1 Wa d awař dayes řaman: mařa ḥed ixs ad idweř d amɣar, aqa ittmeẓri deg ict n řxedmet tecna. 2 Maca ittxeṣṣa i umɣar ad yiři břa řɛib, ad yiři d aryaz n ict n temɣart, ɣares amekken n nnefs, ad yiři d asexxay, ad igg s usettef, ad yareḥḥeb s inewjiwen, izemmar ad isseřmed, ^■   3 war ittiři d amescar niɣ iwwet deɣya s ifassen, maca ad yiři d amwaḍeɛ, war ittemcubbuc, war ittiři d aqezzaz, 4 aqa netta isseggur tawacunt nnes mliḥ uca iḥekkem x tarwa nnes s marra řeṣfayet. 5 Maca mařa netta war izemmar ad issuyur tawacunt nnes, mammec i ɣa igg ad iḥḍa tamesmunt n AREBBI? 6 War itteḥdij ad yiři ameḥḍar d jdid di l’iman, ḥima war ittuff s řefyuc uca ad iwḍa di ccreɛ n cciṭan. 7 Ɛawed ittxeṣṣa ad ɣares tiři ṣṣumɛet tecna ɣar yenni di barra, ḥima war xas ttɛeyyiben uca war iweṭṭi ca di texceft n cciṭan.

8 Ittxeṣṣa ɛawed i imsexxaren n tmesmunt ad iřin ssekkwan, war ssiwiřen ca s tnayen n iřsawen, war xezzaren ca ɣar binu aṭṭas, war ḍemmɛen di arbeḥ war iḥřin, ^■   9 Ittxeṣṣa asen ad ṭṭfen di ssirr n l’iman s tnefsect teṣfa. ^■  

10 Ejj i-ten ad ttwaqeǧben d amezwaru, řexdenni, mařa iban-dd war daysen ittiři bu řɛib, ad sexxaren.

11 Ammu ittxeṣṣa uřa i timɣarin ad arsint, ad ḥḍant di řeɛquř nsent, ad daysent tiři řmanet di marra, war d ttiřint d timceqqafin.

12 Imsexxaren n tmesmunt ad iřin s ict n temɣart waha, ad ssuyuren mliḥ iḥenjiren nsen d tawacunt nsen.

13 Minzi inni itteggen taseyyart nsen mliḥ, ad ṭṭfen i yixef nsen ijj n wemcan icna d waṭṭas n teryast di l’iman n Yeccu Lmasiḥ. ^■  

14 Uriɣ ac-dd man aya uca ssitimeɣ ad ɣarek dd-aseɣ deɣya.

15 Maca mařa ɛeṭṭařeɣ xak, ad tessned mammec ittxeṣṣa ad nuyur di taddart n AREBBI, tenni iǧan d Tamesmunt n AREBBI iddaren, apilar d dsas n tidett.

16 Ssirr wanita n Tsegda d ameqqran s tidett!

“D Wenni ittwassargben di arrimet,

ittwaseggden di Arruḥ,

iḍḥaren-dd i lmalakat,

ittwabarrḥen zzayes jar řegnus,

zzayes yumnen di ddunect,

immeksin deg uɛuǧi.” ^■