1 Bulus d Silwanus d Timutiyu i tmesmunt n Itissalunikiyyen di AREBBI Tababat u di Siditneɣ Yeccu Lmasiḥ: arḍa d řehna ad kiwem iřin. ^■  

2 Aqa nettqada AREBBI i kenniw marra řebda u ntidar kenniw břa qeṭṭu di tẓaǧitin nneɣ. ^■   3 Qibač i wudem n AREBBI Babatneɣ, nettfekkar di řexdayem n l’iman nwem u deg utamar n tayri nwem u di ṣṣbar n usitem nwem di Siditneɣ Yeccu Lmasiḥ, ^■   4 maɣar nessen aqa kenniw tᵉttwafarzem, a aytma, imɛizzen n AREBBI, 5 Minzi Řexbar Aṣebḥan nneɣ war dd ɣarwem yiwiḍ s wawařen waha, maca uřa s jjehd, s Arruḥ Iqeddsen u s řeqnaɛet d tidett. Aqa tessnem mammec d aneɣ tuɣa jar awem di ṭṭweɛ nwem. ^■  

6 Aqa kenniw tdewřem d imeḍfaren zzayneɣ uřa zi Siditneɣ, uca, umi xawem tekka řmeḥnet tameqqrant, tᵉṭṭfem deg wawař s řefraḥet n Arruḥ Iqeddsen, ^■   7 uca ammu tdewřem d amedya i qaɛ ayt n Makiduniya d ayt n Axaya. 8 Minzi řexbar n wawař n Siditneɣ aqa iffeɣ-dd zzaywem, war iǧi di Makiduniya d Axaya waha, maca l’iman nwem di AREBBI idweř ittwassen tanya di marra imucan uca nnehřa ma nessiweř xas ɛad, 9 minzi nitni s yixef nsen ɛawden aneɣ, mammec tuɣa tarezmem aneɣ tawwart uca mammec dd-tdewřem zi l’aṣnam ɣar AREBBI ḥima ad tɛendem AREBBI iddaren wenni d tidett

10 uca ad trajam Mmis zeg ijenwan, wenni dd-issnekkar zi taddart n imettinen, Yeccu, wenni d aneɣ i ɣa issnejmen zeg weɣḍab i dd ɣa yasen. ^■