1 Bulus, rrasul, - war iǧi s iwdan uřa s řxaḍar n bnadem maca s Yeccu Lmasiḥ u s AREBBI, Babas, wenni i-t-i-dd-issnekkaren zi taddart n imettinen - , ^□   2 u marra awmaten inni iǧan akidi, i tmesmunin n Galaṭiya: 3 arḍa d řehna ad xawem iřin zi AREBBI, Tababat, u zi Siditneɣ, Yeccu Lmasiḥ, ^■   4 wenni iwcin ixef nnes x ddnub nneɣ ḥima ad aneɣ ifekk zi ddunect-a aɛeffan, am mammec tt ixs AREBBI, Babatneɣ, ^■   5 wenni umi i ɣar iǧa uɛuǧi i řebda qaɛ. Amin.

6 Ttbehteɣ umi temmuṭyem ammu deɣya x Lmasiḥ, wenni d awem dd-iřaɣan s arḍa nnes, ɣar ijj n řexbar aṣebḥan nneɣni ^□   7 nni war din iǧi, maca din ca n yinni kenniw iḥeyyaren uca xsen ad beddřen Řexbar Aṣebḥan n Lmasiḥ. ^■   8 Maca mařa neccin niɣ ijj n lmalak zeg ujenna ad awem ibarreḥ s yijj n Řexbar Aṣebḥan nneɣni x wenni i zi nbarreḥ i kenniw, ad yiři d amenɛuř. ^■   9 Am izzareɣ nniɣ, qqareɣ t ɛawed řexxu ijj n umur nneɣni: mařa ḥed ibeccar i kenniw s ijj řexbar aṣebḥan nneɣni x wenni tqebřem, ad taf ad ittwanɛeř.

10 Ma arezzuɣ řexxu ad ssqennɛeɣ iwdan niɣ AREBBI? Niɣ arezzuɣ ad arḍiɣ iwdan? Mařa arezzuɣ ad arḍiɣ iwdan, war ttiřiɣ ɛad d amsexxar n Lmasiḥ. ^■  

11 Minzi ad awem mřeɣ, a aytma, belli Řexbar Aṣebḥan i d ittwabarrḥen zzayi, war iǧi ɛlaḥsab bnadem, ^■  

12 maɣar necc war t ṭiṭfeɣ niɣ war t řmideɣ zi bnadem, maca s usargeb n Yeccu Lmasiḥ. ^■  

13 Aqa tesřim mammec tuɣa ggureɣ qbeř di ddin n Wudayen, tuɣa darrceɣ x tmesmunt n AREBBI aṭṭas, arezzuɣ ad tt areddǧeɣ. ^■  

14 Tuɣa izzareɣ di ddin n Wudayen x waṭṭas n iqrinen zi řgens inu, minzi tuɣa meḥḍeɣ aṭṭas x tɣuri n řejdud inu.

15 Maca řami tuɣa yarḍa AREBBI, wenni d ayi iḥuzen d wenni xafi d iřaɣan s arḍa nnes umi tuɣa ayi ɛad deg uɛeddis n yemma, ^■  

16 maḥend ad dayi dd-isseḍhar Mmis ḥima ad zzayes barrḥeɣ jar řegnus, xenni war ssargibeɣ man aya deɣya i yenni ɣarsen iǧa ddat d idammen. ^■  

17 Ɛawed war ruḥeɣ ca ɣar Urcalim, ɣar yenni i tuɣa d rrusul qbeř inu, maca ruḥeɣ ɣar Arabiyya uca dewřeɣ-dd xenni ɛawed ɣar Dimacq.

18 Awarni třata n iseggʷusa, ruḥeɣ ɣar Urcalim ḥima ad mmeřqiɣ ak-d Buṭrus, uca zedɣeɣ akides xemmesṭac n wussan.

19 War ẓriɣ ḥed nneɣni zi rrusul mɣir Yaɛqub, umas n Siditneɣ. 20 Min d awem ttariɣ řexxu, aqa da cehhdeɣ zzat i AREBBI: War ssxarriqeɣ ca! ^■   21 Awarni man aya ruḥeɣ ɣar jjwayeh n Suriya d Kilikiya. 22 Timesmunin n Yahudiyya i iǧan di Lmasiḥ, war ssinen aɣembub inu. 23 Nitni tuɣa sřin xafi ammu waha: “Aqa wenni tuɣa xaneɣ idarrcen qbeř, řexxu ittbarreḥ s l’iman i tuɣa yareddeǧ zic!”, 24 uca ssemɣaren di AREBBI zi ssibbet inu.