1 A aytbab, wcem imsexxaren nwem min iǧan iseggden, u snem, belli ɛawed kenniw ɣarwem Bab deg ijenwan. ^■  

2 Ṣbarem di tẓaǧit maḥend ad teḥḍam dayes, u wcem aqadi i Arebbi. ^■   3 Ẓaǧem ɛawed i neccin, ḥima AREBBI ad aneɣ yarzem tawwart n Wawař, ḥima ad nessiweř x ssirr n Lmasiḥ, wenni umi ǧiɣ ɛawed d ameḥbus di snaseř, ^■   4 ḥima ad t ssaregbeɣ am mammec i xafi icuwwar ad zzayes ssiwřeɣ.

5 Uyurem di tiɣit ak-d yenni n barra, arebḥem řweqt i yeǧan. ^■   6 Ad yiři wawař nwem řebda s řxaḍar, meǧḥem t s tmeǧaḥt, ḥima ad tessnem min zi ɣa tarrem x kuř ijjen. ^■  

7 Ticikus, uma iɛizzen d umsexxar amtiqqi d umsexxar akidi di SIDI ad kenniw issargeb x umeddur inu. ^■   8 Ssekkeɣ t ɣarwem, ḥima ad issen mammec teǧam u ḥima ad daywem igg uř, 9 jmiɛ ak-d Unisimus, umatneɣ amtiqqi iɛizzen, wenni iǧan d ijjen zzaywem. Nitni ad kenniw ssaregben mammec neǧa neccin. ^■  

10 Aristarxus wenni di řeḥbes akidi, issakkʷaḍ awem-dd sřam s řehna, am mammec xawem iseǧem uřa d Markus, ayyaw n Barnaba wenni x teksim kenniw tiweṣṣa - mařa yusa-dd ɣarwem, qebřem t -, ^■  

11 d Yeccu, umi d as qqaren Yustus. Nitni ǧan zeg wextan. Nitni weḥḥedsen ɛawnen ayi di tmesřact n Tgeldit n AREBBI uca ggin dayi uř.

12 Ittseǧam-dd xawem Ibafras, wenni d ijjen zzaywem, s řehna. Aqa-t d amsexxar n Lmasiḥ, ittedɛa awem řebda di tẓaǧit nnes s jjehd, ḥima ad tbeddem nican, ad tiřim tkemmřen di marra min ixs AREBBI. ^■  

13 Minzi cehhdeɣ xas, aqa netta aṭṭas i xawem iksi uřa x yenni di Layudikiya d yenni di Hirabulis.

14 Luka, aḍbib iɛizzen, d Dimas ttseǧamen-dd xawem s řehna. ^■  

15 Seǧmem x wawmaten inni iǧan di Layudikiya s řehna, x Nimfas u x tmesmunt di taddart nnes.

16 Xmi i ɣa tᵉttwasɣar tebrat-a jar awem, xenni ḥḍam ad tᵉttwasɣar ɛawed di tmesmunt n Ilayudikiyyen uca ad tɣarem kenniw ɛawed tenni zi Layudikiya.

17 Ini i Arxippus: “Ḥḍa ad tkemmřed řxedmet n tsexxart i teksid zi Siditneɣ!”

18 Sřam uriɣ t s ufus inu, zi Bulus. Ɛeqřem x snaseř inu. Ad kiwem yiři arḍa. Amin. ^■