ ⴰⵖⵉⵔⴰⵍⵓⵜ ⵉ ⵡⴻⵏⵏⴻⵖⵏⵉ ⵓ ⵃⵉⵎⴰ ⴰⴷ ⵡⵛⴻⵏ ⵉ ⵉⵎⴻⵥⵍⴰⴹ. 23 ⵇⴻⴱⵍⴻⵏ ⵡⵓⴷⴰⵢⴻⵏ ⵎⵉⵏ ⴱⴷⴰⵏ ⴰⴷ ⴹⴼⴰⵔⴻⵏ ⵄⴰⴷ ⵓ ⵎⵉⵏ ⴷ ⴰⵙⴻⵏ ⵢⵓⵔⴰⵏ ⵙ ⵓⴼⵓⵙ ⵏ ⵎⵓⵔⴷⴰⵅⴰⵢ, 24 ⵎⵉⵏⵥⵉ ⵀⴰⵎⴰⵏ, ⵎⵎⵉⵙ ⵏ ⵀⴰⵎⴰⴷⴰⵜⴰ, ⴰⵊⴰⵊⵉ, ⵍⴻⵄⴷⵓ ⵏ ⵎⴰⵔⵔⴰ ⵓⴷⴰⵢⴻⵏ, ⵜⵓⵖⴰ ⵉⵜⵜⵅⴰⵔⵔⴻⵚ ⵉⵛⵜ ⵏ ⵜⴻⵅⵛⴻⴼⵜ ⴹⵉⴷⴷ ⵉ ⵡⵓⴷⴰⵢⴻⵏ ⵎⴰⵃⴻⵏⴷ ⴰⴷ ⵜⴻⵏ ⵉⵀⴻⵍⵍⴻⴽ, ⵓ ⵏⴻⵜⵜⴰ ⵜⵓⵖⴰ ⵉⵏⴹⴰⵔ ⴱⵓⵔ, ⴰⵇⴰ-ⵜ ⴷ ⵜⴰⵇⴻⴷⴷⵓⵃⵜ, ⵃⵉⵎⴰ ⴰⴷ ⵜⴻⵏ ⵢⴰⵔⴻⴷⴷⴻⴵ ⵓ ⴰⴷ ⵜⴻⵏ ⵉⵀⴻⵍⵍⴻⴽ, 25 ⵎⴰⵛⴰ ⵓⵎⵉ ⴷⴷ-ⵜⵓⵙⴰ ⵉⵙⵜⵉⵔ ⵥⵥⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ, ⵢⵓⵎⵓⵔ ⵏⴻⵜⵜⴰ ⵙ ⵜⵉⵔⴰ ⵎⴰⵃⴻⵏⴷ ⴰⴷ ⵢⴰⵔⵔ ⵅ ⵓⵥⴻⴵⵉⴼ ⵏⵏⴻⵙ ⵜⴰⵅⵛⴻⴼⵜ-ⴰ ⵜⴰⵄⴻⴼⴼⴰⵏⵜ, ⵜⴻⵏⵏⵉ ⵜⵓⵖⴰ ⵉⵅⴰⵔⵔⴻⵚ ⴹⵉⴷⴷ ⵉ ⵡⵓⴷⴰⵢⴻⵏ, ⵓⵛⴰ ⵓⵢⵍⴻⵏ ⵜ ⴷ ⵉⵃⴻⵏⵊⵉⵔⴻⵏ ⵏⵏⴻⵙ ⵖⴰⵔ ⵜⴻⵃⵏⴰⵛⵜ. ^■   26 ⵅ ⵓⵢⴰ ⵍⴰⵖⴰⵏ ⵓⵙⵙⴰⵏ-ⴰ ‘ⴱⵓⵔⵉⵎ’, ⵥⴻⴳ ⵉⵙⴻⵎ ⵏ ‘ⴱⵓⵔ’. ⵙ ⵓⵢⴰ, ⵥⵉ ⵙⵙⵉⴱⴱⴻⵜ ⵏ ⵡⴰⵡⴰⵍⴻⵏ ⵏ ⵜⴻⴱⵔⴰⵜ-ⴰ ⵓ ⵥⵉ ⵙⵙⵉⴱⴱⴻⵜ ⵏ ⵎⵉⵏ ⵥⵔⵉⵏ ⵙ ⵢⵉⵅⴻⴼ ⵏⵙⴻⵏ ⵥⵉ ⵎⴰⵏ ⴰⵢⴰ ⵓ ⵥⵉ ⵙⵙⵉⴱⴱⴻⵜ ⵏ ⵎⵉⵏ ⴷ ⴰⵙ ⵉⵎⵙⴰⵔⴻⵏ, 27 ⴽⴽⴰⵔⴻⵏ ⴰⴷ ⵃⴹⴰⵏ ⵓⵙⵙⴰⵏ-ⴰ ⵓⵛⴰ ⵇⴻⴱⵍⴻⵏ ⵡⵓⴷⴰⵢⴻⵏ ⵉ ⵢⵉⵅⴻⴼ ⵏⵙⴻⵏ ⵓ ⵉ ⵥⵥⴰⵔⵉⵄⴻⵜ ⵏⵙⴻⵏ ⵓ ⵉ ⵎⴰⵔⵔⴰ ⵉⵏⵏⵉ ⵖⴰⵔⵙⴻⵏ ⴷⴷ-ⵉⵇⵇⵏⴻⵏ, ⵎⴰⵃⴻⵏⴷ ⵡⴰⵔ ⵙⵙⵄⴻⴷⴷⵓⵏ ⵛⴰ ⴰⴷ ⵃⴹⴰⵏ ⵜⵏⴰⵢⴻⵏ ⵏ ⵡⵓⵙⵙⴰⵏ-ⴰ ⴰⵎ ⵎⴰⵎⵎⴻⵛ ⵅⴰⵙⴻⵏ ⵉⵜⵜⵡⴰⵔⵉ ⵓ ⵄⵍⴰⵃⵙⴰⴱ ⵍⵡⴻⵇⵜ ⵉ ⵖⴰⵔⵙⴻⵏ ⵉⵜⵜⵡⴰⴳⴳⴻⵏ ⵉ ⴽⵓⵍ ⴰⵙⴻⴳⴳⵯⴰⵙ ^□   28 ⵓⵛⴰ ⴰⴷ ⵉⴷⴰⵔⴻⵏ ⵓ ⴰⴷ ⵃⴹⴰⵏ ⵓⵙⵙⴰⵏ-ⴰ ⴷⵉ ⴽⵓⵍ ⵊⵊⵉⵍ, ⴷⵉ ⴽⵓⵍ ⵍⴰⴵ, ⴷⵉ ⴽⵓⵍ ⵍⵄⴰⵎⴰⵍⴰ ⵓ ⴷⵉ ⴽⵓⵍ ⵜⴰⵏⴷⵉⵏⵜ ⵓ ⵡⴰⵔ ⵙⵙⵄⴻⴷⴷⵓⵏ ⵛⴰ ⵓⵙⵙⴰⵏ-ⴰ ⵏ ⴱⵓⵔⵉⵎ ⵊⴰⵔ ⵡⵓⴷⴰⵢⴻⵏ ⵓ ⵡⴰⵔ ⵉⵜⵜᵉⵜⵜⵡⴰⴳⴳ ⵓⵏⴻⴳⴳⴰⵔ ⵖⴰⵔ ⵍⵉⴷⴰⵔⴻⵜ ⵏⵙⴻⵏ ⵙ ⵥⵥⴰⵔⵉⵄⴻⵜ ⵏⵙⴻⵏ. 