1 Řami xawem iksi Lmasiḥ armeḥ di arrimet, ittxeṣṣa kenniw ɛawed ad tᵉṭṭfem deg uxarraṣ-a: aqa wenni immuten di arrimet, wanita aqa issbedd ddenb. ^■   2 S uyenni war itteddar ɛad ɛlaḥṣab nnecwat n bnadem am t igga qbeř di arrimet, maca ɛlaḥsab min ixs AREBBI. ^■   3 Minzi aqa icfa awem řweqt řami tuɣa kenniw tɛebbdem i min xsen řegnus umi kenniw tuɣa teggurem deg ufucceḥ, ssekran, řefsad d fictat n uɣelli u di weɛbad i ccwaṭen. ^■   4 U xzar, řexxu ttbehten nitni umi war tizzřem ɛad akidsen deg wezqaq n řeqjaḥet d ijjen uca nitni ttceqqafen daywem. 5 Maca nitni ad arren řeḥsab i AREBBI, wenni ittrajan ad iḥkem x yenni iddaren u x yenni immuten.

6 S uyenni ittwabarreḥ s Řexbar Aṣebḥan uřa i imettinen, ḥima nitni ad ttwaḥasben am iwdan zi jjihet n arrimet tamednubt, maca ad ddaren di AREBBI di Arruḥ. ^■   7 Aneggar n marra aqa yudes-dd. S uyenni iřim s řeɛqeř uca rekkzem ixef nwem xmi teẓẓaǧam. ^■   8 Sennej x marra, xsem ayawya břa qeṭṭu, minzi tayri tessduřuy x ubarru n ddnub. ^■   9 Areḥḥbem i ibarraniyyen břa řeɛkaset. ^■  

10 Ejj kuř ijjen ad isexxar amqarreb nnes ɛlaḥsab min d as immewcen zi Arebbi, am inni iwekkřen mliḥ x ɛřam kuř arḍa n AREBBI. ^■  

11 Ejj marra wi issawařen, ad issiweř ɛlaḥsab Awař n AREBBI, u ejj kuř ijj wenni ittsexxaren, ittsexxar ɛlaḥsab jjehd i d as iwca AREBBI, ḥima di marra min tᵉtteggem ad idweř usemɣar ɣar AREBBI s Yeccu Lmasiḥ wenni ɣar iǧa uɛuǧi d ccan i řebda qaɛ. Amin.^■  

12 A imɛizzen, war dehhcem ca zeg waṭṭas n ujarreb i xawem dd ɣa ikken, axmi kenniw teřqef ca n tmesřact n jdid, maɣar man aya iǧa i uqeǧeb nwem. ^■  

13 Maca farḥem umi tcarcem deg uweddeb i ikkin x Lmasiḥ, ḥima ad tfarḥem s řefraḥet ɛawed xmi dd ɣa iḍhar uɛuǧi nnes.

14 Mařa ɛeyyben kenniw x ssibbet n Yisem n Lmasiḥ, sseɛd nwem minzi aɛuǧi n Arruḥ n AREBBI ad xawem yarsa. ^■  

15 War tejjim ḥed zzaywem ad iweddeb am uqettař niɣ am uceffar niɣ am uɛeffan.

16 Maca mařa ḥed iweddeb am umasiḥi, war ittseḍḥi ca, maca ad ikkar ad issuɛřa AREBBI zi ssibbet n isem-a.

17 Maɣar tiweḍ-dd řweqt maḥend ad ibda řḥukm ɣar taddart n AREBBI uca mařa řḥukm zzayneɣ i ɣa issizwar, mammec i ɣa yiři uneggaru n yinni war iṭṭiɛen ca Řexbar Aṣebḥan n AREBBI? ^■  

18 Uca mařa amseggad yiweḍ ad ittwassenjem s řweḥřan, mani ɛad i dd ɣa iḍhar ukafriw d umednub? ^■  

19 S uyenni marra inni ittweddaben ɛlaḥsab min ixs AREBBI ejj i-ten ad as sellmen řeɛmur nsen maḥend ad ggen min iṣebḥen, am i Wenni dd-ixeřqen kuřci i di iǧa řaman.