1 Bulus, rrasul n Yeccu Lmasiḥ, ɛlaḥsab řxaḍar n AREBBI, ɛlaḥsab lwaɛd n Tudart i iǧan di Yeccu Lmasiḥ. ^□  

2 I Timutiyu, mmi iɛizzen: arḍa d arreḥmet d řehna zi AREBBI Tababat u zi Yeccu Lmasiḥ, Siditneɣ. ^■  

3 Necc ttqadiɣ AREBBI wenni umi ɛebdeɣ zi řejdud inu s tnefsect tezdeg, am ttidareɣ cek břa qeṭṭu di tẓaǧitin inu ǧiřet d wass. ^■   4 Weḥḥceɣ ad cek ẓareɣ, xmi ttfekkareɣ deg imeṭṭawen nnek, umi ɣa ttwaccureɣ s řefraḥet, 5 ɛlaḥsab řidaret i ɣari dayek, s l’iman břa nnifaq i dayek iǧan, wenni tuɣa izeddɣen amezwar di ḥennac Luwis u deg yemmac Iwniki uca, aqa ssneɣ nican belli izdeɣ dayek ɛawed. 6 S uyenni ssɛeqřeɣ cek ad tessekkared tawhibt n AREBBI tenni dayek s webrid n wesrusi n ifassen inu xak. ^■  

7 Minzi AREBBI war d aneɣ iwci arruḥ n řɛurret, maca arruḥ n jjehd d tayri d utebbet. ^■   8 S uyenni war ttseḍḥi ca ḥima ad tewced cchadet x Siditneɣ, niɣ zzayi necc, wenni d ameḥbus nnes, maca kksim marra řɣar di ṭṭweɛ n Řexbar Aṣebḥan s jjehd n AREBBI, ^■   9 wenni aqa iwca aneɣ Tudart uca iřaɣa aneɣ-dd s třaɣit iqeddsen, war iǧi ɛlaḥsab řexdayem nneɣ, maca ɛlaḥsab řxaḍar nnes d arḍa nni i d aneɣ immewcen di Yeccu Lmasiḥ qbeř řweqt n ikuden, ^■  

10 řxaḍar nni ittwasseḍharen řexxu s uxecci n Řɛunṣar nneɣ n Tudart, Yeccu Lmasiḥ wenni tuɣa ibeḍřen řmewt uca isseḍhar Tudart war ifennin s Řexbar Aṣebḥan. ^■  

11 Zzayes ttwasgeɛɛdeɣ necc d ambarreḥ d rrasul d umseřmad n řegnus. ^■  

12 X ssibbet-a ɛawed ksiɣ armeḥ u war ttṣeḍḥiɣ ca, minzi ssneɣ man wen i zi ttamneɣ uca aqa ttwassqenɛeɣ belli Netta aqa ɣares ṣṣulṭa maḥend ad iḥḍa min d ayi ittwawekkřen ař ass nni.

13 Ejj ad ɣarek iqqim lmatal n wawařen iṣeḥḥen i zzayi tesřid s l’iman d tayri i iǧan di Yeccu Lmasiḥ. ^■  

14 Ḥḍa taṣebḥant i d ac ittwawekkřen s Arruḥ Iqeddsen nni dayneɣ izeddɣen.

15 Aqa tessned belli marra inni iǧan di Asiya jjin ayi, zzaysen Fixilus d Hirmuxinis. ^■  

16 Ad yarzef Siditneɣ s arreḥmet di taddart n Unisifurus, minzi tuɣa issareyyeḥ ayi aṭṭas n twařawin uca war iseḍḥi ca zi snaseř n tmeḥbast inu. ^■  

17 Maɣar řami dd-yusa ɣar Ruma, tuɣa yarezzu xafi s cḍaret aṭṭas uca yufa ayi.

18 Ad as iwc Siditneɣ, aqa ad yaf arreḥmet ɣar Siditneɣ deg wass nni, uca mecḥař ixdem di Afasus, cek tessned ktar.