1 Liman řexxu d aḍman n tmesřayin nni di issitim bnadem, axmi tina ɛad xeddment, uřa d asargeb n tmesřayin innuffaren. 2 Minzi s man aya tusa-dd ict n cchadet x imɣaren.

3 S l’iman nefhem belli ddunect tᵉttwagg s wawař n AREBBI, u belli min ittbanen aqa ittwagg zi min innuffaren. ^■  

4 S l’iman tuɣa Habil iqeddem ict n tɣarṣt i AREBBI tecna aṭṭas x tenni n Qayin, u s uya i din cchadet xas belli tuɣa-t d amseggad. Uca AREBBI iched i tɣarṣt nnes u s uya issawař ɛad, waxxa netta immut. ^■  

5 S l’iman immeksi Inux břa ma iqqas řmewt. War ittwaf ɛad, minzi iksi i-t AREBBI. Minzi qbeř ma ad t iksi, tuɣa din ict n cchadet xas, aqa tuɣa yarḍa AREBBI. ^■   6 Maca břa l’iman war izemmar bnadem ad yarḍa AREBBI, minzi wenni i ɣa dd-iqarrben ɣar AREBBI, ittxeṣṣa as ad yamen belli Netta aqa-t din u belli Netta d amxeǧaṣ n yinni xas yarezzun.

7 S l’iman tuɣa Nuḥ itteggʷed, awarni řami d as ittwanna min tuɣa ɛad war dd-ibinen, uca igga aɣarrabu i usenjem n iḥenjiren n twacunt nnes. S man aya aqa iḥkem x ddunect uca idweř d awrit n tsegda nni iǧan s l’iman. ^■  

8 S l’iman tuɣa Ibrahim, řami d ittwařaɣa, iṭaɛ uca iffeɣ ɣar wemcan i ɣa iṭṭef d řwart, uca iffeɣ břa ma ad issen mani ɣa yaweḍ. ^■   9 S l’iman tuɣa izeddeɣ di temmurt i d as ittwawaɛden, amecnaw di temmurt n ibarraniyyen. Netta izdeɣ deg iqiḍan ak-d Isḥaq d Yaɛqub, inni d iwriten akides n lwaɛd.

10 Minzi ittraja Tandint s dsusa nni zi AREBBI Wenni d Bab n řebni d Wenni tt iggin.

11 S l’iman immewc as i Sara jjehd maḥend ad teksi ddeyset s zzariɛet, - waxxa nettat war dd-tᵉttiruw - , uca am tt tuɣa ɛad barra i řmijař n tewsar nnes, turuw-dd minzi tuɣa tessen nican belli wenni d as iwaɛden dayes řaman. ^■  

12 S uyenni ɛawed zeg ijjen, aqa zeg wenni di ibḍeř jjehd nnes s tewsar, ffɣen-dd amecnaw itran n ujenna s ubarru nsen u amecnaw ijdi x tma n řebḥar i war izemmar ad ittwaḥseb. ^■  

13 Di l’iman mmuten yina marra břa ma ad ṭṭfen min d asen ittwawaɛden, maca ẓrin t zi řaggʷaj uca farḥen zzayes uca neɛmen belli nitni d ibarraniyyen d ibarraniyyen x temmurt. ^■  

14 Minzi inni iqqaren man aya, ssecnen mliḥ belli nitni arezzun Tandint nsen.

15 Maɛlik fekkaren zi temmurt manis d ffɣen, iři aqa ufin řweqt ḥima ad ɛeqben.

16 Maca řexxu iban-dd mliḥ aqa daysen meẓri ɣar temmurt nni ḥsen, min ixs ad yini ɣar tenni deg ujenna. S uyenni AREBBI war iseḍḥi ca ad as řaɣan ‘AREBBI nsen’, minzi aqa issewjed asen ict n Tendint. ^■  

17 S l’iman iwca Ibrahim, řami ittwaqeǧeb, Isḥaq d taɣarṣt, uca issars ayenni n mmis, wenni iṭṭef s lwaɛd, x uɛalṭar. ^■  

18 Minzi ittwanna as:

“Di Isḥaq ad ac řaɣan zzariɛet nnek.” ^■  

19 Tuɣa ixarreṣ belli AREBBI izemmar ɛawed ad t-i-dd-issnekkar jar imettinen, zi manis ɣares t-i-dd-yarra ɛawed am ijj n umedya.

