1 A imɛizzen, ta d tabrat wiss tnayen i d awem dd-uriɣ, u di tnayen n tebratin-a arezzuɣ ad ssfaqeɣ nneyyet nwem iṣfan am kenniw ssɛeqřeɣ ^■   2 ḥima ad tfekkarem deg wawařen nni tuɣa innan inabiyyen iqeddsen zic u di tewṣeyyat n Siditneɣ d Amsenjem nneɣ tinni ɣarneɣ dd-yiwḍen s rrusul. 3 Man aya ittxeṣṣa ad tessnem d amezwaru, deg wussan ineggura ad dd-asen imestehzayen inni istehzan am uyuren ɣar nnecwat nsen ^■   4 ad inin: “Mani iǧa lwaɛd n twasit nnes? Zeg wami ṭṭṣen řejdud nneɣ, ammu i yeqqim kuřci am tuɣa iǧa zeg umezwar řami tᵉttwagg ddunect.” ^■   5 Maɛlik ufin ad ttun belli s wawař n AREBBI aqa din ijenwan aṭṭas zeg wami, u aqa din řbarr s Wawař n AREBBI zeg waman u s waman, ^■   6 i zi tᵉttwahellek ddunect n řweqt nni umi dd xas ssefyen waman n řḥemřet deg wussan n Nuḥ, uca tᵉttwamḥa. ^■   7 Maca ijenwan d temmurt n yiḍa, aqa ttwaḥefḍen s wawař nnes, xemmřen i tmessi ař ass n lḥisab d uweddar n lkuffar. ^■  

8 Maca ittxeṣṣa kenniw war ttᵉttum ict n řḥajjet, a imɛizzen, aqa-tt d ta: ɣar SIDI ijj n wass am ařef n iseggʷusa uca ařef n iseggʷusa am ijj n wass. ^■   9 Aqa SIDI war issɛizzi deg usuffeɣ n řwuɛud nnes am mammec d asen ittɣiř i iwdan, maca Netta iggur akidwem s ttasiɛ n řxaḍar, minzi Netta war ittexs ca ad yareyyeb uřa d ijj, maca maḥend ad tuben marra. ^■  

10 Maca ass n SIDI ad dd-yas amecnaw axewwan s ǧiřet. Deg wass nni ad weddaren ijenwan s řɣefřet u timesřayin timezwura n ddunect ad fesyent di tmessi uca tammurt d řexdayem i xas iǧan ad banent. ^■  

11 Am marra timesřayin-a ad msarent ammu, mammec ittcuwwar ad tuyurem kenniw s tqeddast d uweqqar n tcuni,

12 maḥend ad trajam u tmeẓẓrem ɣar twasit n wass n AREBBI xmi i ɣa fesyen ijenwan am ttwaqeǧben s tmessi u timesřayin timezwura n ddunect ad fesyent s řɛabuq nnes, ^■  

13 am neccin, ɛlaḥsab lwaɛd nnes, aqa nettraja ijenwan n jdid d temmurt n jdid mani i ɣa tezdeɣ tsegda. ^■  

14 S uyenni, a imɛizzen inu, umi kenniw tᵉttrajam aya, cḍarem maḥend ad tiřim břa řexmej u břa řɛib zzates di řehna.

15 Ḥesbem ttasiɛ n řxaḍar n SIDI d weṣřaḥ, am mammec uřa d umatneɣ iɛizzen Bulus d awem dd-yuran ɛlaḥsab tiɣit i d as immewcen, ^■  

16 am mammec xas issiweř uřa di marra tibratin nnes. Aqa din ca n tmesřayin i iwɛaren i řefhamet, tinni i ssfarraɣen řjuhhař d iwdan war imtinen deg wuř nsen, am mammec ggin uřa i idlisen nneɣni, u man aya ittawi ɣar wareyyeb nsen. ^■  

17 S uyenni kenniw a imɛizzen inu, am tessnem man aya qbeř, ḥḍam ixef nwem, ḥima war tḍeffaram awarni i uweddar n yinni iǧan břa ccariɛa uca ad tewḍam waxxa tuɣa tbeddem nican,

18 maca s řɛeks ad teymem deg arḍa d tussna n Siditneɣ d Umsenjem nneɣ, Yeccu Lmasiḥ, u n AREBBI, Tbabat, i Wenni umi ɣa yiři uɛuǧi, am řexxu am řebda, ař deg wussan n řebda! Amin.