1 Maca tuɣa din ɛawed jar řgens inabiyyen issxarriqen, am mammec i ɣa iřin uřa d imesɣaren n ẓur jar awem, ad ssidfen tibridin ittareddǧen u nkaren Sidi i ten isɣin, ad ssiwḍen ammu areyyeb deɣya x yixef nsen. ^■   2 Aṭṭas i ten ɣa iḍfaren di řeqjaḥet nsen, ař ɣa ittwaceqqef webrid n tidett zi ssibbet nsen. 3 S ṭṭmeɛ u s wawařen isaysen ad zzaywem stenfɛen, maca řḥukm xasen zeg wecḥař uya war ibḍiř ca uca ahellek nsen war ittnudum ca. ^■  

4 Minzi mařa AREBBI war issar x lmalakat i yeggin ddnub, maca inḍar i-ten di snaseř n taǧest di řaǧaɣ yuǧɣen, uca isellem i-ten ḥima ad din ttwaxemmřen ař řḥukm n uɛeddeb, ^■   5 u ɛawed war issar x ddunect n zic, maca tuɣa iḥḍa Nuḥ, ambarreḥ n tsegda wiss tmenya, řami dd-iḍřeq AREBBI řḥemřet x ddunect n lkuffar, ^■   6 u ɛawed řami issecmeḍ Netta tineddam n Sadum d Ɛamurra u iḥkem xasent s uneqřeb, aqa yarra i-ten marra d lmatal i lkuffar i ɣa yiřin ɛad. ^■  

7 Ɛawed issenjem Lut, amseggad, wenni tuɣa iweddben aṭṭas zi ticři ifuccḥen n yinni war ɣar teǧi ccariɛa. ^■   8 Minzi amseggad wanita, am tuɣa izeddeɣ jar asen, tuɣa ittɛeddab řeɛmar iseggden nnes zeg wass ař wass umi iẓra u isřa timegga nsen i war dd-yusin ak-d ccariɛa. ^■   9 Ammu i issen SIDI mammec i ɣa issuffeɣ inni t itteggʷeden zi řmeḥnet, maca Netta iḥeṭṭa inni war iseggden ḥima ad ttwaɛeddben deg wass n lḥisab, ^■  

10 mahu qaɛ inni iḍfaren arrimet tamednubt am ttmeẓẓren di min ixemjen, ttbarrḥen ḍidd n ṣṣulṭa n ijenwan. Aqa aten d imɛeffaren d imneffxen, war ttarjijen zzat min iɛuǧen am ttceqqafen.

11 Waxxa lmalakat ujarent ten di ṣṣulṭa d jjehd, war xasen ssiwiḍent řḥukm n SIDI di ssibbet n uceqqaf.

12 Nitni amecnaw imuddaren ignawen inni iḍeffaren ṭṭbiɛet, aqa ttwarwen-dd ḥima ad ttwaɣarṣen s řmus u ad ttwareddǧen, minzi ttceqqafen di min di war fehhmen. Ad ttwahellken kuřci di řɣecc nsen. ^□  ■  

13 Ina d inni iḥessben řmuɛṣiyyet d řmunet i řmuɛṣiyyet nsen. Ittɣiř asen d abarreɛ umi ḍeffaren ccehwat nsen s uziř, aqa nitni ccuren s ibeqqiḍen, tthillan deg wecmat nsen xmi ttnecṭen.

14 Tiṭṭawin nsen ccurent s zzina, aqa nitni war bedden ca maḥend ad xḍan, Nitni ɣekkwan řeɛmur n yinni war ibedden nican uca ɣarsen uř ittwarebban x ṭṭmeɛ, aqa nitni d tarwa n nneɛřet,

15 ffɣen zeg webrid iseggmen, weddaren, uca ḍfaren abrid wenni ikka Balɛam, mmis n Faɣur, wenni tuɣa ittexsen řmunet n řɣecc. ^■  

16 Maca netta iksi awebbex i řmuɛṣiyyet nnes, minzi zzayřet tagnawt tessiweř ɣares s ict n tmijja n iwdan, temneɛ tubbuheřya n unabi. ^■  

17 Nitni d řɛunṣarat war dayes bu waman, d iseynuten ttwaɛarrnen s tḥaryaḍt, aqa tubbarcent n taǧest tᵉttwasewjed asen. ^■  

18 Maɣar mařa ssiwřen s nnɛi n řḥarḍ nsen ixwan, aqa nitni ssɣekkʷan s nnecwat ixemjen n arrimet inni igguren ad arewřen zeg inni isellmen ixef nsen i uɣekkwi.

19 Waɛden ten s tiřelli, waxxa nitni simant nsen d imsexxaren n řɣecc. Minzi wi i zi ittwaɣelleb weryaz, aqa i netta ad yiři d amsexxar. ^■  

20 Maɣar awarni řami dd-arewřen nitni zi řexmej n ddunect s tussna n Siditneɣ d Amsenjem nneɣ, Yeccu Lmasiḥ, aqa dewřen-dd di texceft nnes ɛawed uca ttwaɣellben zzayes, aqa xenni aneggar nsen ad asen t yura mahu x umezwar. ^■   21 Aqa ḥsen asen maɛlik qqimen war ssinen abrid n tsegda zi min ssnen, uca řexdenni ad ffɣen ɛawed x tewṣeyyet iqeddsen i d asen dd-ittwasellmen. 22 Aqa temsar asen am inna wawař-a n tidett: “Aqzin aqa idweř-dd x min tuɣa dd-iɛuqq!” niɣ mammec d as qqaren inneɣni: “Tiřeft iṣfan tedweř-dd tᵉttmarraɣ deg ubaryuḍ nnes!” ^■