1 Lmufid zi marra man aya, aqa ɣarneɣ Arrays n ikehhanen, wenni iqqimen ɣar yeffus n řɛarc n Lɛaḍim deg ijenwan. ^■   2 Netta d Amsexxar n Zzawect Iqeddsen u n Tzeddiɣt Iqeddsen d tidett nni issgeɛɛed AREBBI, war iǧi d bnadem.

3 Minzi kuř arrays n ikehhanen ittwasgeɛɛed ḥima ad iwc tiwhibin d tɣarṣin. S uyenni tuɣa ittxeṣṣa as i Wanita ɛawed ad ɣares yiři ca ḥima ad t iwc. ^■   4 Maɛlik iǧa di temmurt, Netta war ittiři d akehhan, minzi aqa din ikehhanen ɛad inni ittqeddamen tiwhibin ɛlaḥsab Ccariɛa. 5 Nitni sexxaren i umedya d tiři n min iǧan deg ujenna, amecnaw mammec ittwanna i Musa umi tuɣa iřha ak-d Uqiḍun Iqeddsen: “Ḥḍat, ad tegged marra amecnaw lmatal wenni d ac ssecneɣ x wedrar.” ^■  

6 Maca řexxu Yeccu Lmasiḥ iksi tasexxart tecna, minzi Řɛahd i zi idweř Netta d Amseṣřaḥ, aqa ḥsen qaɛ uca immewc s lwuɛud icnan. ^■   7 Minzi mařa tuɣa Řɛahd Amezwaru břa řɛib, war ittiři ɛad wemcan i wenni d wiss tnayen. 8 Maɣar Netta yufa daysen řɛib, xenni inna:

“Xzar, ad dd-asen wussan, inna SIDI,

xmi i ɣa ggeɣ ijj n Řɛahd n Jdid di řekmaret,

x řaǧ n taddart n Israil

u x řaǧ n taddart n Yahuda,^■  

9 war iǧi amecnaw Řɛahd nni wciɣ i řejdud nsen,

deg wass min di ten ṭṭfeɣ zeg ufus,

gewwdeɣ ten zi temmurt n Miṣra.

Minzi nitni war qqimen ca x Řɛahd inu,

nḍareɣ ten, iqqar SIDI.

10 Minzi d wa d Řɛahd i ɣa wceɣ i řaǧ n taddart n Israil:

‘Awarni i wussan nni, inna SIDI,

ad ggeɣ izerfan inu di řeɛqeř nsen

uca ad ten ariɣ deg wuřawen nsen,

uca Necc ad asen iřiɣ d AREBBI,

nitni ad ayi iřin d řgens.

11 Uřa d ijjen ad isseřmed mmis n temmurt niɣ umas,

ad yini: Ssen SIDI!,

minzi marra ad ayi ssnen,

zeg umeẓyan nsen ař imeqqranen nsen. ^■  

12 Minzi Necc ad ten ssizdegeɣ zi řmuɛṣiyyet nsen,

uca ddnub nsen war daysen ttfekkareɣ ɛad.’ ” ^■  

13 Řami inna: ‘Jdid!’, aqa igga Řɛahd amezwaru d aqdim, uca min yarcan u idduysar, aqa iggur ad ifna.