1 Yaɛqub, amsexxar n AREBBI u n Siditneɣ Yeccu Lmasiḥ, i tenɛac n tqebbař tinni ittwazeǧɛen jar řegnus: Řehna xawem! ^■  

2 A aytma, mařa ad xawem kken ɛřam kuř iɣekkwan, ḥesbem man aya marra d řefraḥet, ^■   3 maɣar kenniw tessnem belli taqeǧebt n l’iman nwem ad dd-tejj ṣṣbar. ^■   4 Maca ittxeṣṣa ṣṣbar ad ittwakemmeř ḥima ad tawḍem u ad tkemmřem, uca war kenniw ittxeṣṣi walu.

5 Mařa ca n ijjen zzaywem teqqim as ɛad tiɣit, ad tt ittar zi AREBBI wenni itticen s tecrimet i marra břa azawar, uca ad as temmewc. ^■   6 Maca ejj i-t ad ittar s l’iman, břa acekki, minzi wenni ittcekkan aqa netta am řemwaj n řebḥar nni ittwaɛarrnen zeg usemmiḍ. 7 War ttejji ad as ittɣiř i bnadem nni ad iksi ca zi SIDI, 8 maɣar netta s tnayen izeǧifen, war yarsi di marra ibriden nnes.

9 Ejj tawmat iwaḍɛen ad tessemɣar di řuɛřa nnes

10 u bu-wagřa deg uwaḍeɛ nnes, minzi amecnaw tawardect di řeḥtic ad ifna netta.

11 Tafuct ad tenqar s řeḥmu nnes, ad tessecmeḍ řeḥtic uca tawardect ad tisřaw uca ad as iraḥ waẓri n wudem nnes. Ammu i ɣa ifna ɛawed bu-wagřa di marra ibriden nnes. ^■  

12 Sseɛd n weryaz nni i ɣa iḥemřen aɣekkwi, minzi mařa idweř d amqeǧeb, ad iṭṭef ttaj n Tudart nni tuɣa iwaɛd zzayes AREBBI i yenni t ittexsen. ^■  

13 War tejji ḥed mařa ittwaɣwa, ad yini: “AREBBI i d ayi iɣekkwan!” Aqa AREBBI war izemmar ad ittwaɣwa zi tuɛeffna uca Netta s yixef nnes war iɣekkwi uřa d ijj.

14 Maca kuř ijj ad ittwaɣwa zi nnecwet nnes uca nnecwet ad t tᵉṭṭef uca ad zzayes ittwaɣwa.

15 Mařa nnecwet teksi s uɛeddis, ad dd-taruw ddnub uca xmi i ɣa imɣar ddnub, ad dd-yawi řmewt.

16 A aytma iɛizzen, war tᵉttweddarem!

17 Kuř tawhibt taṣebḥant d ikemmřen thekkwa-dd zi sennej, zi Tbabat n tfawin i war ɣar iǧi ubeddeř niɣ tiři n ddewřan. ^■  

18 Yusa-dd as x řxaḍar maḥend ad aneɣ dd-yejj s wawař n tidett ḥima ad niři d tamezwarut zi marra min i dd-ixeřqen. ^■  

19 Snem aya, a aytma iɛizzen, ejj kuř bnadem ad iqeǧeq ḥima ad iseř, war tqeǧiqem ca ɣar wawař niɣ ɣar tefqeḥt. ^■   20 Minzi tafqeḥt n weryaz war dd-ittiwi ca tasegda zzat i AREBBI. 21 S uyenni ssarsem xawem qaɛ taxmuji d waṭṭas n tuɛeffna, uca qebřem s temhint awař i ittwaẓẓun di ṭṭbiɛet nneɣ nni izemmaren ad issenjem řeɛmur nwem. ^■  

22 Iřim d inni itteggen awař, war iǧi d inni ittesřan waha, war cemtem ixef nwem! ^■   23 Minzi mařa ḥed isřa i wawař, maca war zzayes iggi, aqa netta amecnaw ijj n weryaz i ixezzaren di tisit deg uɣembub nnes. ^■   24 Aqa ittwařa ixef nnes, iruḥ, uca řexdenni ad ittu mammec tuɣa iǧa. 25 Maca wenni i ɣa ixzaren di Ccariɛa ikemmřen n třelli uca iqqim ixezzar dayes, war iǧi am ijjen ittesřa řexdenni itettu deɣya, maca am ijjen wenni tt itteggen s tidett, aqa wanita ad ittwabarek di min ittegg. ^■  

26 Mařa din wenni umi ittɣiř aqa netta ittsexxar i AREBBI am war iḥeṭṭi iřes nnes, maca ixeddeɛ uř nnes, xenni aqa tasexxart nnes baṭeř. ^■   27 Maɣar tasexxart tamezdagt tamqeddast qibač i AREBBI, Tababat, aqa-t d ta: ad tṣuned iyujiřen d tijjař di řmeḥnet nsent uca ad tessḥeyyded ixef nnek zi ddunect břa řɣecc.