1 S uyenni beɛɛdem x marra min iǧan d aɛeffan, x ɛřam kuř taḥraymect d nnifaq d řeḥsed u x uceqqef. ^■   2 Iřim am iseyman inni dd-ittwaxeřqen zi jdid, weḥḥcem Awař amecnaw aɣi izdigen d arruḥani ḥima ad zzayes tegmam s jjehd di Tudart, 3 mařa aqa kenniw tᵉqqasem u tᵉttwařam aqa SIDI iṣbeḥ, ^■   4 wenni ɣar dd-tᵉttakkwaḍem, Aẓru Iddaren, wenni mmenḍaren iwdan, maca ɣar AREBBI aqa ittwafarz iɣřa. ^■   5 Ammu kenniw ɛawed, amecnaw iẓra iddaren, ejj ad zzaywem tᵉttwabnant tizawiyyin n Arruḥ, ad tiřim d ikehhanen iqeddsen, ḥima ad tewcem tiɣarṣin n Arruḥ i arḍa n AREBBI s Yeccu Lmasiḥ. ^■   6 S uyenni ittwanna di Tira Iqeddsen:

“Aqa da, ad ssarseɣ di Ṣihyun ijj n Weẓru iɣřa am Uzeǧif n teɣmart,

wenni dayes i ɣa yamnen, war dayes ittidef useḍḥi ɛemmarṣ.” ^■  

7 I kenniw, inni ittamnen, aqa temmewc ccenɛet aya, maca i yenni war iṭiɛen aqa-t d Aẓru n uneqraḍ d Taṣḍart n tɛenkrift,^■  

8 uca nitni ttneqraḍen dayes, minzi war ttimnen deg Wawař, am mammec d asen yura. ^■  

9 Maca kenniw teǧam d ijj n jjiř ittwafarzen, inni i ittsexxaren am ikehhanen i Tgeldit, kenniw d ijj n řgens iqeddsen, ict n tmesmunt tᵉttwafda zzayes maḥend ad barrḥen tcuni n Wenni d aneɣ dd-iřaɣan zi taǧest ɣar ufeyyeḍ n Tfawt nnes. ^■  

10 Kenniw war tᵉttwiḥsibem am řgens, maca řexxu aqa kenniw d řgens n AREBBI. Ɛawed tuɣa arreḥmet war kenniw třeḥḥef, maca řexxu tᵉttwafarreɣ-dd xawem arreḥmet nnes. ^■  

11 A imɛizzen, aqa kenniw d imeɛzab d ibarraniyyen, x uyenni ziyyareɣ xawem, war ḍeffarem ca nnecwat n arrimet tinni ittmenɣan ak-d řeɛmar nwem, ^■  

12 Uyurem nican zzat i marra tarwa n bnadem inni xawem ittɛawaden řexburat tiɛeffanin, ařami i ɣa ẓaren řexdayem nwem tiṣebḥanin, ad ssemɣaren di AREBBI deg wass n uqeǧeb. ^■  

13 Ṭṭaɛem i marra bnadem di ṭṭweɛ n AREBBI: i ijeǧiden zi ssibbet n ṣṣulṭa i ɣarsen teǧa, ^■  

14 i řquḍat, minzi nitni ttwasekken zzayes ḥima ad ɛaqben iɛeffanen u ḥima ad ssemɣaren inni itteggen taṣebḥant.

15 Minzi man aya ittexs i-t AREBBI, ḥima, xmi i ɣa teggem min iṣebḥen, ad tesseɣdem aqemmum n iwdan ifɣař, inni war issinen AREBBI, ^■  

16 am inni iddaren nican di tiřelli, war iǧi am inni iggin tiřelli nsen am ijj n uřeḥḥaf x tuɛeffna nsen, maca am imsexxaren n AREBBI. ^■  

17 Weqqarem marra iwdan, sɛizzem tawmat, ggʷedem AREBBI, cennɛem ijeǧiden. ^■  

18 Jjem inni d imsexxaren jarawem, ad ṭṭaɛen i aytbab nwem s tiggʷudi, war iǧi i yenni iṣebḥen iḍarfen waha, maca ɛawed i yenni iqesḥen d yewɛaren. ^■  

19 Minzi imsexxaren am yina ad dd-asen i AREBBI i řxaḍar nnes, inni di ṭṭweɛ n tnefsect tecna, ksin tamara nni war tt isdiheǧen. ^■   20 Man ccan i din i yenni iksin tamara zi ssibbet n tefɣuřt nsen? Maca mařa kenniw teggim tcuni, am daywem tteggen tuɛeffna, aqa man aya issemɣar ccan nwem ɣar AREBBI. ^■   21 Minzi kenniw tᵉttwařaɣam-dd i man aya umi aqa Lmasiḥ tuɣa immut di ṭṭweɛ nneɣ uca ijja aneɣ-dd ijj n lmatal, ḥima ad nuyur di jjurret n iḍaren nnes: ^■   22 Netta war iggi ca ddnub u war ittwif deg uqemmum nnes ca n řɣecc, ^■   23 Wenni, mařa zawaren t, war dd-ittarri awař, u mařa ittwaweddeb, war dd-ittarri ca ddenf, maca ittarra ddeɛwet nnes ɣar Řqaḍi n tsegda, ^■   24 Wenni iksi ddnub nneɣ s Ixef nnes uca issgeɛɛed i-ten di arrimet nnes ɣar ṣṣalib. Maɣar mařa nemmut i ddnub ad neddar di tsegda nnes, minzi kenniw aqa tᵉttwasgenfam s iyezzimen nnes. ^■   25 Minzi kenniw tuɣa tweddarem amecnaw iḥuřiyyen, řexxu maca tdewřem-dd ɣar Umeksaw d Umeḥḍay n řeɛmur nwem. ^■