1 A imɛizzen inu, war ttiqqem ca di marra arruḥ, maca qeǧbem arruḥat, ma zi AREBBI i iǧan, minzi aṭṭas n inabiyyen issxarriqen aqa ffɣen-dd ɣar ddunect. ^■   2 S man aya ad tessnem Arruḥ n AREBBI: marra arruḥ wenni icehhden belli Yeccu Lmasiḥ yusa-dd di arrimet, aqa netta zi AREBBI. 3 Marra arruḥ wenni war icehhden belli Yeccu yusa-dd di arrimet, war iǧi ca zi AREBBI, maca zi arruḥ n lmasiḥ afalsu wenni i xef tesřam ad dd-yas, aqa netta da řexxu di ddunect. ^□  ■   4 Minzi aqa kenniw d tarwa n AREBBI, aqa tɣellbem xasen, minzi d Wenni iǧan daywem d ameqqran x wenni iǧan di ddunect. 5 Nitni zi ddunect, s uyenni ssawařen zi ddunect uca ddunect tᵉttesřa asen-dd. 6 Aqa-neɣ zi AREBBI. Wenni issnen AREBBI, ittesřa aneɣ. Wenni war iǧin zi AREBBI war d aneɣ ittesři ca. S man aya i ɣa nessen arruḥ n tidett d arruḥ n uweddar. ^■  

7 A imɛizzen inu, ejj aneɣ ad nexs ayawya, minzi Tayri zi AREBBI, u marra wenni ittexsen, d netta ittwaxeřq-dd zi AREBBI uca issen AREBBI. 8 Minzi AREBBI d Tayri, u wenni war ittexsen, war issin ca AREBBI. 9 Di man aya teḍhar aneɣ-dd Tayri n AREBBI, belli AREBBI aqa issekk-dd ayenni n Mmis i ɣares ɣar ddunect, ḥima ad zzayes neddar. ^■  

10 Di man aya i teǧa Tayri, war iǧi belli neccin nettexs AREBBI, maca belli Netta ittexs aneɣ uca issekk-dd Mmis d aṣřaḥ i ddnub nneɣ. ^■  

11 A imɛizzen inu, mařa tuɣa AREBBI ittexs aneɣ ammu, ittxeṣṣa aneɣ ɛawed ad nexs ijj wenneɣni.

12 Uřa d ijjen ma iẓra AREBBI, maca mařa nettexs ayawya, AREBBI ad dayneɣ iqqim, uca Tayri nnes aqa tedweř tekmeř dayneɣ. ^■  

13 Zi man aya nessen belli nettɣima dayes u Netta dayneɣ, minzi Netta iwca aneɣ zi Arruḥ nnes.

14 Aqa neẓra u ncehhed belli Tababat issekk-dd Tamemmit d Amsenjem n ddunect.

15 Marra wenni icehhden belli Yeccu d Mmis n AREBBI, AREBBI ad dayes izdeɣ u netta ad izdeɣ di AREBBI.

16 Aqa neccin numen u nessen Tayri tenni iǧan ɣar AREBBI i neccin. AREBBI d Tayri u wenni i ɣa iqqimen di Tayri, ad iqqim di AREBBI.

17 Di man aya tkemmeř Tayri dayneɣ, ḥima ad ɣarneɣ tiři ttiqqet deg wass n lḥisab, belli am mammec iǧa Netta, ad niři neccin ɛawed di ddunect.

18 Di Tayri war tᵉttiři tiggʷudi, maca Tayri nican tessuffuɣ tiggʷudi, minzi tiggʷudi tᵉttas-dd ak-d weqḍaɛ n řayas. Wenni itteggʷeden, war ittiři ikmeř di Tayri.

19 Neccin ad nexs AREBBI, minzi Netta tuɣa ittexs aneɣ d amezwaru. 20 Mařa ca n ijjen iqqar: “Necc ttexseɣ AREBBI!”, am icarreh umas, aqa netta d bu-ixarriqen. Minzi wenni war ittexsen umas wenni ittwařa, xenni mammec i ɣa yegg ad ixs AREBBI wenni war ittwiři. ^■   21 Aqa tawṣeyyet-a neṭṭef i-tt zzayes, belli wenni ittexsen AREBBI, ad ixs uřa d umas. ^■