29 ⵜⵓⵔⴰ ⵜⵊⴻⴵⵉⴷⵜ ⵉⵙⵜⵉⵔ, ⵢⴻⴵⵉⵙ ⵏ ⴰⴱⵉⵃⴰⵢⵉⵍ, ⵊⵎⵉⵄ ⴰⴽ-ⴷ ⵡⵓⴷⴰⵢ ⵎⵓⵔⴷⴰⵅⴰⵢ, ⵙ ⵎⴰⵔⵔⴰ ⵜⵉⵥⴻⵎⵎⴰⵔ, ⵃⵉⵎⴰ ⴰⴷ ⵜⴻⵙⵙⵛⴻⵏ ⵉ ⵜⵡⴰⵍⴰ ⵏⵏⴻⵖⵏⵉⵜ ⵜⴰⴱⵔⴰⵜ-ⴰ ⵅ ⵜⵎⴻⵙⵍⴰⵛⵜ ⵏ ⴱⵓⵔⵉⵎ. 30 ⵉⵙⵙⴻⴽⴽ ⵜⵉⴱⵔⴰⵜⵉⵏ ⵉ ⵎⴰⵔⵔⴰ ⵓⴷⴰⵢⴻⵏ ⴷⵉ ⵎⵢⴰ ⵓ-ⵙⴻⴱⵄⴰ ⵓ-ⵄⵉⵛⵔⵉⵏ ⵏ ⵍⵄⴰⵎⴰⵍⴰⵜ ⵏ ⵜⴳⴻⵍⴷⵉⵜ ⵏ ⴰⵃⴰⵛⵡⵉⵔⵓⵛ, ⵊⵎⵉⵄ ⴰⴽ-ⴷ ⵡⴰⵡⴰⵍⴻⵏ ⵏ ⵍⴻⵀⵏⴰ ⴷ ⵍⴰⵎⴰⵏ, 31 ⵃⵉⵎⴰ ⴰⴷ ⵏⴻⵢⵢⵛⴻⵏ ⵓⵙⵙⴰⵏ-ⴰ ⵏ ⴱⵓⵔⵉⵎ ⴷⵉ ⵍⵡⴻⵇⵜ ⵏⵙⴻⵏ ⵉⵜⵜⵡⴰⴳⴳⴻⵏ, ⴰⵎ ⵎⴰⵎⵎⴻⵛ ⵉ ⴷ ⴰⵙⴻⵏ ⵢⵓⵎⵓⵔ ⵡⵓⴷⴰⵢ ⵎⵓⵔⴷⴰⵅⴰⵢ, ⵊⵎⵉⵄ ⴰⴽ-ⴷ ⵜⵊⴻⴵⵉⴷⵜ ⵉⵙⵜⵉⵔ, ⵓ ⴰⵎ ⵎⴰⵎⵎⴻⵛ ⴳⴳⵉⵏ ⵅ ⵢⵉⵅⴻⴼ ⵏⵙⴻⵏ ⵓ ⵅ ⵥⵥⴰⵔⵉⵄⴻⵜ ⵏⵙⴻⵏ ⵜⵉⵎⴻⵙⵍⴰⵢⵉⵏ ⴰⵎ ⵓⵥⵓⵎⵎⵉ ⴷ ⵓⵡⴻⵟⵟⵓ ⵏⵙⴻⵏ ⵏ ⵓⴳⴻⵊⴷⵓⵔ. 32 ⵎⵉⵏ ⵉⵜⵜⵡⴰⵏⵏⴰⵏ ⵥⵉ ⵉⵙⵜⵉⵔ ⵉⴳⴳⴰ ⴰⴷ ⴱⴻⴷⴷⴻⵏ ⵡⴰⵡⴰⵍⴻⵏ-ⴰ ⵅ ⵍⵄⵉⴷ ⵏ ⴱⵓⵔⵉⵎ ⵓⵛⴰ ⵜⵜⵡⴰⵔⵉⵏ ⴷⴻⴳ ⵉⵊⵊ ⵏ ⵡⴻⴷⵍⵉⵙ.