1 Aqa ta d twařa wiss třata i ɣarwem dd-ttaseɣ. “X uqemmum n tnayen niɣ třata n řechud ad ittwaḍmen marra wawař!” ^■   2 Nniɣ tt qbeř uca ad awem t iniɣ qbeř ɛawed, axmi t nniɣ řami d ayi tuɣa akidwem wiss martayen, uca ɛawed řexxu, umi ɣabeɣ, ttariɣ tt i yenni ixḍan u i marra inneɣni, aqa, mařa usiɣ-dd twařa nneɣnit, war areḥḥmeɣ ca. 3 Minzi kenniw tarezzum lburhan belli aqa Lmasiḥ i d ayi issawařen, wenni war iḍɛifen daywem, maca aqa ijhed daywem. 4 Waxxa netta ittwaṣelleb di tuḍɛeft, aqa iddar s jjehd n AREBBI. Uřa d neccin aqa neḍɛef akides, maca ad kis neddar zi jjehd n AREBBI i daywem iǧan.

5 Qeǧbem ixef nwem, ma aqa kenniw tᵉttbeddam di l’iman, arzum řeɛmur nwem. Niɣ ad aɣ war tessinem ca belli Yeccu Lmasiḥ aqa-t daywem, u mařa war iǧi amenni, aqa kenniw temmenḍarem? ^■   6 Maca ssitimeɣ ad tessnem belli war nemmenḍar. 7 Ttᵉttareɣ AREBBI maḥend war dd-tᵉttban daywem uřa d ict n řḥajjet taɛeffant, ḥima řburhanat ad iřint di ṭṭweɛ nneɣ uca aqa kenniw tᵉtteggem min iǧan d aṣebḥan, waxxa neccin nban axmi nemmenḍar. 8 Minzi neccin war nzemmar walu ḍidd i tidett, maca i tidett wah. 9 Minzi neccin nfarreḥ řami neḍɛef u kenniw tjehdem. Uca nettẓaǧa ɛawed i řekmařet nwem.

10 S uyenni ttariɣ awem-dd man aya am ɣabeɣ, maḥend, xmi dd ɣa yaseɣ, ittxeṣṣa war tteqsiḥeɣ ca ɛlaḥsab ṣṣulṭa i d ayi iwca Sidi inu i řebni, war iǧi i wareddeǧ. ^■  

11 Zi ssa d tsawent, a aytma, iřim tfarrḥem d tkemmřem, iřim tᵉttfewwjem, xarrṣem s yijj n uxarreṣ, uca iřim di řhudnet, xenni ad kiwem yiři AREBBI n tayri d řehna. ^■  

12 Seǧmem ijjen x wenneɣni s řehna s usudem iqeddsen. ^■  

13 Marra imqeddasen ttseǧamen xawem s řehna.

14 Řehna n Siditneɣ Yeccu Lmasiḥ d tayri n AREBBI d tmunt n Arruḥ Iqeddsen ad iřin akidwem marra. Amin.