1 Seɛqeř i-ten, maḥend ad ggen array i řḥukkam u i ṣṣulaṭat, ad asen ṭaɛen, ad iřin wejden i řxedmet taṣebḥant mammec ma tegga, ^■   2 war ceqqfen di ḥed, war ttemcubbucen, ad iřin tebten uca ad ssecnen řeḍrafet i marra iwdan zi marra iɣezdisen. ^■   3 Aqa uřa d neccin zic tuɣa aneɣ d ifɣař, s wuř war imtinen, nweddar, aqa aneɣ d isemɣan n ɛřam kuř nnecwat d ccehwat, tuɣa neddar di tuɛeffna uřa di řeḥsed, dayneɣ acrah uca ncarh ijjen wenneɣni. ^■  

4 Maca xmi tban řeḍrafet d tayri n AREBBI, Řɛunṣar nneɣ n Tudart, ^□   5 aqa issenjem aneɣ, war iǧi ɛlaḥsab řexdayem n tsegda i negga, maca ɛlaḥsab arreḥmet nnes s usird i iǧan deg wexřaq n jdid d tajdidet s Arruḥ Iqeddsen, ^■   6 wenni i xaneɣ ifarrɣen s ufeyyeḍ s Yeccu Lmasiḥ, Řɛunṣar nneɣ n Tudart, ^■   7 ḥima ad nettwasegged s arḍa nnes, ad nedweř d iwriten s usitem di Tudart ittduman.

8 Awař-a dayes řmanet, uca necc xseɣ ɛawed ad tekkared ad tbedded s jjehd x man aya, ḥima inni ittecřen x AREBBI, ad meḥḍen maḥend ad cebbaren řebda di řexdayem tiṣebḥanin. Timesřayin-a cnant u daysent nnfaɛ i iwdan. 9 Maca beɛɛed x umḥarweḍ abuhaři, x thuja n taṣiřat, x umenɣi u x imcubbac n imseřmaden n idlisen, minzi di marra man aya war dayes bu nnfaɛ, aqa man aya d řbaṭeř ^■  

10 Mařa din ḥed issbeṭṭa, ittxeṣṣa kenniw ad as tagim awarni řami t twebbxem ict n twařa u ict n twařa nneɣni. ^■  

11 Aqa tessnem belli wanita d amfaryaḍ, aqa d amednub, u ittwaḥaseb zeg ixef nnes.

12 Xminni i ɣarek dd ɣa ssqadeɣ Artimas niɣ Ticikus, egg tizemmar maḥend ad ɣari dd-tased deɣya ɣar Nikubulis, minzi aqa ggiɣ ad din sseɛduɣ řmecta. ^■  

13 Zenas, amseřmad n idlisen, d Apullus, awyem ten-dd mliḥ deg webrid, ḥima war d asen ittxeṣṣi uřa d ict n tmesřact. ^■  

14 Nitni sseřmaden inni nneɣ maḥend ad ggen řexdayem tiṣebḥanin mařa din aḥdaj, ḥima war ttiřin břa řɣiǧet.

15 Marra wi akidi danita ttseǧamen xak s řehna. Seǧem s řehna ɛawed x yenni d aneɣ ittexsen di l’iman. Arḍa ad kiwem yiři marra idwem! Amin.