1 Bulus, wenni ittwařaɣan, d rrasul n Yeccu Lmasiḥ ɛlaḥsab min ixs AREBBI, d tawmat Sustinis, ^□   2 i tmesmunt n AREBBI i iǧan di Kurintus, inni ittwařaɣan d imqeddasen nni ittwaqeddsen di Yeccu Lmasiḥ, u i marra inni mani mma ttřaɣan x Yisem n Siditneɣ Yeccu Lmasiḥ, wenni d Siditsen d Siditneɣ. ^■   3 Ad xawem yiři arḍa d řehna zi AREBBI, Babatneɣ, u zi Siditneɣ Yeccu Lmasiḥ. ^■  

4 Necc řebda ttqadiɣ AREBBI inu di ṭṭweɛ nwem x arḍa n AREBBI i d awem immewcen di Yeccu Lmasiḥ. 5 Minzi di marra tdewřem zzayes d ttujjar, di marra awař u di marra tussna, ^■   6 maɣar cchadet n Lmasiḥ tᵉttwaḍmen daywem, 7 minzi uřa d ijj n zzɛaf n tewhibt war daywem iqqim, am tᵉttrajam asargab n Siditneɣ Yeccu Lmasiḥ, ^■   8 Minzi Netta ad kenniw iḍmen ɛawed ɣar uneggar ḥima ad tiřim břa řɛib deg wass n Siditneɣ Yeccu Lmasiḥ. ^■   9 AREBBI d amtiqqi, minzi kenniw tᵉttwařaɣam zzayes ɣar tmunt ak-d Mmis Yeccu Lmasiḥ, Siditneɣ. ^■  

10 Maca ttzawgeɣ kenniw, a aytma, s Yisem n Siditneɣ Yeccu Lmasiḥ, ad tessiwřem marra s ijj n wawař, war tᵉttemsebḍim jar awem, maca iřim tmunem nican s nneyyet d icten d uxarreṣ d ijjen. ^■  

11 Minzi ssargben ayi, a aytma inu, inni zi taddart n Kluwi, belli jar awem imenɣan.

12 Xseɣ ad iniɣ, aqa ca zzaywem qqaren: ‘Necc aqa ayi zi Bulus!’ u ca nneɣni: ‘Necc zi Apullus!’ u ca nneɣni ɛawed: ‘Necc zi Kifa!’ u ca zzaywem qqaren: ‘Necc zi Lmasiḥ!’ ^■  

13 Ma aqa Lmasiḥ ittwabḍa d iwetwiten? Ma tuɣa Bulus ittwaṣelleb di ssibbet nwem? Niɣ tuɣa kenniw tᵉttwasɣeḍṣem s yisem n Bulus?

14 Necc ttqadiɣ AREBBI inu war ssɣeḍṣeɣ uřa d ijj mɣir Krispus d Xayus waha, ^■  

15 ařami uřa d ijjen ad yini belli ssɣeḍṣeɣ deg yisem inu.

16 Ɛawed ssɣeḍṣeɣ tawacunt n Stifanus, xenni war ssineɣ ca ma ssɣeḍṣeɣ ḥed nneɣni. ^■  

17 Maɣar Lmasiḥ war d ayi dd-issekk ḥima ad ssɣeḍṣeɣ, maca ḥima ad barrḥeɣ s Řexbar Aṣebḥan, war iǧi s tiɣit n wawařen ḥima war ittᵉttwassbeṭṭeř ṣṣalib n Lmasiḥ. ^■  

18 Minzi awař n ṣṣalib d tubbuheřya di tiṭṭawin n yinni i ɣa iweddaren, maca i neccin, inni iddaren, man aya d jjehd n AREBBI. ^■  

19 Minzi tura:

“Ad areddǧeɣ tiɣit n imiɣisen

uca ad kkseɣ řefhamet n ifehhamen.” ^■  

20 Mani iǧa umiɣis? Mani iǧa umseřmad n idlisen? Mani iǧa bu-umḥarweḍ n ddunect-a? Ma war isscen AREBBI belli tiɣit n ddunect-a d tubbuheřya? ^■   21 Waxxa ddunect teǧa di tiɣit n AREBBI, war tessin ca AREBBI zi ssibbet n tiɣit n yixef nnes, s uyenni tuɣa yarḍa AREBBI ad iwca Tudart i yenni yumnen s tubbuheřya n tbarreḥt. ^■   22 Minzi Udayen ttaren řeɛřamat d Iramiyyen arezzun tiɣit, ^■   23 maca neccin nettbarreḥ Lmasiḥ wenni ittwaṣellben, aqa-t d taɛenkrift i Wudayen, d tubbuheřya i Iramiyyen, ^■   24 maca i yenni ittwařaɣan, am Wudayen am Iramiyyen, aqa Lmasiḥ d jjehd n AREBBI d tiɣit n AREBBI. ^■   25 Minzi tubbuheřya n AREBBI d tmiɣist x iwdan, u tuḍɛeft n AREBBI tejhed x iwdan.

26 Xenni, a aytma, xzarem mammec teǧam ɣar wass n třaɣit nwem, aqa war teǧim d aṭṭas n imiɣisen ɛlaḥsab bnadem, niɣ d aṭṭas n yinni ɣar teǧa ṣṣulṭa niɣ d aṭṭas n tarwa n taṣiřet, ^■   27 maca AREBBI aqa ifarz ibuḥařiyyen n ddunect ḥima ad zzayes isseḥcem imiɣisen, uca tuḍɛeft n ddunect ifarz i-tt AREBBI ḥima ad zzayes isseḥcem ayt n bu-ṣṣulṭa, 28 uca yenni dd-ixeřqen war ɣarsen ca di ddunect u yenni ittwasseḥqaren d yenni war iǧin d ca, aqa ifarz i-ten AREBBI ḥima ad ibḍeř inni iǧan d ca, 29 ḥima uřa d ijj n bnadem s arrimet tamednubt war ittfeyyec ca zzates. 30 Maca zzayes i teǧam kenniw, di Yeccu Lmasiḥ, wenni d aneɣ idewřen d tiɣit n AREBBI d tsegda d tuqeddsi d weṣřaḥ ^■   31 am mammec i yura:

“Ejj wenni issemɣaran, ad issemɣar di SIDI.” ^■