1 A aytma, war tteggem s wudmawen di l’iman iɛuǧen n Siditneɣ Yeccu Lmasiḥ. ^■   2 Minzi mařa yudef-dd ɣar tmesmunt nwem ijj n weryaz s txadent n wureɣ u s warruḍ icnan, uca yudef-dd ɛawed ijj n umezřuḍ s warruḍ ixemjen, 3 uca xenni ad tewcem taynit i wenni ɣar iǧa warruḍ icnan ad as tinim: “Qqim deg wemcan-a iṣebḥen!”, maca i umezřuḍ ad as tinim: “Cek bedd diha!” niɣ: “Qqim zzat i tnebdat n iḍaren inu!”, 4 ma war ttemṣurrufem jar awem s iɣembab uca tdewřem tfarrzem s ixarriṣen iɛeffanen?

5 Sřem, a aytma iɛizzen, ma war ǧin imezřaḍ n ddunect-a d bu-wagřa di l’iman? Aqa ixḍar-ten AREBBI, ḥima ad iřin d iwriten n Tgeldit i zzayes iwaɛd AREBBI i yenni t ittexsen. ^■   6 Maca kenniw tɣeṭṭrem zeg imezřaḍ! Xzar, ma war ǧin d inni s wagřa d inni xawem iḥekkmen u d inni kenniw ineddhen ɣar řfusina? 7 Xzar, ma war ǧin d nitni inni ittceqqafen deg Yisem iṣebḥen wenni xawem ittwařaɣan? 8 Maca mařa tkemmřem Ccariɛa n AREBBI am mammec tura: “Ad texsed amqarreb nnek am ixef nnek!”, aqa tᵉtteggem mliḥ, ^■   9 maca mařa teggim s wudmawen, aqa tᵉtteggem ddnub uca ad tᵉttwaḥekmem s Ccariɛa am inni ixḍan ak-d Ccariɛa.

10 Minzi wenni iḍfaren marra Ccariɛa, maca yarẓa ict n tewṣeyyet, aqa netta d bu-umarwas zi Ccariɛa marra. ^■  

11 Minzi wenni innan: “War zenni!”, inna ɛawed: “War neqq!” Mařa war teznid, maca tenɣid, aqa cek d axeṭṭay n Ccariɛa. ^■  

12 Siwřem uca ggem am yenni i ɣa ittwaḥekmen s tebridt n Ccariɛa n tiřelli.

13 Minzi řḥukm war yareḥḥem ca x wenni tuɣa war yareḥḥmen, maca s arreḥmet ad tiřim tᵉttwassuɛřam x řḥukm. ^■  

14 A aytma, man řefḍeř mařa ijjen iqqar: “Necc aqa ayi ɣari l’iman!”, maca netta war ɣares bu řexdayem? Ma izemmar l’iman nnes ad t issenjem? ^■  

15 Mařa ittxeṣṣa as i yijj n tewmat niɣ i yict n twečmat min ɣa yarḍen niɣ min ɣa ccen kuř ass, ^■  

16 uca ijjen zzaywem ad asen yini: “Uyurem di řehna, arḍem min isseḥman, jjiwnem macca!”, maca war d asen tewcim walu min ittxeṣṣan i arrimet, man nnfaɛ?

17 Aqa ammu uřa d l’iman břa řexdayem, aqa immut s ixef nnes.

18 Mařa ad ac inna ijjen: “Cek ɣarek l’iman, necc ɣari řexdayem!” Scen ayi l’iman nnek břa řexdayem uca necc ad ac ssecneɣ l’iman inu zi řexdayem inu!

19 Ma cek tumned belli AREBBI d ijjen? Aqa teggid mliḥ. Uřa d ccwaṭen umnen di man aya uca ttarjijen. 20 Ma texsed ad tessned, a bnadem iḍeɛfen, belli l’iman břa řexdayem immut? 21 Ma war ittwasegged jedditneɣ Ibrahim zi řexdayem umi ikkar ad iɣarṣ i mmis Isḥaq x uɛalṭar? ^■   22 Aqa teẓrim belli l’iman nnes tuɣa ixdem ak-d řexdayem nnes, uca l’iman ittwakemmeř s řexdayem. 23 Ammu ittwakemmeř wawař n Tira Iqeddsen i iqqaren: “Ibrahim yumen di AREBBI uca ittwaḥseb as-t-i-dd d tasegda!”, uca řaɣan as ‘ameddukkař n AREBBI!’ ^■  

24 Tᵉttwařam xenni, belli bnadem ittwasegged zi řexdayem, war iǧi zi l’iman waha. ^■  

25 Ma war tuɣi Raḥab, tamɣart n farq-ccɣeř, tᵉttwasegged ammu zi řexdayem umi tareḥḥeb zeg ibergagen, tessuffeɣ i-ten zeg webrid nneɣni? ^■   26 S uya, amecnaw arrimet břa buḥbeř temmut, ammu uřa d l’iman břa řexdayem immut.