1 Ttzawgeɣ akidi teṣbarem cwayt, am ijj n ubuhaři i ssawařeɣ, iwa ḥemřem ayi. 2 Minzi ceṭṭareɣ xawem s ict n cḍaret n AREBBI, minzi xeḍbeɣ kenniw i yijj n weryaz, maḥend ad kenniw wceɣ am ict n teɛzarect tizdig i Lmasiḥ. ^■  

3 Maca ggʷedeɣ, am mammec iɣwa ufiɣar Hawa s teḥraymect nnes, amenni ɛawed i ɣa ttwaɣwan ixarriṣen nwem zi řeṣfayet n wecḍar i Lmasiḥ. ^■   4 Minzi mařa yusa-dd ḥed ittbarreḥ awem s yijj n Yeccu nneɣni x wenni x ttbarrḥeɣ necc, niɣ mařa tqebřem ijj n arruḥ nneɣni wenni war teqbiřem ca, niɣ ijj n Řexbar Aṣebḥan nneɣni wenni war tᵉṭṭifem ca, ad t teksim deɣya. ^■  

5 Waxxa amenni necc ḥessbeɣ ixef inu war ǧiɣ qell i rrusul nni ‘imɣaren aṭṭas’. ^□   6 Waxxa war zemmareɣ i wawař, maca i tussna zemmareɣ, minzi tuɣa aneɣ jar awem s bṭayṭay zi marra iɣezdisen. 7 Niɣ xḍiɣ umi tuɣa sswaḍɛeɣ ixef inu ḥima xenni kenniw ad ttwasuɛřam, am d awem barrḥeɣ s Řexbar Aṣebḥan s břa? ^■  

8 Aqa kecḍeɣ tmesmunin nneɣni am xasent ṭṭfeɣ texřiṣet ḥima ad sexxareɣ i kenniw. ^■   9 Uca umi tuɣa ḥḍareɣ akidwem uca tuɣa dayi řexṣeṣ, war bessřeɣ uřa x ḥed zzaywem, maca min d ayi ixeṣṣen, ɛemmaren t wawmaten inni dd yusin zi Makiduniya. Necc ḥḍiɣ ixef inu di marra maḥend war xawem ttbessřeɣ uca ammu i ɣa qqimeɣ ḥḍiɣ ixef inu. ^■  

10 Tidett n Lmasiḥ aqa-t dayi, aqa asemɣar-a war d ayi imenneɛ di jjwayeḥ n Axaya.

11 Mayemmi? Ma minzi war kenniw ttexseɣ? AREBBI issen.

12 Maca min tteggeɣ, ad qqimeɣ tteggeɣ t xenni, ḥima ad kkseɣ tizi n yinni yarezzun lfurṣa, maḥend nitni, di min di ssemɣaran, ad banen amecnaw neccin.

13 Minzi nitni d rrusul issxarriqen d imsexxaren icemmaten inni itteggen ixef nsen axmi d rrusul n Lmasiḥ.

14 War iǧi d atebhet minzi uřa d cciṭan ittegg ixef nnes axmi d lmalak n tfawt.

15 Waxxa ammu war teǧi d ca n řḥajjet, mařa ttarran ɛawed imsexxaren nnes ixef nsen d imsexxaren n tsegda, inni taneggarut nsen ad tiři ɛlaḥsab řexdayem nsen.

16 Qqareɣ i umur nneɣni, uřa d ijjen ma ad as ittɣiř aqa ayi d abuhaři, mařa war iǧi amenni, ḥesbem ayi d abuhaři maḥend xenni ɛawed necc ad ssemɣareɣ cwayt zeg ixef inu.

17 Min ssawařeɣ, war t qqareɣ zi Siditneɣ, maca ggiɣ t s tubbuheřya maḥend ad ssemɣareɣ deg yixef inu zeɛma ict n twařa.

18 Umi din aṭṭas n inni issemɣaran zeg ixef nsen ɛlaḥsab ddat nsen tamednubt, uřa d necc ggur ad ssemɣareɣ zeg ixef inu. ^■  

19 Minzi kenniw tarḍam ad tesřem i ibuhařiyyen waxxa kenniw d imiɣisen i teǧam. 20 Aqa tehwam i ḥed ittarra kenniw d isemɣan, wenni kenniw itteffzen, ittekkes awem min ɣarwem, u wenni xawem issuɛřan ixef nnes d wenni kenniw issmeddarḍaren. 21 Ssawařeɣ axmi d řefḍiḥet, axmi neḍɛef zi ssibbet n tiɣit war iǧin: marra min xef zeɛɛmen nitni ad ssemɣaren, necc ɛawed zeɛɛmeɣ ad ssemɣareɣ. ^■  

22 Ma nitni d Iɛibraniyyen? Uřa d necc. Ma nitni d Israiliyyen? Uřa d necc. Ma nitni d zzariɛet n Ibrahim? Uřa d necc. ^■   23 Ma nitni d imsexxaren n Lmasiḥ, necc ɛad mahu, waxxa necc ssawařeɣ am wenni ittxeřfen: necc ksiɣ tamara mahu, cciɣ tiyyita ktar zzaysen, tuɣa ayi di řeḥbes aṭṭas n imuren ktar zzaysen uca ẓriɣ řmewt aṭṭas n twařawin. ^■   24 Wtin ayi Wudayen xemsa n twařawin s urekkuḍ s arebɛin n tiyyita qell ict, ^■   25 uca třata n imuren wtin ayi s weɛmud, ict n twařa ḥejjaren ayi, třata n twařatin yarreẓ zzayi uɣarrabu, ǧiřet d uziř d aqettus tuɣa ayi di řbuɣaz n řebḥar břa aɣarrabu, ^■   26 umi d ayi tuɣa deg webrid aṭṭas n twařawin tuɣa ayi di lxaṭar n iɣezran, di lxaṭar n iceffaren, di lxaṭar n yinni n řgens inu, di lxaṭar n yinni zi řegnus nneɣni, di lxaṭar di tendint, di lxaṭar di řexřa, di lxaṭar x řebḥar, di lxaṭar s wawmaten issxarriqen, 27 di řxedmet d tamara, tuɣa ayi di ǧyaři břa iḍeṣ aṭṭas n twařawin, di řaẓ d ufadi, uca aṭṭas n imuren i ẓummeɣ, tuɣa ayi di tesmeḍ d tuɛaryent, 28 uca ɛad war ssiwřeɣ ca x řhemm n kuř ass, uřa x iwdan i dd-ittasen ɣari mkuř ass, uřa x wemnus inu nni xafi i marra timesmunin. ^■   29 Mařa ḥed iḍɛef, ma war ttiřiɣ uřa d necc ḍeɛfeɣ? Mařa ittwasxeyyeq ḥed zi ca n unedref, ma necc war cemmḍeɣ? ^■  

30 Mařa ittxeṣṣa ad ittwassemɣar, ad ssemɣareɣ di tuḍɛeft inu. 31 AREBBI, Tababat n Siditneɣ Yeccu Lmasiḥ, wenni ittwabarken i řebda qaɛ, issen aqa necc war ssxarriqeɣ ca. ^■   32 Akumandar n řɛeskar n ujeǧid Aritas di Dimacq tuɣa iḥeṭṭa tandint n Idimacqiyyen, yarezzu ad ayi iṭṭef, ^■   33 maca ssekken ayi-dd zeg ijj n řkazi, ssehwan ayi-dd zi řḥiḍ deg ijj n uqbub, arewřeɣ zeg ifassen nnes.