1 Maca ɣar umezwar tuɣa din řefruḍ i tsexxart u tuɣa din ict n Zzawect Iqeddsen di ddunect-a. 2 Minzi Tazeddiɣt tamezwarut i tᵉttwagg, tuɣa dayes řqendiř d tzewḍa d weɣrum n wescan uca qqaren as: ‘Aqeddas’. ^■   3 Maca Tazeddiɣt n daxeř, awarni i uřeḥḥaf wiss tnayen, qqaren as ‘Aqeddas x Uqeddas’. ^□   4 Aqa dayes tamejmart n wureɣ i řebxur d Ttabut n Řɛahd iɣeǧfen s wureɣ ɣar marra iɣezdisen. Tuɣa dayes ijj n uzenbiř n wureɣ dayes ‘manna’, u dayes uřa d taɣɣarct n Harun tenni ittwanuwwcen d teřwiḥin n weẓru n Řɛahd. ^■   5 Sennej i man aya aqa din ‘ixiruben’ n řɛezz, inni iddřin taqebbart n weṣřaḥ i iǧan x Ttabut s tiři n wafriwen nsen. Maca war ɣarneɣ bu řweqt řexxu ḥima ad nessiweř x kuř icten zi tmesřayin-a i ittwasswejden ammu. ^■   6 Ikehhanen tuɣa ttadfen řebda ɣar Tzeddiɣt nni ɣar barra, tenni d tamezwarut, ḥima ad dayes kemmřen tsexxart nsen. ^■   7 Maca arrays n ikehhanen tuɣa ittadef ict n twařa deg useggʷas ɣar Tzeddiɣt n daxeř ak-d idammen i iqeddem x yixef nnes uřa x uweddar n řgens. ^■   8 S tebridt-a isscen Arruḥ Iqeddsen mliḥ belli abrid iqeddsen ɛad war dd-ittwameḍhar, umi ɛad Tazeddiɣt tamezwarut tbedd. ^■   9 Man aya d amedya i řweqt nni di tuɣa ttqeddamen ṣṣdaqi d tɣarṣin nni war zemmarent ad awyent řekmaret ɣar tnefsect n wenni i-tent iqeddmen.

10 Aqa atent mɣir d macca d tsessi d cckel n řuḍu uca s řefruḍ i itthimman arrimet tamednubt waha, ttwamurent ař řweqt n weɛdař n tsegda. ^■  

11 Maca Lmasiḥ i dd-yusin, aqa idweř d Arrays n ikehhanen x řxar i igga. Netta yudef ɣar Tzeddiɣt Tameqqrant ikemmřen tenni war ittwaggen ca s ifassen, war teǧi zi min dd-ittwaxeřqen. ^■  

12 War yudif ca ak-d idammen n iɣayḍen d iɛejmeyyen n ijj n useggʷas, maca aqa yudef ict n twařa ak-d idammen n Yixef nnes ɣar Zzawect Iqeddsen, u ammu i dd-yiwi aṣřaḥ ittduman. ^■  

13 Minzi mařa idammen n iɣayḍen d iyenduzen u iɣɣeḍ n uyenduz azeggʷaɣ i ittwaruccen x yenni ittwaxemjen, aqa qeddsen u ssizdigen ten zi jjihet n arrimet, ^■  

14 mecḥař ɛad idammen n Lmasiḥ, wenni iwcin ixef nnes i AREBBI s Arruḥ n řebda d taɣarṣt war dayes bu řɛib, i ɣa issizedgen tanefsect nneɣ zi řexdayem immuten ḥima ad nexdem AREBBI iddaren? ^■  

15 S uyenni aqa Netta d Amseṣřaḥ n Řɛahd n Jdid, maɣar s řmewt nnes idweř Netta d aṣřaḥ i yenni ixeṭṭan ḍidd Řɛahd amezwar, ḥima neccin, inni ittwařaɣan i řwart n řebda, ad ṭṭfen lwaɛd. ^■  

16 Minzi mani iǧa řɛahd, ittxeṣṣa ad tᵉttwasargeb řmewt n wenni iggin řɛahd,

17 Minzi řɛahd ad idweř iṣřeḥ waha xmi i ɣa immet ḥed, war ittiři ca ɛad nican min ɣa yekk iddar wenni iggin řɛahd. ^■  

18 S uyenni uřa d Řɛahd amezwar war ittwaḍmen ca břa idammen,

19 Minzi awarni řami kuř tawṣiyyet nni iǧan di Ccariɛa, aqa iweṣṣa i řgens s ufus n Musa, iksi netta idammen n uyenduz ak-d waman uřa d taḍuft tazeggwaɣt d tɛelǧet, uca irucc i-ten x idlisen u x marra řgens, 20 inna asen:

“Ina d idammen n Řɛahd,

i d awem yumur AREBBI.” ^■  

21 Tuɣa irucc ɛawed Tazeddiɣt Iqeddsen d marra řeqcuɛ n tsexxart di Tzeddiɣt s idammen. 22 Maɣar marra timesřayin nni iǧan di Ccariɛa ttwasizedgent s idammen uca břa asizzeř n idammen war din iǧi ca weɣfar.

23 Tuɣa qaɛ ittxeṣṣa ad ttwasizdegen řemtuř n timesřayin i iǧan deg ijenwan, maca min iǧan n ujenna simant nnes s tɣarṣin icnan zi tina. ^□   24 Minzi Lmasiḥ war yudif ca di Zzawect Iqeddsen i ittwaggen s ifassen, d wenni netta d lmatal n min iǧan d tidett, maca deg ujenna simant nnes, ḥima ad dd-iḍhar ɣarneɣ qibač i AREBBI. 25 War iǧi ḥima ad iqeddem Ixef nnes aṭṭas n twařawin am mammec tuɣa ittadef arrays n ikehhanen kuř aseggʷas ɣar Zzawect Iqeddsen s idammen war iǧin nnes, ^■   26 - minzi mařa ammu i iǧa, iři ittxeṣṣa ad iweddeb aṭṭas n twařawin zi beddu n ddunect - , maca řexxu, ɣar uneggar n ikuden, iwca Netta Ixef nnes ict n twařa ḥima ad ibeṭṭeř ddnub s tɣarṣt nnes.

27 Amecnaw mammec d ittwassars i iwdan ad mmten ict n twařa, uca xenni awarni i řmewt nsen ad dd-yas řḥukm, 28 ammu ɛawed immewc Lmasiḥ ict n twařa d taɣarṣt, iwca deg Yixef nnes taɣarṣt n ddnub n waṭṭas, maca ɣar twasit nnes i twařa wiss tnayen ad ittwaẓar břa ddenb i Tudart n yinni t ittrajan. ^■