Bnadem n ddnub
2
1 Aqa nettar zzaywem, a aytma, zi jjihet n twasit n Siditneɣ Yeccu Lmasiḥ d umuni nneɣ akides, 2 aqa war ttnexřiɛem niɣ tesḥissfem ca deɣya, war iǧi s ijj n wawař niɣ s ca n arruḥ niɣ s ict n tebrat axmi zzayneɣ i iqqaren: “Xzar, ass n Siditneɣ yusa-dd!” ■ 3 War tejji uřa d ijj ad kenniw iɣwa s ca n webrid, minzi ass nni war dd-ittis qbeř i dd ɣa yas uɣewweɣ uca ad dd-iban bnadem n ddnub, aqa-t d mmis n tehliket. □ ■ 4 Netta ittemɛařa u issɛuǧa ixef nnes x marra min ittwasemman ‘AREBBI’ niɣ ‘aɛbad’, ař ɣa iqqim di Zzawect Tameqqrant n AREBBI uca ad igg ixef nnes axmi netta d AREBBI. ■ 5 Ma war teɛqiřem ca umi tuɣa ayi kiwem, aqa nniɣ awem-t? 6 Maca řexxu tiwḍem tessnem min d as ibedden ɛad deg webrid ḥima ad dd-iban di řweqt nnes. 7 Ssirr n řmuɛṣiyyet aqa ixeddem řexxu, maca mařa min d as issbedden ɛad deg webrid ad immeksi zi řwest, 8 ad dd-iḍhar bab n řmuɛṣiyyet, wenni i ɣa isshellek Siditneɣ Yeccu s twarrit n nnefs zeg uqemmum nnes uca ad t issebḍeř xmi dd ɣa iḍḥar ɣar twasit nnes. ■ 9 Maɣar tawasit n bab n řmuɛsiyyet wanita aqa-t d řxedmet n cciṭan s marra jjehd d řeɛřamat d lmuɛjizat issxarriqen, ■
10 u s marra řɣecc n řmuɛṣiyyet deg yenni i ɣa ihellken, minzi nitni war qbiřen ca tayri n tidett ḥima ad zzayes ddaren. ■
11 S uyenni AREBBI ad ɣarsen dd-issekk min ten ɣa yarr s jjehd ɣar uweddar, ař ɣa yamnen deg ixarriqen. ■
12 Marra inni war yuminen ca di tidett, maca ixḍaren řmuɛṣiyyet, ad ttwaḥakmen.
Beddem nican di liman
13 Maca icuwwar aneɣ ad xawem nqada AREBBI řebda, a awmaten inni xef iɛizz Siditneɣ, belli AREBBI aqa ixḍar i kenniw zeg umezwaru i usenjem s tqeddast zi Arruḥ u s l’iman n tidett.
14 Aqa iřaɣa-dd xawem i man aya s ubarreḥ nneɣ s Řexbar Aṣebḥan, ḥima ad tiřim i uɛuǧi n Siditneɣ Yeccu Lmasiḥ.
15 S uyenni, a aytma, beddem nican uca ṭṭfem di tweṣṣa i d awem ittwasřemden zzayneɣ, ma s wawař niɣ s tebrat nneɣ. ■
16 Maca Siditneɣ Yeccu Lmasiḥ, u AREBBI, Babatneɣ, wenni d aneɣ ixsen d wenni d aneɣ iwcen afewwej ittduman d usitem icnan s arḍa nnes,
17 ad issfewwej uřawen nwem uca ad kenniw issejhed di marra awař u di marra řxedmet taṣebḥant. ■