1 Minzi tuɣa Ccariɛa d tiři n řxar i dd ɣa yasen waha, war ɣares ṣṣifet n tmesřayin simant nsent. S uyenni war zemmarent tɣarṣa nni, waxxa iwyen tent-i-dd kuř aseggʷas, ad awyent řekmaret x yenni tent dd-ittqarraben. ^■   2 Minzi mařa iban-dd aqa tᵉttawyent ɣar řekmaret, ad tiři ttwasbedden nitni zeg uwehheb n tɣarṣa nsen aṭṭas zeg wami, minzi war tᵉttwakkʷur ɛad tnefsect nsen s ddenb, awarni řami ttwassizedgen ict n twařa. 3 Maca s man aya ttwasfekkaren asen-dd ddnub nsen kuř aseggʷas, 4 minzi idammen n ifunasen d iɣayḍen war zemmaren ad ssizdgen zi ddnub. ^■  

5 S uyenni řami dd-yudef ɣar ddunect, inna:

“Taɣarṣt niɣ tiwhibin war tent texsed,

maca aqa tessyarḍed ayi ict n arrimet. ^■  

6 Tiɣarṣin n wecmaḍ n řehna i ddnub

war tent tᵉttared.”

7 Řexdenni nniɣ:

“Xzar, ad dd-aseɣ,

ɣar beddu n Idlisen ittwari xafi,

ḥima ad ggeɣ min texsed Cek, a AREBBI!” ^■  

8 Tuɣa inna qbeř: “Tiɣarṣin d tmewca d tɣarṣin s tmessi d tɣarṣin i ddnub war tent texsed niɣ war xasent texsed!”, waxxa aqa atent ttwaqeddment ɛlaḥsab Ccariɛa. 9 Awarni man aya inna: “Xzar, usiɣ-dd ḥima ad ggeɣ min texsed Cek, a AREBBI.” Ikkes amezwar, ḥima ad issgeɛɛed wiss tnayen.

10 Maɣar s man aya, s řxaḍar nnes, aqa nettwaqeddes deg ict n twařa s tɣarṣt n arrimet n Yeccu Lmasiḥ. ^■  

11 Maɣar kuř akehhan i tuɣa ittsexxar kuř ass, aqa iwehheb aṭṭas n twařawin simant n tɣarṣa, tinni war izemmaren ad ssizedgent zi ddnub.

12 Maca Wanita, awarni řami iqeddem ict n tɣarṣt x ddnub, aqa iqqim x yeffus n AREBBI i řebda. ^■  

13 Zi řexdenni ittraja ař d as ttwaggen řɛedyan nnes d tanebdat sadu iḍaren nnes.

14 Minzi s ict n tɣarṣt aqa yiwi i řebda řekmaret ɣar marra inni zzayes ittwaqeddsen.

15 Arruḥ Iqeddsen ɛawed iched i neccin, iqqar:

16 “D wa d Řɛahd i d asen ɣa wceɣ

awarni i wussan nni, iqqar SIDI:

‘Ad ggeɣ Ccariɛa inu di řeɛqeř nsen,

ad tt ariɣ ɛawed deg wuřawen nsen. ^■  

17 uca ddnub nsen d ixeṭṭan nsen,

ɛemmarṣ ad daysen fekkareɣ ɛad.’ ” ^■  

18 Mani ittiři weɣfar i ddnub, war din iqqim ɛad tɣarṣt x ddnub.

19 S uyenni, a aytma, aqa ɣarneɣ ttiqqet maḥend ad nadef ɣar Zzawect Iqeddsen s idammen n Yeccu, ^■   20 x Webrid n jdid iddaren i d aneɣ issewjed am dd-ikka zeg uřeḥḥaf, wenni d arrimet nnes, 21 uca aqa ɣarneɣ Arrays n ikehhanen x Taddart n AREBBI. 22 Ejj aneɣ xenni ad dd-nqarreb s wuř n tidett, di ttiqqet n l’iman, am ttwaruccan u ttwassizdagen wuřawen nneɣ zi tnefsect taɛeffant, u am ttwassirdent arrimat nneɣ s waman iṣfan. ^■   23 Ejj aneɣ ad ncebbar di cchadet n usitem nneɣ břa ma ad narjij, minzi d Wenni d aneɣ iwcin lwaɛd dayes řaman. 24 Ejj aneɣ ad neḥḍa ḥima ad negg uř deg wayawya ɣar tayri u ɣar řexdayem tiṣebḥanin. 25 War nettejji ca tamesmunt nneɣ am mammec nnumen ca, maca ad nessemḥeḍ ijjen wenneɣni, mahu ɛad xmi i ɣa tẓarem aqa ass nni yiweḍ-dd.

26 Minzi mařa ixḍa ca n ijj neɛmada awarni ma iṭṭef tussna n tidett, xenni war teqqim ɛad tɣarṣt x ddnub, ^■   27 maca araji n lḥisab issnexřɛen d řɛabuq n tmessi, tenni i ɣa iccen řɛedyan. 28 Mařa ḥed ixḍa ak-d Ccariɛa n Musa, ittxeṣṣ as ad ittwaneɣ břa arreḥmet x uqemmum n tnayen niɣ třata n řechud. ^■   29 Mecḥař ktar ittxeṣṣa ad ihwa lɛiqab x uzeǧif n wenni iɛeffsen x Mmis n AREBBI u tuɣa iḥesseb idammen n Řɛahd i zi tuɣa ittwaqeddes d taxmuji, u xenni isseḥqar Arruḥ n arḍa? 30 Minzi nessen d Wenni innan:

“Antaqem i Necc umi iǧa, Necc ad t xeǧṣeɣ!”

Uca ɛawed:

“SIDI ad iḥkem řgens nnes.” ^■  

31 Sseɛd d abarcan i wenni i ɣa iwḍan deg ifassen n AREBBI iddaren.

32 S uya fekkarem deg wussan imezwura řami tᵉttwassɣeḍṣem u tuɣa tarebbum amenɣi ameqqran am mammec xawem tekka řefḍiḥet d řmeḥnet. 33 Tdewřem d ijj n afurrej u tcarcem ak-d inneɣni umi daysen ittwagg ammu kifkif. 34 Minzi teksim amnus x yenni ittwaḥebbsen, uca tqebřem akecceḍ n wagřa nwem s řefraḥet, tessnem belli ɣarwem agřa imɣar i war ifennin deg ijenwan. ^■  

35 War neṭṭarem ca taryast nwem nni ɣar teǧa ict n řmunet temɣar. 36 Minzi ittxeṣṣa kenniw ṣṣbar, ḥima ad tᵉṭṭfem lwaɛd am tᵉtteggem min ixs AREBBI. ^■  

37 “Minzi drus n řweqt i dinni

uca wenni dd ɣa yasen ad ixecc,

war ittɛeṭṭař ca. ^■  

38 Maca amseggad s l’iman inu ad iddar,

maca mařa ismeḥ,

war zzayes ifarreḥ řeɛmar inu.” ^■  

39 War ɣarneɣ min ɣa negg s tarexxut ittawyen ɣar txessart, maca l’iman i ittawyen ɣar usenjem n řeɛmar.