1 Cimɛun Buṭrus, amsexxar d rrasul n Yeccu Lmasiḥ, i yenni issdaheǧen l’iman s tsegda n Siditneɣ d Umsenjem nneɣ Yeccu Lmasiḥ ɛlaḥsab ccan d ijjen akidneɣ. ^□   2 Řxaḍar d řehna ad xawem mmarenyen s tussna n Siditneɣ Yeccu Lmasiḥ, ^■  

3 am Wenni iwcin marra timesřayin tinni zi jjehd n Arebbi, maḥend ad iřint i Tudart u i tiggʷudi zi AREBBI s tussna n Wenni d aneɣ dd-iřaɣan ɣar uɛuǧi nnes d lɛaḍama nnes. 4 Aqa d Netta i d awem iwcin zzaysen lwuɛud iɣřan imɣaren aṭṭas, ḥima ad zzaysen tiřim d imecrac di ṭṭbiɛet n AREBBI, am tᵉttrakkʷaren zi nnecwat iɣeccen i yeǧan di ddunect. ^■  

5 S uyenni iřim tecḍarem uca arnim i l’iman nwem tcuni, u i tcuni nwem tussna, 6 uca i tussna ḍḍebṭ n nnefs, uca i ḍḍebṭ n nnefs ṣṣbar uca i ṣṣbar tiggʷudi zi AREBBI, 7 uca i tiggʷudi zi AREBBI tayri i wawmaten u i tayri i wawmaten tayri. 8 Mařa ttwafent daywem timesřayin-a uca ad daywem feyyḍent, war kenniw ttejjint texwam niɣ břa řɣiǧet di tussna n Siditneɣ Yeccu Lmasiḥ. ^■  

9 Minzi wenni war ɣar ǧint timesřayin-a, aqa iddarɣeř, minzi ittu asizdeg n ddnub nnes inni tuɣa ɣares zic. ^■  

10 S uyenni, a aytma, cḍarem ktar ḥima ad tḍemnem tařaɣit d usixḍar nwem s řexdayem tiṣebḥanin, minzi mařa teggem aya, xenni ɛemmarṣ ad tenqarḍem.

11 Minzi ammu i d awem ɣa immarni s waṭṭas wadaf icnan ɣar tgeldit ittduman n Siditneɣ Yeccu Lmasiḥ.

12 S uyenni war tejjiɣ ad kenniw ssɛeqřeɣ zi man aya řebda, waxxa kenniw tessnem u aqa kenniw tbeddem x dsas n tidett tanita.

13 Maca ittɣiř ayi nican, min ɣa kkeɣ ɛad di arrimet-a, ḥima ad kenniw ssfaqeɣ am ssɛeqřeɣ kenniw, ^■  

14 minzi ssneɣ, aqa takessit n arrimet inu ad dd-tas deɣya, am mammec d ayi issargeb Siditneɣ Yeccu Lmasiḥ. ^■  

15 Maca ad ggeɣ tizemmar ḥima ad tɛeqřem x tmesřayin-a awarni uffuɣ inu.

16 Minzi neccin war neḍfar ca tiḥuja isaysen, umi tuɣa d awem nettbarreḥ jjehd d twasit n Siditneɣ Yeccu Lmasiḥ, maca aqa neched s tiṭṭawin nneɣ x lɛaḍama nnes. ^■  

17 Minzi Netta aqa iṭṭef zi AREBBI Tababat ccan d uɛuǧi umi d as dd-tusa tmijja nni zeg uɛuǧi i dd-ittřiqen ak-d lɛaḍama nnes: “Wa d Mmi inu iɛizzen wenni dayes ufiɣ arḍa inu.” ^■  

18 Uřa d neccin nesřa tmijja aya zeg ujenna, umi tuɣa issawař akides, řami neǧa akides x wedrar iqeddsen.

19 Uřa d neccin ɣarneɣ awař d tidett n inabiyyen u kenniw ad teggem mliḥ mařa tewcim asen taynit am i yijj n řefnar yareqqen deg ijj n wemcan ibbubbes, ař ɣa idduqqez wass uca ad tenqar tfuct deg wuřawen nwem. ^■   20 Amezwar ittxeṣṣa kenniw ad tessnem aqa war din awař i zzayes nebban iwdan i ibedd weḥḥdes war iqqin ak-d Tira Iqeddsen. 21 Minzi nnubuwa war dd-tteffeɣ ɛemmarṣ zi min ixs bnadem, maca tusa-dd s yeryazen iqeddsen n AREBBI nni issiwřen am d asen dd-indeh Arruḥ Iqeddsen. ^■