1 Ejj ad teqqim tayri n tewmat jarawem. ^■   2 War tᵉttum ca ad tarezmem tawwart i ibarraniyyen, minzi s uya areḥḥben ca s lmalakat am war ssinen. ^■  

3 Ɛeqřem x imeḥbas axmi kenniw ḥebbsem akidsen, u ɛeqřem x yenni ittwaḥsaren, am x iwdan amecnaw kenniw simant nwem inni yarḍen arrimet. ^■  

4 Ejj ad yiři řemřac d aweqqar ɣar marra, d qama nsen n řemřac d amezdag, minzi AREBBI ad iḥkem x ayt n farq-ccɣeř u x yenni itteggen zzina.

5 War tteggem nneyyet nwem di tenɛacin, maca qenɛem s min ɣarwem, minzi SIDI inna:

“Necc war cek ttejjiɣ niɣ ad dayek semmḥeɣ.” ^■  

6 Man aya ittwanna i neccin, maḥend ad nini s taryast:

“Sidi d Amɛawen inu, war tteggʷdeɣ ca,

min d ayi ɣa yegg bnadem?” ^■  

7 Ɛeqřem x imgewwaden nwem, inni d awem issiwřen awař n AREBBI. Beqqcem řɣiǧet n tecri nsen uca ḍfarem l’iman nsen. ^■  

8 Yeccu Lmasiḥ d Netta Netta, iḍennaḍ d yiḍa u i řebda.

9 War tejjim ad kenniw ɣarren s tɣuriwin iɣriben d ibeddiřen n deɣya, minzi řḥajjet n lemliḥ mařa uř icebbar deg arḍa, war iǧi di macca i war ineffɛen ca i yenni tuɣa dayes yeřhan.^■  

10 Ɣarneɣ ijj n uɛalṭar, inni dinni ittsexxaren di Tzeddiɣt, ittxeṣṣa war tᵉtten.

11 Minzi aysum n imuddaren inni idammen nsen ttwaksin ɣar Zzawect Iqeddsen s ufus n arrays n ikehhanen, ttwasarɣen barra i teqseft. ^□  ■  

12 S uyenni tuɣa Yeccu imarret ɛawed barra i tendint, ḥima ad iqeddes řgens s idammen nnes, ^■  

13 S uyenni ejj aneɣ ad neffeɣ ɣar barra n teqseft n iqiḍan, am narebbu řɛar nnes.

14 Minzi war ɣarneɣ da tandint n řebda, maca narezzu x tenni i dd ɣa yasen. ^■  

15 Ejj aneɣ ad zzayes nqeddem tiwhibin n usemɣar i AREBBI, řɣiǧet n iyencicen nni icehhden s Yisem nnes. ^■  

16 War ttᵉttum ca ad teggem min iṣebḥen uřa d tecrimet, minzi AREBBI yarḍa x tmewca am tina. ^■  

17 Ṭaɛem i yenni i kenniw ittgewwaden, ggem asen array, - minzi nitni ttɛessan x řeɛmur nwem amecnaw inni itteggen řeḥsab xawem -, ḥima ad tt ggen s řefraḥet, war iǧi s uweḥweḥ, minzi man aya war kenniw ineffeɛ. ^■  

18 Ẓaǧem xaneɣ minzi ɣarney ttiqqet belli ɣarneɣ tanefsect tecna, am dayneɣ meẓri ḥima ad neddar nican di marra.

19 Ttzawgeɣ kenniw s jjehd ad teggem ammu, ḥima xenni necc deɣya ad ɣarwem dd-dewřeɣ.

20 AREBBI n řehna wenni dd-issnekkaren Ameksa Ameqqran n wuǧi, Yeccu Lmasiḥ, Siditneɣ, zi taddart n imettinen s idammen n Řɛahd i řebda, ^■   21 ad kenniw ikemmeř di kuř řxedmet icnan ḥima ad teggem min ixs Netta. Netta ad dayneɣ igg min iǧan i arḍa nnes s Yeccu Lmasiḥ wi ɣar iǧa uɛuǧi i řebda qaɛ. Amin. ^■  

22 Xenni ttzawgeɣ zzaywem, a aytma inu, qebřem awař-a n usenhar s ttasiɛ n řxaḍar, minzi uriɣ awem-dd s drus.

23 Snem aqa arxun umatneɣ Timutiyu. Mařa yusa-dd deɣya, ad kenniw ẓareɣ akides.

24 Seǧmem x marra inni i kenniw ittgewwaden s řeḥna u x marra imqeddasen. Inni n Iṭalya ttseǧamen-dd xawem s řehna.

25 Arḍa ad kidwem yiři marra. Amin.