1 Marra wenni yumnen belli Yeccu d Lmasiḥ, aqa netta ittwaxřeq-dd zi AREBBI, uca marra wenni ittexsen wenni t-i-dd yejjin, ad ixs ɛawed Wenni zzayes dd-ittwaxeřqen. ^■   2 Zi man aya nessen belli nettexs tarwa n AREBBI, xmi nettexs AREBBI u nettegg tiweṣṣa nnes. 3 Minzi ta d Tayri zi AREBBI, ad neḥḍa tiweṣṣa nnes, uca tiweṣṣa nnes war wɛarent ca. ^■   4 Marra min dd-ittwaxeřqen zi AREBBI ad iɣelleb x ddunect. D wa d aɣřab i iɣellben x ddunect, aqa-t d l’iman nneɣ! ^■   5 Man wen i ɣa iɣellben x ddunect, mɣir wenni yumnen belli Yeccu d Mmis n AREBBI! ^■  

6 D wa i dd-ikkin zeg waman d idammen, Yeccu Lmasiḥ. War dd-yekki zeg waman waha, maca zeg waman d idammen. 7 Arruḥ d wenni icehhden, minzi Arruḥ d tidett. 8 Uca aqa din třata n yinni icehhden: Arruḥ d waman d idammen, uca nitni s třata d ijjen.

9 Mařa neqbeř cchadet n iwdan, mecḥař d tameqqrant cchadet n AREBBI? Ta d cchadet n AREBBI tenni iched x Mmis.

10 Wenni yumnen di Mmis n AREBBI, ɣares cchadet-a deg ixef nnes. Wenni war yuminen ca di AREBBI, aqa igga i-t d bu-ixarriqen minzi netta war yumin ca di cchadet tenni iwca AREBBI x Mmis. ^■  

11 Uca ta d cchadet: AREBBI iwca aneɣ Tudart ittduman uca Tudart nni aqa-tt di Mmis. ^■  

12 Wenni ɣar iǧa Tamemmit, ɣares Tudart. Wenni war ɣar iǧi Mmis n AREBBI, war ɣares bu Tudart.

13 Uriɣ awem-dd man aya, ḥima ad tessnem belli ɣarwem Tudart ittduman uca ḥima ad tamnem deg Yisem n Mmis n AREBBI. ^■  

14 D ta d ttiqqet tenni ɣarneɣ dayes, aqa marra min zzayes nettar ɛlaḥsab min ixs Netta, Netta ad ɣarneɣ iseř. ^■  

15 Mařa nettwasseqneɛ nican aqa ad aneɣ iseř min ma d as nettar, xenni nettiqq belli aqa yusa-dd aneɣ min d as nettar.

16 Mařa ijjen iẓra umas ixḍa, ijj n uxeṭṭu war iǧi ca i řmewt, ejj i-t ad ittar di ṭṭweɛ nnes, uca ad as temmewc Tudart, i wenni war ixeṭṭin ca i řmewt. Aqa din axeṭṭu i řmewt, x wa war d awem qqareɣ ad ittar. ^■  

17 Marra tuɛeffna, aqa-t d ddenb, uca aqa din ddenb i war iǧin ca ař řmewt. ^■  

18 Nessen belli kuř ijjen wenni dd-ittwaxeřqen zi AREBBI, war ixeṭṭi ca, minzi wenni dd-ittwaxeřqen zi AREBBI ad iḥḍa ixef nnes u war t ittḥidi umɛeffan.^■  

19 Nessen, aqa aneɣ zi AREBBI uca ddunect marra aqa-tt deg ifassen n umɛeffan, 20 Nessen belli Mmis n AREBBI aqa yusa-dd uca iwca aneɣ-dd řefhamet ḥima ad nessen Wenni iǧan d tidett u ḥima ad niři deg wenni d tidett, di Mmis Yeccu Lmasiḥ. D wa d AREBBI s tidett d Tudart ittduman. ^■  

21 A iḥenjiren inu, ḥḍam ixef nwem zeg weɛbed n l’aṣnam!