4
1 D man aya i ttɛewwřeɣ xak zzat i AREBBI d Siditneɣ Yeccu Lmasiḥ, wenni i ɣa iḥekmen x yenni iddaren u x yenni immuten ɣar uxecci n Tgeldit nnes: ■ 2 barreḥ s Wawař, iři tfaqed di řweqt niɣ barra i řweqt, ṣeḥḥ, ɛaqeb, ɛřem s marra ttasiɛ n řxaḍar d useřmed. 3 Minzi ad dd-tas ict n řweqt xmi iwdan war qebbřen ɛad taɣuri iṣeḥḥen, maca ad ssmunen i ixef nsen aṭṭas n imesɣaren ɛlaḥsab tizi nsen, inni issareyyḥen imezzuɣen nsen. 4 Ad jemden tidett x imejjan nsen uca ad ffɣen zeg webrid ɣar tḥuja ixwan.
5 Cek maca faq di kuřci, ksi armeḥ, egg řxedmet n umbeccar uca kemmeř řxedmet n tsexxart nnek.
6 Minzi necc aqa ttwazeǧɛeɣ am teḍḥiyyet n tsessi u řmijař n twaḥit inu yiweḍ-dd. ■ 7 Necc menɣeɣ amenɣi aṣebḥan, aqa kemmřeɣ tazzřa inu, ḥḍiɣ l’iman. 8 Xenni řexxu, tᵉttwasewjed ayi ttaj n tsegda, tenni i d ayi ɣa iwc Sidi deg wass nni, xmi i ɣa iḥkem imseggaden. Maca war iǧi i necc waha, maca ɛawed i marra inni ixsen axecci nnes. ■
Awař d useǧem aneggaru
9 Cḍaret ḥima ad ɣari dd-tased deɣya.
10 Minzi Dimas ismeḥ dayi, ittexs ddunect uca iruḥ ɣar Tissalunika, u Kriskis iruḥ ɣar Galaṭiya u Titus ɣar Dalmatiya. ■
11 Mɣir Luka i kidi iqqimen. Awi-dd Markus uca gewwed i-t akidek, minzi ineffeɛ ayi di řxedmet n tsexxart. ■
12 Sekkeɣ-dd Ticikus ɣar Afasus. ■
13 Xmi dd ɣa tased, awi-dd akic maliṭa nni jjiɣ di Truwas ɣar Karpus uřa d idlisen ittwannḍen, d amezwaru řemṣaḥef n ccark.
14 Aliksandir, amziř n nnḥas, tuɣa igga dayi aṭṭas n tuɛeffna, Siditneɣ ad t ixeǧeṣ ɛlaḥsab řexdayem nnes. ■
15 Ḥḍa ixef nnek zzayes, minzi netta tuɣa ittɛekkas awařen nneɣ aṭṭas.
16 Umi kkareɣ ad wteɣ x ixef inu twařa tamezwarut, uřa d ijj war kidi dd-yusi, maca marra semḥen d ayi. Ejj war ittiři d axeǧeṣ nsen.
17 Maca Sidi tuɣa-t ɣar uɣezdis inu uca iwca ayi jjehd, ḥima xenni zzayi i ɣa tkemmeř tbarreḥt, u marra řegnus ad sřen, aqa necc ttwafekkeɣ-dd zeg uxenfuc n wayrad.
18 Sidi ad ayi ifekk zi marra tameɛmuč taɛeffant, ad ayi iwc Tudart di Tgeldit nnes deg ujenna, maɣar i Netta i ɣa yiři uɛuǧi i řebda qaɛ. Amin.
19 Seǧem x Priska d Akwila u x aytbab n taddart n Unisifurus s řehna. ■
20 Irastus iqqim di Kurintus u Trufimus jjiɣ t di Militus ihřec.
21 Cḍaret ad dd-tased qbeř tagrist. Iwbulus d Pudins d Linus d Kludiya d marra awmaten ttseǧamen xak s řehna.
22 Siditneɣ Yeccu Lmasiḥ aqa-t ak-d arruḥ nnek. Arḍa ad kidek yiři. Amin.