1 Bulus, amsexxar n AREBBI d rrasul n Yeccu Lmasiḥ, di l’iman n yinni ittwafarzen zi AREBBI u di tussna n tidett tenni iǧan di tiggʷudi n AREBBI, ^□   2 x usitem n Tudart ittduman, tenni tuɣa zi iwaɛd AREBBI d tidett, qbeř řweqt n ikuden, ^■   3 uca aqa issargeb Awař nnes di řweqt nnes s tbarreḥt nneɣ i d ayi ittwawekkřen ɛlaḥsab řumur n AREBBI, Řɛunṣar nneɣ n Tudart. ^■  

4 I Titus, mmi d tidett ɛlaḥsab l’iman nneɣ icarcen: arḍa d řehna zi AREBBI, Tababat, u zi Siditneɣ Yeccu Lmasiḥ, Řɛunṣar nneɣ n Tudart. ^■  

5 S uyenni jjiɣ cek di Krita, ḥima ad tɛedřed min tuɣa ɛad ittxeṣṣa u ḥima ad tessgeɛɛded imɣaren di kuř tandint, am mammec cek umureɣ. ^■   6 Amɣar d ijjen wenni war di iǧi řɛib, aqa-t d aryaz i ɣares mɣir ict n temɣart, ɣares tarwa ttamnen, war ttᵉkkwaren, war ttwaṭṭfen zeg ufucceḥ. ^■  

7 Minzi ittxeṣṣa i umɣar ad yiři břa řɛib amecnaw awkiř n AREBBI. Ittxeṣṣa war dayes ittiři uɛeffar niɣ zzɛaf, war isess ccrab sennej i řqedd, war iccit s ufus nnes u war ittexs arbeḥ war iḥřin. ^■   8 Ejj i-t ad yareḥḥeb s inewjiwen, ad ixs min iṣebḥen, ittxeṣṣa ad yiři d asexxay, d amseggad, d amezdag, ad iḥkem x ixef nnes. ^■   9 Ittxeṣṣa as ad iḥḍa tɣuri n ṣṣaḥ n wawař n l’iman, ḥima iqedd ad icejjeɛ inni yumnen s tɣuri nnes n ṣṣaḥ u ad issɣeḍ tarwa n bu-tɣennant.

10 Minzi aqa din aṭṭas n iwdan inni war ixsen ad sswaḍɛen ixef nsen, ssawařen awařen ixwan, ɣar umezwaru nsen d inni zeg wextan. Nitni ssxarwaḍen ixarriṣen n iwdan. ^■  

11 Ittxeṣṣa ad asen ittwaqqen uqemmum, minzi nitni qeřɛen x waṭṭas n řaǧat, sseřmaden min war icuwwaren maḥend ad ṭṭfen arbeḥ war iḥřin. ^■  

12 Ijjen zzaysen, aqa-t d anabi nsen, tuɣa inna: “Ikritiyyen ssxariqqen řebda, aqa aten d řewḥuc iɛeffanen, war ttyiwinen ɛemmarṣ.”

13 Cchadet-a d tidett. S uyenni webbex asen s jjehd, ḥima ad iřin d iṣḥaḥen di l’iman,

14 war tticen ca taynit i tḥuja n Wudayen d tiweṣṣa n iwdan nni iwcin s weɛrur i tidett. ^■  

15 I umezdag marra d tazdugi, maca i yenni ittwaxemjen d yenni war yuminen, i nitni uřa d ict n řḥajjet tizdig, minzi ixarriṣen nsen d tnefsect nsen xemjen. ^■  

16 Nitni ttarran ixef nsen ssnen AREBBI, maca nḍaren t s řexdayem nsen. Yaɛɛut min tteggen, aqa war ṭaɛen ca, war neffɛen uřa i yict n řxedmet iṣebḥen.