1 Manis dd-ikka umenɣi d imcubbecen jar awem? Ma zeɛma zeg ccehwat i immenɣen deg iɣezdisen nwem? ^■   2 Kenniw temmeẓrem maca kenniw war ɣarwem walu. Kenniw tneqqem u tᵉttasmem uca qaɛ amenni war dd awem ittikkwiḍ walu. Kenniw temcubbucem u tᵉmmenɣam, maca war ɣarwem walu, minzi kenniw war tᵉttaram. 3 Niɣ kenniw tᵉttaram, maca war teksim ca, minzi tᵉttarem min war iḥřin ḥima ad teggem ɣar ccehwat nwem. ^■   4 A kenniw inni izennan! Ma war tessinem ca belli tamexsiwt n ddunect aqa-tt d řeɛdawet x AREBBI? Aḥeqqa wenni ittexsen ad yiři d ameddukkeř n ddunect, ad yiři d řeɛdu n AREBBI. ^■   5 Niɣ ittɣiř awem belli Tira Iqeddsen war ɣares lmeɛna:

“Arruḥ wenni dayneɣ izeddɣen ittasem s tusmi!”? ^■  

6 Maca Siditneɣ ittic aneɣ arḍa ktar, maɣar inna:

“AREBBI isswaḍḍeɛ imɛeffaren,

maca i imwaḍɛen ittic asen arḍa.” ^■  

7 S uyenni wcem ixef nwem i AREBBI, mɛařam ak-d cciṭan uca netta ad zzaywem yarweř. ^■   8 Adsem AREBBI uca Netta ad kenniw dd-yades. Sirdem ifassen nwem, a imednab, qeddsem uřawen nwem, a kenniw, inni ɣar iǧa tnayen n izeǧifen. 9 Sḥissfem, ceḍnem! Jjem taḍeḥḥact nwem ad tedweř d acḍan u řefraḥet nwem ad tedweř d řeḥzen. ^■  

10 Marsem ixef nwem zzat i SIDI uca Netta ad kenniw issɛuǧ. ^■  

11 A aytma, war ttceqqafem ca deg wayawya! Wenni iceqqafen deg umas niɣ iḥekkem x umas, aqa wa ittceqqaf di Ccariɛa uca iḥekkem x Ccariɛa. Uca mařa tḥekmed x Ccariɛa, aqa war teǧid ca d wenni itteggen Ccariɛa, maca tarrid ixef nnek d řqaḍi n Ccariɛa.

12 Ijjen waha i iǧan d Bab n Ccariɛa, Netta d wenni ɣar teǧa tzemmar ḥima ad iwc Tudart niɣ ad tt yareyyeb. Maca min teɛnid cek umi tḥekkmed x umqarreb nwem?

13 Ma xenni i ɣa nini x yenni iqqaren: “Ass-a niɣ tiwecca ad nraḥ ɣar tendint-a ɣar tendint-in, ad din negg tasebbabt, ad nseɣ ad nezzenz ad narbeḥ!” ^■  

14 Nitni war ssinen mammec i ɣa tiři tiwecca. Min teɛna tudart nneɣ? Aqa-tt mɣir d ijj n řefwar i ɣa dd-iḍhar, ad idurreq, ad tefsi řexdenni? ^■  

15 S uya ittxeṣṣa ad inin: “Mařa ixs SIDI, ad neddar, ad negg ta d tin.” ^■  

16 Iwa nitni ttfeyycen řexxu deg uɛeffar nsen, maca qaɛ afeyyec-a d aɛeffan.

17 Wenni issnen ad igg řxar uca war t ittegg, ad as dd-ittwaḥseb d ddenb. ^■