1 Iwa kenniw, a aytbab n wagřa, sḥissfem, rum i lmuṣibat i kenniw ittrajan. ^■   2 Minzi agřa nwem aqa ɣummen, arruḍ nwem ccin t tcinda, 3 ureɣ nwem d nnuqart nwem aqa arcan uca arecci nsen ad xawem teched, ad icc aysum n arrimet nwem am tmessi. Aqa kenniw teyrum timessi i yixef nwem i wussan ineggura. ^■   4 Xzar, řmunet n ixemmasen tenni tessɛizzem x yenni imjaren iyyaren nwem tesɣuyyu, uca tɣuyyit n yinni imjaren tiweḍ as-dd ař imezzuɣen n SIDI n řɛeskarat n ujenna. ^■   5 Aqa kenniw tdarem x temmurt s ufuhart, teḍfarem meẓri nwem. Aqa tessjiwnem arrimat nwem am i wass n tɣarṣit. ^■   6 Aqa kenniw tḥekmem x Umseggad s řmewt, uca Netta war xawem immɛařa ca.

7 Maca kenniw, a aytma, ṣbarem ař dd ɣa yas SIDI, am mammec ittraja ufeǧaḥ ɣar řɣiǧet iɣřan n temmurt, iṣbar s řxaḍar ař xas iwwet wenẓar n zic d uneggar. 8 Uřa d kenniw, ṣbarem, smeḥḥdem uřawen nwem, aqa tawasit n Siditneɣ tudes-dd. 9 A aytma, war tṣuḍem x wayawya, ḥima war ɣarwem dd-ittikkwiḍ řḥukm, xzar, Řqaḍi ibedd ɣar tewwart.

10 A aytma, mquddam ak-d inabiyyen inni tuɣa issiwřen s Yisem n SIDI maḥend ad teṣbarem di tamara nwem.

11 Xzarem, nbarek inni iṣbaren. Aqa kenniw tesřam x ṣṣbar n Ayub uca twařam řɣiǧet n man aya tenni igga SIDI, maɣar SIDI d arḥim d aḥnin. ^■  

12 Amezwaru n marra, a aytma, war ttjaǧam ca, uřa ɣar ujenna uřa ɣar temmurt niɣ uřa d ict n tjaǧit nneɣni. Ad ɣarwem yiři ‘Wah!’ nwem d ‘Wah!’, d ‘Lla!’ nwem d ‘Lla!’, niɣ aqa ad tiřim sadu řḥukm. ^■  

13 Ma aqa din ca n ijjen jar awem iweddeb? Ejj i-t ad ittar. Ma aqa din ca n ijjen ifarḥ? Ejj i-t ad iɣennej s izřan n uṣebbeḥ. ^■  

14 Ma din jar awem ḥed ihřec? Ejj i-t ad dd-iřaɣa x imɣaren n tmesmunt ɣares, ḥima ad as ksin s řmeɛruf, ad t retfen s zzect s Yisem n Siditneɣ. ^■  

15 Uca taẓaǧit n l’iman ad tessgenfa amehřuc uca Siditneɣ ad t issnekkar. Uca mařa tuɣa ittegg ddnub, ad as ttwaɣfaren.

16 Neɛmem s iɛediyyen nwem u ẓaǧem i wayawya, ḥima ad tᵉttwasgenfam, maɣar jjehd n tẓaǧit n umseggad aqa-t d ameqqran.

17 Iliya tuɣa d bnadem ittaca am neccin, u iẓẓuǧ ḥima war iccit wenẓar. Xenni anẓar war iwti ca x temmurt třata n iseggʷusa d setta n iyuren. ^■  

18 Uca tuɣa iẓẓuǧ ɛawed, řexdenni ajenna iwta anẓar uca tammurt tewca ṣṣabet nnes. ^■  

19 A aytma, mařa din ḥed jar awem iffeɣ x webrid n tidett, niɣ ca n yijjen yarr i-t-i-dd ad dd-idweř zeg uweddar nnes, ^■   20 ejj i-t ad issen xenni, aqa wenni dd ɣa yarren amednub zeg uweddar nnes, ad issenjem řeɛmar zi řmewt uca ad issduři aṭṭas n ddnub. ^■