1 War tiřid tewɛared i uwessar, maca nesḥ i-t am ijj n tbabat uca ibřiɣen am wawmaten, ^■   2 u tiwessura amecnaw x tyemmatin uca tiɛezriyyin amecnaw x twečmatin s marra řeṣfayet.

3 Weqqar tijjař, tinni d tidett ǧant d tijjař. 4 Uca mařa ca n tajjač ɣares iḥenjiren niɣ ayyawen, ejj i-ten ad řemden d amezwar maḥend ad ggen min ittřiqen di ṭṭweɛ n řaǧ nsen, ad dd-arren i lwalidin min ttursen, minzi ddegga yusa-dd x řxaḍar n AREBBI. ^■   5 Maca tajjač nican d tenni iǧan weḥḥdes, tessitim i AREBBI uca tṣebbar di tutra d tẓaǧitin, ǧiřet d wass. ^■   6 Maca tenni iwḍan di tudart n nnecwet, aqa temmut waxxa teddar. 7 Umur timesřayin-a, ḥima ad iřint břa řɛib. 8 Minzi mařa ca n yijj war itthilli ca di wi iǧan nnes, d amezwaru i inni yumnen n aytbab n taddart, aqa wanita immenḍar l’iman uca netta mahu x yenni war yuminen ca. ^■  

9 Ixḍar xenni ict n tajjač, tenni war tiwiḍ settin n iseggʷusa, tenni tuɣa d tamɣart n ijj n weryaz,

10 tenni ɣar iǧa cchadet aqa tegga řexdayem tiṣebḥanin: niɣ tesseymi tarwa nnes, niɣ tareḥḥeb s ibarraniyyen, niɣ tessired iḍaren n imqeddasen, niɣ tewca fus i yenni ittwaḥṣaren, niɣ aqa tegga marra řxedmet taṣebḥant. ^■  

11 Maca war qebbeř tijjař timeẓyanin, minzi nitenti iggʷejent x Lmasiḥ, arezzunt x ijj n weryaz.

12 Aqa ccreɛ nsent imten minzi ssarsent l’iman nsent amezwar ɣar uɣezdis.

13 Maɣar nitenti ssřemdent inneɣni řeɛqez, am ggurent x tudrin, u war iǧi ssřemdent waha řeɛqez, maca nitenti ttɛawadent řexburat, ttadfent di cɣuřat n midden, qqarent min war icuwwaren. ^■  

14 S uyenni xseɣ ad meřcent tijjař timeẓyanin, ad dd-jjent iḥenjiren, ad ssuyurent taddart, war ttejjint ca i řeɛdu ssibbet ḥima ad daysent iceqqef. ^■  

15 Minzi aqa ca zzaysent bdant ad ffɣent abrid, ḍeffarent cciṭan.

16 Mařa din timɣarin yumnen tijjař ɣar yeryazen yumnen, ejj i-ten ad zzaysent kunen maḥend war ittiři ddqeř ɛad x tmesmunt, ḥima tamesmunt ad ɣares yiři mahend ad tɛawen tinni iǧan d tijjař nican.

17 Imɣaren nni ittḍebbaran mliḥ, sdahǧen aweqqar tnayen n imuren, abeɛda inni ixeddmen deg Wawař u deg useřmed. ^■  

18 Minzi Tira Iqeddsen qqaren: “War ttegg tacmant i uyenduz issarwaten!”, u: “Axeddam isdaheǧ řmunet nnes!” ^■  

19 War qebbeř ca tanfuč ḍidd i umɣar mɣir x uqemmum n tnayen niɣ n třata n řechud. ^■   20 Inni ixḍan, ɛeyyeb i-ten zzat i marra, ḥima inneɣni ad ggʷeden ɛawed. 21 Ziyyareɣ xak zzat i AREBBI d Siditneɣ Yeccu Lmasiḥ d lmalakat nnes ittwafarzen, ad teḥḍid man aya břa řfarz, war tegg uřa d ict n tmesřact ɛlaḥsab iɣembab. ^■   22 War ssrusa ifassen nnek x ḥed s uqeǧeq, war carrec di ddnub n inneɣni, ḥḍa ixef nekk di řeṣfayet. ^■  

23 War sess aman waha, maca su drus n binu i stumaɣu nnek u i řeḥřac nnek azirar. ^■  

24 Aqa din ca n iwdan ddnub nsen banen mliḥ deɣya, aqa ddnub nsen ttizzaren asen ɣar ccreɛ, uca aqa din ca nneɣni ḍeffaren ten ddnub nsen. ^■   25 Ammu dd-banent uřa d řexdayem tiṣebḥanin, maca mařa war iǧi ammu, war zemmarent nitenti ad qqiment nnuffarent.