1 Bulus d Timutiyu, imsexxaren n Yeccu Lmasiḥ, i marra imqeddasen di Yeccu Lmasiḥ inni iǧan di Filippi ak-d imeḥḍayen d imsexxaren: 2 Arḍa d řehna ad kiwem iřin zi AREBBI Babatneɣ, u zi Siditneɣ Yeccu Lmasiḥ. ^■  

3 Ttqadiɣ AREBBI inu řami daywem ttfekkareɣ řebda, ^■   4 maɣar di kuř tiẓaǧitin inu xawem, aqa ksiɣ s řmeɛruf s řefraḥet 5 di ssibbet n tmunt nwem ak-d Řexbar Aṣebḥan zeg wass amezwaru ař iḍa. 6 Aqa ttiqqeɣ belli wenni daywem ibdan řxedmet iṣebḥen, ad tt ikemmeř ař ass n Siditneɣ Yeccu Lmasiḥ. ^■   7 Icna ayi ad fekkareɣ daywem marra ammu, minzi aqa kenniw ɣari deg wuř inu xmi ǧiɣ di snaseř uřa xmi i ɣa awteɣ x tidet n Řexbar Aṣebḥan, minzi kenniw tcarcem akidi di arḍa. ^■   8 Minzi AREBBI d Acehhad inu mecḥař kenniw weḥḥceɣ s řeḥnunect yuǧɣen n Yeccu Lmasiḥ. ^■  

9 Man aya i ttẓaǧiɣ, aqa tayri nwem ad tfeyyeḍ aṭṭas s waṭṭas di tussna d qaɛ řefhamet taruḥanect,

10 ad třemdem maḥend ad tfarzem min ittřiqen, u ad tiřim teqqurem u břa řɛib deg wass n Lmasiḥ,

11 teccurem s řɣiǧet n tsegda i yeǧan di Yeccu Lmasiḥ i uɛuǧi d usemɣar n AREBBI.

12 A aytma, necc xseɣ ad tessnem belli timesřayin i d ayi imsaren arnint ɛad di tuzzeggart n tbarreḥt n Řexbar Aṣebḥan,

13 minzi tᵉttwassen tmeḥbast inu s Lmasiḥ i qaɛ inni iǧan di řeqṣar n qayṣar u i qaɛ min iqqimen.

14 Azyen ameqqran n wawmaten di Siditneɣ, umi ǧiɣ di tmeḥbast, idweř ɣarsen ttiqqet ktar uca dewřen zeɛɛmen ssawařen awař n AREBBI s ufeyyeḍ ktar, břa tiggʷudi. ^■  

15 Ca zzaysen ttbarrḥen Lmasiḥ zi řeḥsed d umenɣi, maca ca nneɣni ɛawed zi nneyyet tecna u s tayri,

16 minzi nitni ssnen aqa ttwaggeɣ maḥend ad wteɣ x Řexbar Aṣebḥan.

17 Inneɣni ttbarrḥen s Lmasiḥ s umcubbec, maci nican, ttexsen ad xafi arnin řmeḥnet i snaseř inu.

18 S man aya farrheɣ, wah ad farḥeɣ: aqa ittwabarreḥ Lmasiḥ s ibriden ifarzen, ma s wudem, niɣ s tidett.

19 Minzi ssneɣ aqa timesřayin-a ad iřint i Tudart s tẓaǧit nwem u s tewhibt n Arruḥ n Yeccu Lmasiḥ, ^■   20 maḥend necc, am sitimeɣ u ttrajiɣ, war ttseḍḥiɣ ca x walu, maca amecnaw řebda uřa d řexxu ad ittwassemɣar Lmasiḥ s bṭayṭay di arrimet inu, ma s tudart niɣ s řmewt. ^■   21 Minzi tudart i necc d Lmasiḥ uca řmewt d arbeḥ. 22 Maca mařa qqimeɣ ddareɣ di arrimet uca aqa din řɣiǧet zi řxedmet inu, xenni war ssineɣ min ɣa xḍareɣ. 23 Maɣar aqa ayi jar tnayen n iɣezdisen: dayi meẓri maḥend ad raḥeɣ ad iřiɣ ak-d Lmasiḥ, minzi man aya qaɛ ḥsen, 24 maca aɣimi di arrimet ittxeṣṣa ɛad ktar di ṭṭweɛ nwem. 25 D man aya ssneɣ nican, aqa ad qqimeɣ, wah ad qqimeɣ di ṭṭweɛ n řefraḥet nwem u maḥend ad igma l’iman nwem, 26 ḥima, xmi dd ɣa yaseɣ ɣarwem ɛawed, ad zzayi ifeyyeḍ usemɣar nwem di Yeccu Lmasiḥ waha.

27 Ittxeṣṣa ad tuyurem s uweqqar i Řexbar Aṣebḥan n Lmasiḥ, ḥima, xmi dd ɣa yaseɣ uca ad kenniw ẓareɣ uřa xmi i ɣa ɣabeɣ, ad zzaywem sřeɣ, aqa tbeddem nican deg ijj n arruḥ u s ijj n řeɛmar uca tᵉttɣellbem s l’iman di Řexbar Aṣebḥan. ^■   28 War tteggʷedem ca ɛemmarṣ zi řɛedyan nwem. Man aya d aɛeǧem i nitni ɣar uhellek, maca i kenniw ɣar usenjem. 29 Minzi aqa immewc awem zi AREBBI, war iǧi ad tamnem di Lmasiḥ waha maca ɛawed maḥend ad tmarrtem di ṭṭweɛ nnes, 30 minzi ɣarwem amenɣi d ijjen i d ayi teẓrim uca řexxu tesřim aqa-t dayi.