1 War ttejjim aṭṭas zzaywem ad dewřen d imesɣaren, a aytma, aqa kenniw tessnem belli ad neksi řḥukm ameqqran. ^■   2 Minzi marra neccin nennedref deg waṭṭas. Mařa ca n yijjen war ittnedraf deg wawař, aqa netta d bnadem ikmeř, izemmar ad iqemmeɛ marra arrimet nnes. ^■   3 Xzar, nettegg sřimat deg iqemmumen n iysan ḥima ad aneɣ ggen array, aqa nzemmar ad zzaysen nessuyur arrimet nsen tmun.

4 Xzar, ɛawed iɣarruba imeqqranen inni ittwaɛarrnen zeg usemmiḍ ijehden, ttwaneddhen s yijj n řgidun ameẓyan, mani ma ixs řxaḍar n řqebṭan ad indeh. 5 Ammu uřa d iřes, aqa-t d ijj n ixef ameẓyan, waxxa amenni issgeɛɛed ixef nnes. Xzar, mammec timessi tameẓyant ad tessecmeḍ řɣabet tameqqrant. ^■   6 Iřes d ict n tmessi u ddunect n ddenb amecnaw ict n wezɣar. Iřes-a jar iɣezdisen nneɣ am ict n řḥajjet tessexmej arrimet marra, issarɣ jjiřat i iḍeffaren ijj i wenneɣni, inni iqnunniyen am tjarrarin, uca icemmeḍ yiřes s yixef nnes ɛawed. 7 Minzi marra ddarb n řmař u n ijḍaḍ u n imuddaren inni ittbuɛen di řebḥar u x temmurt, ttwaqemmɛen zi bnadem. ^□   8 Maca iřes war izemmar ad t issqemmeɛ uřa d ijj n bnadem. Aqa-t d ijj n řɣar i war ittwassqemmɛen, aqa iccur s ssem ineqqen. 9 Zzayes i nbarek SIDI d Tababat uca zzayes nenɛeř x iwdan inni ittwaggen di ṣṣifet n AREBBI.

10 Aqa zeg ijj n uqemmum tᵉtteffeɣ-dd lbaraka d nneɛřet. A aytma, man aya war iɛeddeř ad yiři ammu!

11 Ma izemmar ad dd-ffɣen zeg ijj n řɛunṣar waman imiẓiden d waman imerzagen?

12 A aytma, ma izemmar wartu ad iwc zzitun niɣ tzayart řbacur? Ammu uřa d aman imeǧaḥen war zemmaren ad ten arren d imiẓiden.

13 Wi zzaywem iǧan d amiɣis u s řeɛqeř? Ad isscen wanita řexdayem nnes zi ticři iṣebḥen nnes s tiɣit ak-d temhint. ^■  

14 Maca mařa din řeḥsed amerzag d umcubbec deg wuřawen nwem, war sgiɛɛid ixef nnek x tidett u war sxarriq ca! ^■  

15 Tanita war teǧi d tiɣit i dd-ihwan zi sennej, aqa-tt zi temmurt, zeg ixarriṣen n buḥbeř n bnadem u zi ccwaṭen. ^■  

16 Minzi mani iǧa řeḥsed d umcubbec, aqa din ixarwiḍen d ɛřam kuř tuɛeffna. ^■  

17 Maca tiɣit zi sennej tezdeg, xenni dayes řehna d řeḍrafet, tᵉttegg array, teccur s arreḥmet d řɣiǧet iṣebḥen, war tᵉttegg ca s řeḥzab niɣ s wudmawen.

18 Aqa řɣiǧet n tsegda tᵉttwazarreɛ di řhudnet i yenni itteggen řehna.