1 A iḥenjiren inu, uriɣ aya i kenniw, ḥima war txeṭṭim ca. Uca mařa ixḍa ca n ijjen, aqa ɣarneɣ Amefdi ɣar Tbabat, Yeccu Lmasiḥ, Amseggad. ^■   2 Netta d taɣarṣt n weṣřaḥ x ddnub nneɣ, war iǧi x ddnub nneɣ waha, maca ɛawed i yenni n ddunect marra. ^■  

3 S man aya i nettwařa belli aqa nessen i-t, mařa neṭṭef di tweṣṣa nnes. 4 Wenni iqqaren: “Necc ssneɣ t!”, maca war iṭṭif ca di tweṣṣa nnes, netta d bu-ixarriqen uca tidett war dayes teǧi. ^■   5 Maca wenni ittᵉṭṭfen deg Wawař nnes, ad dayes tkemmeř Tayri n AREBBI s tidett. S man aya nessen, belli aqa neccin dayes. ^■   6 Wenni iqqaren: “Necc dayes!”, ittxeṣṣa ad yuyur am mammec tuɣa iggur Netta. ^■  

7 A imɛizzen inu, war d awem ttariɣ ca tawṣeyyet n jdid, maca tawṣeyyet taqdimt i tuɣa ɣarwem zeg umezwaru. Tawṣeyyet-a taqdimt d awař i tuɣa tesřim. ^■   8 Waxxa amenni ad awem dd-ariɣ tawṣeyyet n jdid tenni iǧan d tidett dayes u daywem, minzi taǧest teɛdu uca Tafawt n tidett aqa tᵉtteḍhar-dd řexxu. ^■  

9 Wenni iqqaren belli aqa-t di Tfawt am icarh umas, netta aqa-t di taǧest ař iḍa.

10 Wenni ittexsen umas, ad iqqim di Tfawt uca war dayes bu řefḍiḥet. ^■  

11 Maca wenni icarrhen umas, aqa-t di taǧest uca iggur di taǧest, war issin mani i ɣa iraḥ, minzi taǧest tessdarɣeř tiṭṭawin nnes.

12 Ad awem dd-ariɣ, a iḥenjiren, minzi ddnub nwem ɣfarent awem di ṭṭweɛ n Yisem nnes. ^■  

13 Ad awem dd-ariɣ, a ibabaten, minzi aqa tessnem wenni iǧan zeg umezwaru.

Ad awem dd-ariɣ, a ibřiɣen, minzi aqa tɣellbem x umɛeffan.

Aqa uriɣ awem-dd, a iḥenjiren, minzi tessnem Tababat.

14 Aqa uriɣ awem-dd, a ibabaten, minzi tessnem wenni iǧan zeg umezwaru.

Aqa uriɣ awem-dd, a ibřiɣen, minzi aqa kenniw tjehdem uca Awař n AREBBI ittɣima daywem uca tɣellbem x umɛeffan.

15 War ttexsem ca ddunect uřa d min iǧan di ddunect, minzi mařa ca n ijjen ittexs ddunect, Tayri n Tbabat war dayes teǧi. ^■  

16 Minzi marra min iǧan di ddunect, aqa-t d nnecwet n ddat d nnecwet n tiṭṭawin d tuffet n ddunect-a, war dd-ttisent ca zi Tbabat, maca zi ddunect.

17 Ddunect tɛeddu uřa d nnecwat nnes, maca wenni itteggen min ixs AREBBI, ad iqqim i řebda. ^■  

18 A iḥenjiren inu, aqa ikuden ineggura iwḍen-dd, uca am tesřim belli ad dd-yas lmasiḥ afalsu, amenni řexxu ḍharen-dd aṭṭas n imasiḥen issxarriqen. S uyenni nessen belli řweqt taneggarut aqa tiweḍ-dd. ^□  ■  

19 Ffɣen-dd zzayneɣ, maca war ten tuɣi zzayneɣ. Maɛlik nitni tuɣa zzayneɣ, ad iři qqimen akidneɣ. Maca nitni ffɣen-dd zzayneɣ, ḥima ad iban belli nitni marra war ǧin ca zzayneɣ. ^■   20 Aqa ɣarwem adhan n Umqeddas uca tessnem ad tfarzem kuř ijj n bnadem. ^■   21 War d awem uriɣ minzi war tessinem ca tidett, maca minzi aqa tᵉttessnem tt, uca uřa d ijj n uxarriq war dd-itteffeɣ ca zi tidett. 22 Wi iǧan d bu-ixarriqen mɣir wenni inkaren belli Yeccu d Lmasiḥ! D wa d lmasiḥ afalsu, wenni inkaren Tababat d Tamemmit. ^□   23 Marra wenni inkaren Tamemmit, war yumin ɛawed di Tbabat. Maca wenni icehhden i Tmemmit, icehhed ɛawed i Tbabat. ^■   24 Ejj ad daywem iqqim min tesřim zeg umezwaru. Mařa iqqim daywem min tesřim zeg umezwaru, ad teqqimem kenniw ɛawed di Tbabat u di Tmemmit. 25 Ta d tikkest n wawař i d aneɣ iwca: Tudart ittduman.

26 Man aya uriɣ awem-t-i-dd x yenni kenniw ixeddɛen. 27 Mařa Adhan i zzayes tᵉṭṭfem, ad iqqim daywem, war teḥdajem ad kenniw isseřmed ḥed. Minzi adhan n AREBBI, ad kenniw isseřmad di marra, uca Netta d tidett war dayes ǧin ixarriqen. Xenni qqimem di min d awem isseřmed. ^■  

28 Xenni řexxu, a iḥenjiren inu, qqimem dayes, ḥima war nettseḍḥi ca qibač nnes x minni dd ɣa iḍhar, maca ad ɣarneɣ tiři ttiqqet ɣar twasit nnes. ^■   29 Mařa tessnem, belli Netta d Amseggad, snem ɛawed belli marra wi itteggen tasegda, aqa ittwaxřeq-dd zzayes.