20 S l’iman zi jjihet n min tuɣa dd-igguren ɛad, ibarek Isḥaq iḥenjiren nnes, Yaɛqub d Ɛisu. ^■  

21 S l’iman tuɣa Yaɛqub, řami immut, ibarek kuř ijjen zeg iḥenjiren n Yusuf am tuɣa iṭṭef deg ixef n teɣɣarct nnes. ^■  

22 S l’iman tuɣa Yusuf, řami tuɣa immut, issiweř x wuffuɣ n ayt n Israil uca iweṣṣa ten x ixsan nnes. ^■  

23 S l’iman tuɣa Musa, řami dd-ixřeq, ittwasnuffar zi lwalidin nnes třata n iyuren, minzi ẓrin aseymi iṣbeḥ uca war ggʷiden ca s řumur n ujeǧid. ^■  

24 S l’iman yugi Musa, řami imɣar netta, ad as řaɣan ɛad mmis n yeǧis n Firɛun. 25 Mři yufa ad yiři ittwazeyyar ak-d řgens n AREBBI uřa d tarrit n meẓri di ddnub i drus n řweqt. ^■   26 Tuɣa iḥesseb aseḥqar n Lmasiḥ d agřa ameqqran sennej i řeknuz n Miṣra, minzi tuɣa ixezzar ɣar min d as ɣa ittwaxeǧeṣ.

27 S l’iman ijja Miṣra, u war iggʷid ca zeg uxeyyeq n ujeǧid, minzi iziyyar ixef nnes axmi iẓra AREBBI i war ittwaẓaren.

28 S l’iman igga Taɣarṣt n Useɛdu d arucci n idammen, ḥima amkeḥḥaḍ n imenza nsen, war ten ittḥidi ca. ^■  

29 S l’iman ẓwan Řebḥar n Uɣanim axmi kkin di řbarr, maca Imiṣriyyen, ttwaṣarḍen zi řebḥar umi tuɣa xsen ad dayes cuqen. ^■  

30 S l’iman wḍan řeḥyuḍ n Ariḥa umi kkin sebɛa n wussan ttennḍen as. ^■  

31 S l’iman war thellek ca Raḥab, tamɣart n farq-ccɣeř ak-d yenni war iṭṭiɛen, am tuɣa tareḥḥeb ibergagen s řehna. ^■  

32 Uca min ɣa iniɣ ɛad? Minzi řweqt war tqeddi ad ssiwřeɣ x Jidɛun d Barak d Camcun d Yifta d Dawud d Camwil u x inabiyyen inneɣni, ^■   33 inni tuɣa iɣellben x tgeldiwin s l’iman, ggin tasegda, ṭṭfen lwuɛud, qqnen ixenfucen n wayraden, ^■   34 ssxesyen jjehd n tmessi, arewřen zi řeqḍeɛ n ssif, ksin jjehd di tuḍɛeft, dewřen jehden deg imenɣan, qeřɛen x řɛeskar n ibarraniyyen. ^■  

35 Arrin-dd i temɣarin iḥenjiren nsent s tnukra n imettinen, ca nneɣni mmuten s řeɛdab, tuɣa war ttrijin ad ttwafekken, maca ggur ad ṭṭfen di tnukra icnan ḥsen zi man aya, ^■  

36 ca nneɣni ksin abehdeř d urekkuḍ, uca ɛad inneɣni ttwaggen di ssnaseř u di řeḥbes. ^■   37 Inneɣni ttwarejmen, ttwaqeṣṣen di tnayen, inneɣni mmuten s řeqḍeɛ n ssif, telɛen am arḍen iřmawen n wuǧi d iɣayḍen, daysen řeɣben, ttwaḥṣaren, ttwaḍeřmen. ^■   38 Nitni d iwdan nni war ssdaheǧen walu i ddunect, minzi telɛen di řexřawat, x idurar u deg ifran d ixerdusen n temmurt.

39 Uca marra ina i x tᵉttwaf ict n cchadet n l’iman nsen, war ṭṭifen ca di lwaɛd, 40 minzi AREBBI tuɣa izwar iẓra di ṭṭweɛ nneɣ, aqa nitni war ttikkʷiḍen ca ɣar řekmaret břa neccin.