1 Bulus, ameḥbus n Yeccu Lmasiḥ, d tawmat Timutiyu, i Filimun iɛizzen d umsexxar akidneɣ, ^□  ■   2 u i učmatneɣ Apfiya iɛizzen, u i Arxippus, acric akidneɣ di řxedmet, u i tmesmunt di taddart nnek: ^■   3 arḍa d řehna ad kidwem iřin zi AREBBI, Babatneɣ, u zi Siditneɣ Yeccu Lmasiḥ.

4 Necc ttqadiɣ AREBBI inu řebda u ttfekkareɣ dayek di tẓaǧitin inu, ^■   5 - xzar, ɛad zeg wami necc sřiɣ x l’iman d tayri nnek i dayek iǧan zi jjihet n Siditneɣ Yeccu u zi jjihet n marra imqeddasen - , 6 ḥima ad din yiři ijj n uqarri n l’iman nnek ař ɣa tawyed řɣiǧet di řexdayem tiṣebḥanin u di tussna n marra řxar i ɣarwem di Yeccu Lmasiḥ. 7 Maɣar neccin aqa ɣarneɣ řefraḥet d ufewwej, minzi zi ssibbet n tayri nnek ttwasareyyḥen uřawen n imqeddasen.

8 S uyenni, waxxa necc ɣari taryast aṭṭas di Lmasiḥ ḥima ad cek umureɣ min icuwwaren, 9 aqa necc ɣari ḥsen, di ssibbet n tayri, ad zzayek ttareɣ, necc Bulus, aqa ayi d awessar am mammec tessned, uca řexxu ɛawed d ameḥbus n Yeccu Lmasiḥ.

10 Necc ttariɣ ac-dd x mmi Unisimus, wenni dd-jjiɣ di snaseř da di řeḥbes. ^■  

11 Netta tuɣa war cek ineffɛen zic, maca řexxu aqa ineffeɛ i cek u ineffeɛ ayi.

12 Necc aqa arriɣ ac t-i-dd ɣarek. Xenni qbeř i-t am mmi.

13 Necc mři ufiɣ iři aqa jjiɣ t danita akidi maḥend ad xafi isexxar deg wemcan nnek min da ɣa kkeɣ di snaseř x ssibbet n Řexbar Aṣebḥan.

14 Maca necc war xseɣ ca ad ggeɣ walu břa ma i ɣa mcawareɣ akidek, ḥima tcuni i teggid war tᵉttiři s uɣiř, maca s řxaḍar.

15 Minzi ad taɣ tuɣa imsebḍa xak i drus n řweqt ḥima ad ɣarek yiři ɛawed i řebda,

16 war iǧi ɛad amecnaw amsexxar, maca amecnaw ijjen i iǧan ktar zeg umsexxar, am uma inu iɛizzen, i necc beɛda, mahu i cek, di arrimet uřa di Siditneɣ!

17 Mařa tḥesbed ayi d amɛacar inu di l’iman, qebř i-t amecnaw necc.

18 Mařa netta tuɣa iḍḍarri cek niɣ zeɛma dayes amarwas, egg i-t xafi!

19 Necc, Bulus, uriɣ s ufus inu, aqa ad t xeǧṣeɣ! Maḥend war qqareɣ ca, aqa uřa d cek tᵉttursed ayi ixef nnek. 20 Wah, a tawmat inu, aqa ttwassareyyḥeɣ zzayek di Siditneɣ, sareyyeḥ uř inu di Lmasiḥ.

21 Necc ttiqqeɣ ad ayi tesřid. Uriɣ ac-dd, uca ssneɣ aqa cek ad tegged mahu min d ac iniɣ. 22 Sewjed ayi amcan mani ɣa zedɣeɣ, minzi ssitimeɣ ad ɣarwem dd-arezfeɣ s tẓaǧit nwem. ^■  

23 Ipafras, wenni akidi da di řeḥbes di Yeccu Lmasiḥ, aqa iseǧem xak s řehna, ^■   24 uřa d Markus d Aristarxus d Dimas d Luka inni d ayi itticcen afus. ^■  

25 Arḍa n Siditneɣ Yeccu Lmasiḥ ad yiři ak-d buḥbeř nwem. Amin!