1 S uyenni ad nejj tamezwarut n wawař n Lmasiḥ, ad nuyur zzat ɣar ukemmeř. Niɣ texsem ad tessarsem twařa nneɣnit dsas i ttubet zi řexdayem immuten u i l’iman di AREBBI, 2 u i tɣuri n useɣḍeṣ d usarsi n ifassen uřa i tnukra zi taddart n imettinen d lḥisab i řebda? 3 Ad negg man aya, mařa ad d aneɣ ismeḥ SIDI man aya. ^■  

4 Minzi inni dd-ihwan i useɣḍeṣ ict n twařa uca qqasen tawhibt n ujenna uca ṭṭfen Arruḥ Iqeddsen, ^■   5 uca qqasen awař icnan n AREBBI d jjehd n wakud i dd ɣa yasen, 6 uca xenni awarni man aya ad xḍan ɛawed, uca ad ttwassfaqen i ttubet zi jdid, aqa nitni ad ṣellben u ad sseḥqaren Mmis n AREBBI ict n twařa nneɣni. 7 Minzi tammurt, tenni isessen anẓar wenni xas iccaten aṭṭas n twařawin, tessɣemmi aɣemmuy icna i yenni umi tᵉttwafeǧeḥ, uca xenni teksi lbaraka zi AREBBI. 8 Maca mařa tesseɣmi-dd isennanen d tzeggʷart, aqa temmenḍar u tudes i nneɛřet uca aneggar nnes d acmaḍ s tmessi.

9 Maca waxxa nessawař ammu, zi jjihet nwem a-y-ayetma, aqa nessen nican timesřayin icnan ittřaḥen ak-d Tudart.

10 Minzi AREBBI war iǧi d wenni war iseggden maḥend ad ittu řxedmet nwem d tayri nwem, tenni tuɣa tessecnem deg Yisem nnes, i zzayes tuɣa kenniw tsexxarem i imqeddasen uca tᵉttsexxarem asen ɛad. ^■  

11 Maca dayneɣ meẓri ḥima kuř ijjen zzaywem ad isscen amḥaḍ d ijj i ukemmeř n usitem ař aneggar,

12 war tᵉttiřim d imeɛgaz, maca ad tiřim d imeḍfaren n yinni s l’iman d ttasiɛ n řxaḍar dewřen d iwriten n lwaɛd.

13 Minzi řami iwaɛd AREBBI Ibrahim, ijjuǧ s Yixef nnes, minzi war din iǧi wenneɣni imɣar xas maḥend ad as ijjaǧ,

14 inna:

“S tidett, ad ac barkeɣ

uca ad ac arniɣ aṭṭas s waṭṭas.” ^■  

15 Uca ammu, am ittṣebbar, aqa iksi Ibrahim lwaɛd.

16 Maɣar iwdan jjuǧen ɣar min xasen iǧan d ameqqran u marra amcubbec jar asen ad iqḍa nican s ict n tjaǧit. ^■  

17 S uyenni tuɣa ixs AREBBI ad isscen s ufeyyeḍ i iwriten belli lwaɛd nnes war ittbeddiř ca, uca iḍmen i-t s ict n tjaǧit.

18 ḥima s tnayen n tmesřayin war ttbeddiřent ca, am war izemmar xenni ad issxarreq AREBBI - , ad dayneɣ ittwagg uř s waṭṭas, aqa dayneɣ di neccin inni ɣares arewřen, ḥima ad neṭṭef deg usitem i d aneɣ ittwawaɛden,

19 d wenni ɣarneɣ amecnaw ařeyzim di řeɛmar nneɣ, maḥend iǧa řeɛmar imten, ijj n uřeyzim i dd-ittadfen ɣar daxeř n uřeḥḥaf, 20 mani yudef Yeccu wenni d aneɣ izwaren x tizi nneɣ, aqa idweř d Akehhan i řebda di ṣṣifet n Malkiṣadiq. ^■