1 Amɣar i tmeṭṭut ittwafarzen d tarwa nnes, inni ttexseɣ s tidett, war iǧi necc waha, maca ɛawed qaɛ inni issnen tidett, 2 minzi tidett tzeddeɣ dayneɣ uca ad kidneɣ tiři i řebda: 3 arḍa d arreḥmet d řehna ad kidneɣ iřin zi AREBBI Tababat u zi Sidi Yeccu Lmasiḥ, Tamemmit n Tbabat, di tidett u di tayri. ^□  

4 Aqa farḥeɣ aṭṭas umi ufiɣ jar tarwa nnem inni igguren di tidett, am mammec ttewṣeyyet nni neksi zi Tbabat. 5 Řexxu ttᵉttareɣ am, a tameṭṭut, war iǧi axmi d am uriɣ tawṣeyyet n jdid, maca tenni aqa-tt ɣarney zeg umezwaru: ejj aneɣ ad nexs ayawya. ^■   6 Ta d tayri, aqa ad nuyur ɛlaḥsab tiweṣṣa nnes. D ta d tawṣeyyet am mammec i tesřim zeg umezwaru, aqa ittxeṣṣa ad tuyurem dayes. ^■  

7 Minzi aṭṭas n ixeddaɛen udfen ɣar ddunect, inni war icehhden ca i twasit n Yeccu Lmasiḥ di arrimet. D wa d axeddaɛ d amḍidd n Lmasiḥ. ^■   8 Ḥḍam ixef nwem, ḥima war txessar ca řxedmet nneɣ, maca ad nawi řmunet tmun. 9 Marra wenni i ɣa ixḍan uca war iqqim ca di tɣuri n Lmasiḥ, war dayes bu AREBBI. Wenni i ɣa iqqimen di tɣuri n Lmasiḥ, aqa dayes Tababat d Tmemmit.

10 Mařa yusa-dd ɣarwem ca n ijjen uca war dd-yiwi ca taɣuri aya, xenni war t ttqebbřem di taddart nwem, war zzayes areḥḥbem ca s sřam. ^■  

11 Minzi wenni xas i ɣa yareḥḥben s sřam, ɣares amuni ak-d řexdayem nnes tiɛeffanin.

12 Ɣari aṭṭas i d awem ɣa ariɣ i kenniw, maca war xseɣ ad t ariɣ di tewriqt s ssmex, maca ssitimeɣ ad ɣarwem dd-aseɣ ḥima ad kiwem ssiwřeɣ zeg uqemmum ɣar uqemmum, ḥima řefraḥet nneɣ ad tiři tekmeř.

13 Tarwa n učmam ittwafarzen, ttseǧamen xam. Amin.