1 Minzi kuř arrays n ikehhanen ittwakkes-dd zeg iwdan, ittwasgeɛɛed di ṭṭweɛ n iwdan x min iǧan n AREBBI, maḥend ad iqeddem tiwhibin d tɣarṣin x ddnub. 2 Izemmar ad isswaḍeɛ ixef nnes, ad iḥinn x iqubbaniyyen d imweddaren, minzi uřa d netta simant nnes iyarḍ tuḍɛeft. 3 Maɣar s man aya d icten ittxeṣṣa as ad issgeɛɛed tiɣarṣin x ddnub n řgens uca ɛawed x ddnub n yixef nnes. ^■  

4 Uřa d ijjen ma ad iksi i yixef nnes ccan-a, mɣir wenni ittwařaɣan zi AREBBI am mammec ittwařaɣa Harun. ^■   5 Ammu ɛawed Lmasiḥ war issɛuǧi ca ixef nnes umi idweř d Arrays n ikehhanen, maca issɛuǧi wenni dd ɣares issiwřen:

“Cek d Mmi,

Necc jjiɣ-dd Cek ass-a!” ^■  

6 Am mammec inna ɛawed di mani nneɣni:

“Cek d Akehhan i řebda,

di ṣṣifet n Malkiṣadiq.” ^■  

7 Řami tuɣa yarreḍ arrimet, iqeddem tiẓaǧitin d tutra s iɣuyyan aṭṭas u s imeṭṭawen i Wenni tuɣa izemmaren ad t-i-dd-issnekkar zi řmewt i Tudart, uca isřa as. ^■   8 Netta, waxxa tuɣa-t d Tamemmit, aqa iřmed ṭṭaɛet zi min xas ikkin d tiggʷudi u zeg uweddeb i iksi. ^■   9 Ammu i idweř Netta ikemmeř, idweř d řɛunṣar n Tudart ittduman i marra inni d as i ɣa iṭaɛen,

10 uca igga i-t AREBBI d Arrays n ikehhanen di ṣṣifet n Malkiṣadiq.

11 Aqa ɣarneɣ aṭṭas min ɣa nini x Malkiṣadiq wanita, iwɛar ad t nfessar, minzi tdewřem tewɛarem ad tesřem.

12 Maɣar tuɣa ittxeṣṣa ad tiřim d imesɣaren zi jjihet n řmijař n řweqt i tḍeffarem tɣuri aya. Maca řexxu ittxeṣṣa awem ɛad ad awem třemdem lḥuruf imezwura n beddu n wawařen n AREBBI, kenniw teḥdajem ɛad aɣi, maci macca ijehden. ^■  

13 Minzi kuř ijjen wenni icarcen deg uɣi, war iqedd x wawař n tsegda, minzi netta d aseymi ɛad.

14 Maca macca ijehden iffeɣ-dd i yenni imɣaren, inni aqa nnumen ad darrben tacit nsen ḥima ad farzen řxar x řɣar.