1 Ammu ɛawed kennint, a timɣarin, ṭaɛent i yeryazen nkent, inni war iṭṭiɛen i wawař, ḥima ad ten arebḥent břa awař s ticři nkent icnan, ^■   2 x minni i ɣa ẓaren mammec tteggurent s tiggʷudi d tazdugi. 3 War ttzehhjent s min ittbanen ɣar barra: amudi n ucuwwaf, timegga n wureɣ niɣ tyarḍi n warruḍ iṣebḥen, ^■   4 maca zehhjent s bnadem innufaren deg wuř, s arruḥ n temhint i war ittwaɣeccen, aqa-t d ijj n uzehhej iṣebḥen zzat i AREBBI. 5 Aqa ammu tuɣa zehhjent zic temɣarin timqeddasin, inni tuɣa issitimen x AREBBI, řeɛmur nsent, uca tuɣa ṭṭaɛent i yeryazen nsent. 6 Ammu tuɣa Sara tᵉṭṭaɛ i Ibrahim, třaɣa as: “Sidi!”, uca kennint tdewřent d yessis am tᵉtteggent min iṣebḥen mařa war ggur ad teggʷedent. ^■  

7 Kenniw, a iryazen, zedɣem ak-d temɣarin nwem s řeɛqeř u weqqarem tent am iɣarrafen yarexfen, ḥima war tᵉttwamenɛent ca tẓaǧitin nwem, minzi nitenti ad wartent timewca n Tudart ittduman akidwem. ^■  

8 Ɣar uneggar, munem marra ɣar array d ijjen, weddbem ak-d yenni weddben, xsem ijjen wenneɣni s tayri, areḥmem, iřim tḍarfem. ^■   9 War dd-tarrim x řɣar s řɣar niɣ tikkwura s tikkwura, maca s řɛeks barkem, minzi kenniw aqa tᵉttwařaɣam-dd ḥima ad twartem lbaraka. ^■  

10 S uya, ejj wenni ixsen Tudart d wussan icnan, ad iḥḍa iřes nnes zi min war iḥřin uřa d iyencicen nnes zeg wawař icemmten. ^■  

11 Ejj i-t ad iggʷej x min iǧan d aɛeffan, ad igg min iṣebḥen, ad yarzu x řehna uca ad t iḍfar s cḍaret. ^■  

12 Minzi tiṭṭawin n SIDI x imseggaden u imezzuɣen nnes aqa atent maḥend ad asen sřen, maca udem n SIDI aqa-t ḍidd i umɛeffan. ^■  

13 Wi izemmaren ad daywem igg řɣar, mařa kenniw teḍfarem min iṣebḥen?

14 Mařa tweddbem di ṭṭweɛ n tsegda, aqa sseɛd nwem. War tteggʷedem zeg yenni kenniw issiggʷeden, war ttnexřiɛem ca, ^■  

15 maca qeddsem SIDI, Lmasiḥ, deg wuřawen nwem, u iřim řebda twejdem maḥend ad tarrem s temhint d uweqqar x yenni kenniw i ɣa isseqsan x usitem n l’iman nwem, ^■  

16 zi tnefsect icnan, ḥima inni xawem iɛawden axmi x iwdan iɛeffanen, ad sseḍḥan umi ttceqqafen di tecri n tudart nwem icnan di Lmasiḥ. ^■  

17 Aqa ineffeɛ ad tweddbem, mařa ixs i-t AREBBI, am tᵉtteggem min iṣebḥen, maca war iǧi mařa kenniw tᵉtteggem min iǧan d aɛeffan.

18 Minzi uřa d Lmasiḥ tuɣa immut ict n twařa i ddnub, aqa Amseggad di ṭṭweɛ n yinni war iseggden, ḥima ad kenniw issiweḍ ɣar AREBBI, Netta d wenni immuten di arrimet maca aqa iddar di Arruḥ, ^■  

19 uca ibarreḥ ammu i řeɛmur inni ittwaṭṭfen di řaxart, ^■   20 inni tuɣa war ittwassqenɛen deg wussan n Nuḥ, umi tumur ttasiɛ n řxaḍar n AREBBI, aqa ad din yiři uɣarrabu am tuɣa ittraja Netta ad tuben nitni. Udfen ɣar uɣarrabu mɣir tmenya n řeɛmur inni ittwaḥḍan ddaren deg waman. ^■  

21 Aqa uřa d kenniw ttwassnejmen ɛlaḥsab amedya nni deg useɣḍeṣ, wenni war iǧi asizdeg n řexmej n arrimet, maca ad yiři mařa tneɛmem zi AREBBI s tnefsect icnan s tnukra n Yeccu Lmasiḥ, ^■   22 wenni ittwassuɛřan ɣar ujenna, iqqim ɣar ufusi n AREBBI, am d as ttwammarsen lmalakat d ṣṣulaṭat d jjehd sadu Netta. ^■