1 Maca Arruḥ iqqar nican belli deg ikuden ineggura, ca ad ḥeyyden x l’iman umi ɣa ḍfaren řaryaḥ issɣekkwan d tɣuri n ccwaṭen. ^■   2 Nitni sɣekkwan am ssniɛmiřen ixef nsen, ssxarriqen u tteqqden tanefsect nsen. 3 Nitni ad ṭṭfen řemřac uca ad umuren asbeɛɛed x macca tenni dd-ittwaggen zi AREBBI maḥend ad tᵉttwacc s uqadi, i yenni ittamnen u ssnen tidett. ^■   4 Minzi marra min dd-ittwaxeřqen zi AREBBI iṣbeḥ uca war dayes min ɣa nagi mařa neqbeř zzayes s uqadi, ^■   5 minzi ad ittwaqeddes s Wawař n AREBBI d tẓaǧit.

6 Mařa tessřemded man aya i wawmaten nnek, ad tiřid cek d amsexxar n Yeccu Lmasiḥ, am mammec tᵉttwarebbid deg wawařen n l’iman d tɣuri n ṣṣaḥ, tenni di tᵉttwassřemded. ^■   7 Maca aggʷej x tḥuja ixwan n twessura, maca marres ixef nnek di tsegda. ^■   8 Minzi arriyaḍa n arrimet tᵉttawi ɣar nnfaɛ i drus n řweqt waha, maca tasegda tneffeɛ řebda, uca aqa ɣares lwaɛd n Tudart i yiḍa u i tenni i dd ɣa yasen. ^■  

9 Wa d awař dayes řaman, isdaheǧ ad ittwaqbeř.

10 Minzi i man aya umi nxeddem u nettwaseḥqara ɛawed, minzi asitem nneɣ aqa-t di AREBBI iddaren, Wenni iǧan d Řɛunṣar n Tudart n marra iwdan, amezwaru n yinni ittamnen.

11 Seřmed uca umur s man aya.

12 Uřa d ijj war cek isseḥqiri ca x temẓi nnek, maca iři d lmatal i řmumenin s wawař, s wendah, s tayri, s l’iman u s tazdugi. ^■  

13 Iři tecḍared di tɣuri i tmesmunt, di ṭẓaǧit u deg useřmed ař dd ɣa yaseɣ.

14 War sḥeqqara ca tamewci i dayek, tenni i d ac immewcen umi tuɣa ttnabben u ssarsen imɣaren xak ifassen. ^■  

15 Ɛqeř x tmesřayin-a, cebbar daysent, ḥima ticři nnek ɣar zzat ad tban i marra.

16 Ḥḍa ixef nnek u ḥḍa x useřmed, ṣbar di man aya, minzi mařa teggid ddegga, ad tessnejmed ixef nnek d inni d ac ittesřan.