1 Malkiṣadiq wanita d ajeǧid n Salim, Akehhan n AREBBI wenni d Amɛuǧi x kuřci, u Netta iffeɣ-dd ḥima ad iřqa Ibrahim řami dd-idweř zi tareẓẓit n ijeǧiden, u Netta ibarek Ibrahim. ^■   2 Ibrahim iwca as řeɛcur zi marra min ɣares. Isem nnes ixs ad yini: ‘Ajeǧid n tsegda’, u ɛawed: ‘Ajeǧid n Salim!’, min ixs ad yini ‘Ajeǧid n řehna’. 3 Nḥřa ma ttwazemmen babas d yemmas deg idlisen n jjadira, u nḥřa beddu n wussan nnes niɣ aneggar n Tudart nnes, u deg warwas n Mmis n AREBBI, aqa iqqim Netta d akehhan i řebda.

4 Xzarem řexxu, mecḥař tuɣa imɣar Wanita x jedditneɣ Ibrahim i t iwcin řeɛcur zi min iṣebḥen qaɛ! 5 Inni iksin tukehhant zeg ayt n Lawi, aqa ɣarsen tawṣeyyet ɛlaḥsab Ccariɛa ḥima ad ksin řeɛcur zi řgens, iɛna zeg aytmatsen, umi nitni ffɣen-dd ɛawed zi dwaxeř n Ibrahim. ^■   6 Maca Malkiṣadiq wanita, wenni war izemmen deg idlisen nsen n jjadira, iksi zi Ibrahim řeɛcur uca ibarek i wenni iṭṭfen lwaɛd. ^■   7 Aqa břa awař, wenni iǧan qell, aqa ad ittwabarek zeg wenni iǧan ḥsen zzayes. 8 Aqa danita iwdan ifennan kessin řeɛcur, maca dinni ten ittᵉṭṭef Netta, Netta zeg Wenni aqa Idlisen cehhden belli Netta iddar. 9 Ammu nzemmar ad nini belli Lawi, wenni iksin řeɛcur, aqa iɛeccar ɛawed s ufus n Ibrahim,

10 minzi tuɣa-t ɛad di dwaxeř n babas ařami imsagar wanita ak-d Malkiṣadiq.

11 Mařa řekmařet tuɣa-tt s tukehhant n Lawi, minzi tanita tᵉttwaḍmen i řgens s Ccariɛa, mayemmi ɛad ittxeṣṣa ad dd-ikkar Ukehhan nneɣni di ṣṣifet n Malkiṣadiq? Ma zeɛma tenna Ccariɛa belli ad yiři di ṣṣifet n Harun? ^■  

12 Maca am mammec tuɣa din ijj n ubeddeř n tukehhant, ammu tuɣa din ɛawed ijj n ubeddeř n Ccariɛa.

13 Minzi Netta, x min xef ittwanna aya, aqa ittwaxřeq-dd zi teqbič nneɣnit, tenni zi uřa d ijj war isexxar ɛemmarṣ ɣar uɛalṭar.

14 Aqa bayen belli Siditneɣ iffeɣ-dd zi Yahuda, zi taqbič i war x issiweř Musa uřa s yijj n wawař x tukehhant. ^■  

15 Ɛawed tban qaɛ mliḥ aqa Netta inna belli ad dd-ikkar Ukehhan nneɣni di ṣṣifet n Malkiṣadiq,

16 wenni war ittwaggen ɛlaḥsab Ccariɛa n tweṣṣa i itthiman arrimet, maca ɛlaḥsab jjehd n Tudart war ifennan.

17 Minzi Netta iched xas:

“Cek d Akehhan i řebda

di ṣṣifet n Malkiṣadiq!” ^■  

18 Minzi tawṣeyyet tenni tuɣa qbeř, tᵉttwaxřef zi ssibbet n tuḍɛeft nnes d břa nnfaɛ nnes.

19 Minzi Ccariɛa war ttiwi qaɛ akemmeř, maca deg wemcan nnes yuse-dd usitem d ameqqran i zi nzemmar ad nades AREBBI. ^■   20 U Netta iḍmen man aya s ict n tjaǧit. 21 Maɣar nitni dewřen d ikehhanen břa tajaǧit, maca Wanita s ict n tjaǧit umi Netta i d as inna s uqemmum n Dawud:

“Aqa SIDI ijjuǧ, war issxarriǧ ɛemmarṣ:

‘Cek d Akehhan i řebda di ṣṣifet n Malkiṣadiq.’ ” ^■  

22 Di marra man aya iǧa Řɛahd-a, i zi idweř Yeccu d aḍman, qaɛ ḥsen.

23 Tuɣa din di řweqt nni aṭṭas n ikehhanen, minzi nitni mmuten, ttwamenɛen ad qqimen. 24 Maca x Wanita war xas tɛeddu tukehhant nnes, minzi Netta ad iqqim i řebda. 25 S uyenni izemmar ad iwc Tudart ittduman i yenni zzayes i dd ɣa qarrben ɣar AREBBI minzi Netta iddar i řebda uca icafeɛ dayneɣ s tẓaǧit. ^■   26 Minzi tuɣa ittřiq aneɣ ijj n Ukehhan am Wanita: amezdag, břa řɣecc d taxmuji, ittwafarzen zeg imednab, yuɛřan x ijenwan, 27 wenni war ɣar iǧi řxeṣṣ ass x wass amecnaw arruyas n ikehhanen nneɣni, ḥima ad iqeddem amezwar tiɣarṣin x ddnub nnes, xenni ɛawed x ddnub n řgens, minzi aya igga i-t ict n twařa i řebda qaɛ, řami iwca Ixef nnes d taɣarṣt. ^■   28 Aqa Ccariɛa tessgeɛɛed iwdan iḍeɛfen d ikehhanen, maca awař n tjaǧit, wenni awarni Ccariɛa, issgeɛɛed Mmis wenni ittwakemmřen i řebda.