1 Mařa ittxeṣṣa ad din yiři usemɣar, waxxa man aya war ineffeɛ ca, maɛlik ufiɣ ad iwḍeɣ ɣar iweḥḥan d isargaben n Siditneɣ. 2 Aqa ssneɣ ijj n bnadem di Lmasiḥ, tuɣa arbeɛṭac iseggʷusa zeg wami, ma tuɣa di arrimet niɣ barra i arrimet, war ssineɣ ca, AREBBI issen! Bnadem nni immeksi ɣar ujenna wiss třata. ^■   3 Uca ssneɣ bnadem-a, ma tuɣa di arrimet niɣ břa arrimet, war ssineɣ ca, AREBBI issen. 4 Bnadem nni immeksi ɣar jjennet mani isřa awařen inni war izemmar ad ttwaneṭqen, inni war iḥeǧřen i bnadem ad ten inṭeq. 5 Zeg weryaz-a ad ssemɣareɣ, war ssemɣariɣ ca deg ixef inu, mɣir deg weḍɛaf inu.

6 Maca mařa xseɣ ad ssemɣareɣ, war ttiřiɣ d abuhaři, minzi ad iniɣ tidett. Maca ad t jjeɣ ḥima uřa d ijj war xafi ittxarraṣ mammec ǧiɣ, sennej min zzayi iẓra niɣ sennej min zzayi isřa. 7 U ḥima war ttᵉttwassgiɛɛdeɣ ca zi ssibbet n ṭṭbiɛet yuɛřan n isargaben nni, immewc ayi ijj n usennan deg weysum n arrimet, aqa-t d lmalak n cciṭan i d ayi iccaten s řpuniyyat maḥend war ttesgeɛɛideɣ ca ixef inu. 8 Třata n twařawin ttareɣ Sidi inu maḥend ad xafi t isseggʷej, 9 maca Netta inna ayi: “Aqa arḍa inu icfa, minzi jjehd inu ittwakemmeř di tuḍɛeft.” S uyenni aqa mliḥ mařa ssemɣareɣ di tuḍɛeft inu, ḥima ad xafi yarsa jjehd n Lmasiḥ.

10 S uyenni arḍiɣ s tuḍɛeft, s řefḍiḥet, di řeɣben, deg udarrec, di řeḥbes di ṭṭweɛ n Lmasiḥ, minzi xmi ttiřiɣ ḍeɛfeɣ, řexdenni ttiřiɣ jehhdeɣ.

11 Xzar, dewřeɣ d abuhaři umi ssemɣareɣ ammu, maca kenniw teḥṣarem ayi ɣares. Minzi tuɣa ittxeṣṣa i kenniw ad ayi tqeddarem aqa war ǧiɣ qell uřa deg ict n řḥajjet zi rrusul nni ‘imɣaren aṭṭas’, waxxa necc d walu. ^□  ■  

12 Ggiɣ jar awem řeɛřamat n rrasul, s marra ṣṣbar, s tmegga ijjehden, s lmuɛjizat u s řeɛjayeb. ^■  

13 Maɣar di min di kenniw jjiɣ ɣar ḍeffar x tmesmunin inneɣni, mɣir di min di necc war xawem bessřeɣ? Samḥem ayi x řfarz-a! ^■  

14 Xzar, řexxu d twařa wiss třata aqa ayi wejdeɣ ḥima ad ɣarwem dd-aseɣ uca war xawem ttbessiřeɣ, minzi war arezzuɣ min nwem, maca arezzuɣ xawem kenniw. Minzi war dd-tusi i iḥenjiren ad xemmřen řeknuz i lwalidin nsen, maca lwalidin i iḥenjiren nsen. ^■  

15 Wejdeɣ s řefraḥet ad xeǧṣeɣ řeḥsab marra, u ad sebbřeɣ ixef inu di ṭṭweɛ n řeɛmur nwem, ɛad mařa ṭṭfeɣ zzaywem tayri qell mařa wciɣ awem tayri s waṭṭas. ^■  

16 Maca ad taɣ, waxxa necc war xawem tebsiřeɣ, aqa ṭṭfeɣ kenniw s teḥraymect am ijj n weryaz aqeddac.

17 Niɣ ma ad taɣ meẓreɣ di ca zzaywem s ca n ijj nneɣni i tuɣa ɣarwem dd-ssekkeɣ?

18 Xmi ttareɣ Titus u ssekkeɣ-dd akides tawmat, ma yarzu Titus ca zzaywem di tizi nnes? Ma war nuyur ca s arruḥ d ijjen d iṣuraf d ijjen?

19 Ma ittɣiř awem ɛawed belli neccin nesřeqqa x yixef nneɣ zzaywem? Aqa qibač i AREBBI di Lmasiḥ i nessawař uca man aya marra, a imɛizzen inu, x ssibbet n řebni nwem. 20 Minzi aqa tteggʷedeɣ, xmi dd ɣa yawḍeɣ ɣarwem, ad taɣ war kenniw ttifeɣ ca am mammec xseɣ uřa war d ayi tᵉttifem ca am mammec texsem kenniw, balak ad iřin imcubbcen, řeḥsed, tafqeḥt, taɣennant, taxbarject, axewwej, nnfaxet uřa d ixarwiḍen, 21 xmi dd ɣa yawḍeɣ ɣarwem twařa nneɣni, ad taɣ AREBBI ad ayi isswaḍeɛ uca ggur ad ceḍneɣ x waṭṭas n yinni ixḍan uca war tuben ca zi řexmej d farq-ccɣeř d ufucceḥ i ggin.