1 A tarwa, ṭṭaɛem i lwalidin nwem di Siditneɣ, minzi man aya nican i yeǧa. ^■   2 Ta d tawṣeyyet tamezwarut s yijj n lwaɛd: ‘Weqqar babac d yemmac, ^■   3 ḥima ad tiřim mliḥ u ad teddarem aṭṭas di temmurt.” ^■  

4 A ibabaten, war sɛarem ca tarwa nwem, maca arebbam ten s usettef u di tɣuri n Siditneɣ. ^■  

5 A imsexxaren, ṭṭaɛem aytbab nwem di ddunect-a s tiggʷudi d tarjijit, u s řeṣfayet n wuř axmi i Lmasiḥ. ^■   6 War iǧi qibač i tiṭṭawin nsen am inni ittexsen ad yarḍan iwdan, maca am imsexxaren n Lmasiḥ inni itteggen min yareṭṭan AREBBI. 7 Xedmem asen s marra uř nwem, amecnaw i Lmasiḥ, war iǧi i iwdan. 8 Aqa tessnem mařa din ḥed, ismeɣ niɣ d aḥurri, wenni i ɣa iggen ca d taṣebḥant, Siditneɣ ad ɣares yarr. 9 Kenniw, a aytbab, ggem amenni ak-d imsexxaren nwem. Samḥem asen iɛeddiyyen nsen, maɣar tessnem, aqa Siditwem deg ujenna i yeǧa u Netta war ittegg ca s wudmawen. ^■  

10 S uyenni, a wawmaten inu, meḥḍem di Siditneɣ u di jjehd n tzemmar nnes.

11 Arḍem s marra řesnaḥ n AREBBI, ḥima ad tessbeddem ibriden n tḥraymect n ibřis. ^■  

12 Aqa war nettmenɣi ca ak-d weysum d idammen, maca ak-d řeḥkamat, ak-d řḥukkam d ṣṣulaṭat n ddunect-a tabarcant u ak-d arruḥat iɛeffnen inni iǧan sadu ujenna. ^■  

13 S uyenni arḍem s marra řesnaḥ n AREBBI maḥend ad temmɛařam ak-d umɛeffan, u xmi i ɣa tkemmřem kuřci, beddem xenni. ^■  

14 Xenni beddem, tbeysem s tidett, sduřyem idmaren nwem s tsegda, ^■  

15 ad iřin iḍaren nwem ttwaqqnen s řxaḍar i Řexbar Aṣebḥan n řehna.

16 Ksim taseddart n l’iman deg ufus nwem, maḥend ad tzemmarem ad tessxesyem marra fřitcat itteḥduduqen s tmessi n umɛeffan.

17 Ksim lkask n weṣřaḥ x uzeǧif nwem uca ṭṭfem ssif n Arruḥ i iǧan d Awař n AREBBI. ^■  

18 Ẓẓaǧam di marra tiẓaǧa d ddɛawi nwem řebda di Arruḥ, u ḥḍam akides břa uqeṭṭu di tẓaǧit, am tᵉttẓaǧam u tkessim s řmeɛruf řebda di ṭṭweɛ n marra imqeddasen, ^■  

19 uřa di ṭṭweɛ inu, ḥima ad ayi immewc awař xmi i ɣa arzmeɣ aqemmum inu, maḥend ad barrḥeɣ ssirr n Řexbar Aṣebḥan s teryast, ^■   20 i zi necc d amsekki s snaseř, ḥima ad xas ssiwřeɣ s teryast am mammec icuwwar ad ssiwřeɣ. ^■  

21 Ḥima ad tessnem mammec i ɣa yiři umeddur inu mixef u min tteggeɣ, xzar, Ticikus, ijj n umatneɣ iɛizzen d amsexxar amtiqqi n Siditneɣ ad kenniw ixebbar. ^■   22 Aqa ssekkeɣ t-i-dd i man aya simant nnes, ḥima ad tessnem ameddur inu, uca ḥima ad daywem yegg uř. ^■  

23 Řehna ad yiři ak-d tawmat nneɣ, uřa d tayri ak-d l’iman, zi AREBBI Tababat u zi Siditneɣ Yeccu Lmasiḥ. 24 Ad yiři arḍa ak-d marra inni ittexsen Siditneɣ Yeccu Lmasiḥ břa řɣecc. Amin.