1 Cek xenni, mmi inu, iři tmeḥḍed di arḍa nni iǧan di Yeccu Lmasiḥ, 2 u min zzayi tesřid s waṭṭas n řechud, wekkeř i-t i iwdan imtiqqan, inni izemmaren ad ssřemden ɛawed inneɣni. ^■  

3 Arbu řɣar ak-d inneɣni am ijj n uɛeskari icnan n Yeccu Lmasiḥ. 4 War din uřa d ijj n uɛeskari iřehha ak-d řeswaq n tudart. Ittxeṣṣa as ad yarḍa wenni t iggin d aɛeskari waha. ^■   5 Uca ɛawed wenni ittemḥizwaren amecnaw bu-umḥizwar, war d as tticen ttaj mařa war immniɣ ɛlaḥsab řqanun. 6 Afeǧaḥ i itteggen řxedmet iqesḥen, ittxeṣṣa as ad iksi d amezwar zi řɣiǧet. ^■  

7 Xarreṣ di min d ac qqareɣ. Ad ac iwc Siditneɣ řefhamet di kuřci. 8 Ɛqeř belli Yeccu Lmasiḥ, wenni dd-ittwasnekkaren zi taddart n imettinen, aqa-t zi zzariɛet n Dawud ɛlaḥsab Řexbar Aṣebḥan inu, 9 Řexbar Aṣebḥan nni xef ksiɣ tamara, ɛad snaseř amecnaw mammec ǧiɣ necc d ijj n uɛeffan! Maca awař n AREBBI war izemmar ad ittwaqqen s ssnaseř. ^■  

10 S uyenni ttḥemřeɣ marra di ṭṭweɛ n yinni ittwafarzen, ḥima ad afen uřa d nitni Tudart di Yeccu Lmasiḥ ak-d uɛuǧi i řebda.

11 Wa d awař dayes řaman, minzi mařa nemmut akides, ad kis neddar ɛawed, ^■  

12 u mařa nṣebbar, ad kis neḥkem ɛawed am ijeǧiden, maca mařa nenkar i-t, Netta ad aneɣ inkar ɛawed. ^■  

13 Mařa war dayes nettiqq, aqa Netta ittɣima d amtiqqi, minzi war izemmar ad inkar Ixef nnes. ^■  

14 Seɛqeř asen man aya, ɛřem asen zzat i Siditneɣ maḥend war ttmenɣin ca s wawařen war ineffɛen, inni i dd ɣa yawyen areddeǧ x yenni ittṣennaten.

15 Ḥḍa ixef nnek, maḥend ad tarred ixef nnek am tkemřed zzat i AREBBI, amecnaw axeddam nni war ɣares min zi ɣa iseḍḥa, wenni ittbarrḥen nican awař n tidett.

16 Aggʷej x wawařen ixwan i war ineffɛen, minzi nitni ad arnin aṭṭas di řeqjaḥet n yinni iceɣřen ixef nsen ak-d man aya. ^■  

17 Awař nsen ad ittwaɣiyyez amecnaw uxsas. Aqa Himiniyus d Filitus ǧan zzaysen.

18 Nitni ffɣen zeg webrid n tidett, qqaren belli tanukra aqa temsar, uca qeřben l’iman n ijj n waydud.

19 Maca dsas n AREBBI ibedd nican uca wa d acemmiɛ nnes: “SIDI issen inni iǧan nnes, uca ejj marra inni ittřaɣan x SIDI ad ggʷejen x řmuɛṣiyyet.” ^■  

20 Maca di taddart tameqqrant war dayes řeqcuɛ n wureɣ d nnuqart waha, maca ɛawed n ukeccuḍ d třaxt, ca zzaysen n ccan u ca n ubehdeř. ^■   21 Xenni mařa ḥed issizdeg ixef nnes zi ddegga, ad yiři d ict n řqecɛet n ccan, tᵉttwaqeddes i teǧa uca tedweř tneffeɛ i Sides, aqa tᵉttwasewjed i marra řexdayem iṣebḥen.

22 Maca arweř zi marra nnecwat n temẓi uca ardef tasegda d l’iman d tayri d řehna ak-d yenni ittřaɣan x Siditneɣ zeg wuř izedgen. ^■  

23 Beɛɛed x imḥarwaḍen ibuhařiyyen i war iǧin i řebni, maɣar tessned aqa neddhen ɣar imcubbac. ^■   24 War icuwwar i umsexxar n Siditneɣ ad imcubbec, maca icuwwar as ad yuyur s řeḍrafet ak-d marra, izemmar ad isseřmed, aqa ɣares ttasiɛ n řxaḍar, ^■   25 maḥend ad isseřmed s temhint inni t ittɛekkasen. Ad taɣ AREBBI ad asen iwc ad tuben ad ssnen tidett, ^■   26 uca ad dd-asen yarr řbař, ad nfekken zi texceft n cciṭan, wenni i-ten iḥebbsen i tizi nnes.