1 Maca ssen ddegga, aqa deg wussan ineggura ad din iřin ikuden n řweqt iwɛaren. ^■   2 Minzi iwdan ad xsen ixef nsen, ad iřin d iceṭṭaren, d ayt n bu-nnfaxet d imɛeffaren d imceqqafen, war ttᵉṭṭiɛin ca i iwdan nsen, ad nḍaren arḍa, ad iřin d iɛeffanen, 3 ad ceqqfen, ad meẓřen řebda di ɛřam kuř nnecwat, ad iřin qesḥen, carrhen min iṣebḥen, 4 ad iřin d iɣeddaren d ifentrusen, daysen nnfaxet, ad xsen nnecwat ktar zi AREBBI, 5 Nitni ɣarsen udem n tiggʷudi zi AREBBI, maca bedden ggʷejen x jjehd nnes. Inni iǧan amenni, ittxeṣṣa ad ten tessiggʷejed xak. ^■  

6 Zzaysen inni ittḥaman tudrin uca ssusumen timɣarin tinni yarebbun ddnub, ttwaɛarrent s ubarru n nnecwat, ^■   7 tinni xsent ad řemdent řebda, maca ɛemmarṣ ad awḍent ɣar tussna n tidett. 8 Maca am mammec tuɣa Yannis d Yambris tᵉttemɛařan ak-d Musa, ammu ɛawed ina tᵉttemɛařan ak-d tidett: aqa aten d iwdan, inni ittwaɣecc řeɛqeř nsen, nitni ttwammenḍaren zi l’iman. ^■   9 Maca war ttriḥen ca ktar ɣar zzat, minzi afɣuř nsen iban-dd i marra, am mammec dd-iban uřa d wenni n yinni s tnayen.

10 Maca cek tsiɣid akidi deg useřmed inu, am mammec ggureɣ, tsiɣid akidi di lɣaraḍ inu, l’iman inu, ttasiɛ n řxaḍar inu, tayri inu d ṣṣbar inu,

11 di řeḥṣarat d uweddeb inu. Tessned timesřayin i xafi ikkin di Antiyuxiya d Ikuniya d Listra, man adarrec i xafi dd-yekkin, uca aqa Sidi issenjem ayi zzaysen marra. ^■  

12 S tidett marra inni ixsen ad ddaren s tiggʷudi zi AREBBI di Yeccu Lmasiḥ, ad ttwadarrcen. ^■  

13 Maca iwdan iɛeffanen d icemmaten ad arnin di tuɛeffna nsen, ad ɣwan uca ad ttwaɣwan.

14 Cek maca, qqim di min tuɣa třemded u di min tᵉttwasqenɛed, maɣar tessned man wen i zi t třemded,

15 aqa zi temẓi tᵉttwassřemded di Tira Iqeddsen, tinni zemmarent ad cek arrent d amiɣis ař i ɣa tᵉṭṭfed Tudart s l’iman di Yeccu Lmasiḥ.

16 Kuř tira i yuran s Arruḥ Iqeddsen, aqa ineffeɛ ɛawed i useřmed, i uṣeḥḥi, i weɛdař uca i ttarbiyyet di tsegda, ^■  

17 ḥima bnadem n AREBBI ad yiři iɛess, iḥezzem i marra řxedmet iṣebḥen.