Aseǧem ɣar uneggaru
16
1 Wekkřeɣ awem učmatneɣ Fubi, tenni d tamsexxart n tmesmunt di Kinxriyus, 2 ḥima ad zzayes tareḥḥbem di Siditneɣ, am mammec ittřiq i imqeddasen, uca ad tt tɛawnem di marra min zzaywem tᵉttar nettat, minzi aqa tɛawen aṭṭas, uřa řa d necc. 3 Seǧmem s řehna x Priskilla d Akwila, inni d imsexxaren akidi di Yeccu Lmasiḥ, ■ 4 Nitni sebbřen tudart nsen x ssibbet inu. War ǧiɣ d necc waha wenni ten ittqadan, maca ɛawed marra timesmunin n řegnus.
5 Seǧmem ɛawed s řehna x tmesmunt tenni di taddart nsen.
Seǧmem x Ibanitus, amɛizz inu, s řehna. Netta iǧa zeg imenza n Axaya di Lmasiḥ.
6 Seǧmem x Maryam s řehna. Netta tuɣa tᵉttamar aṭṭas xawem.
7 Seǧmem s řehna x Andrunikus d Yuniyas inni d raǧ inu d imeḥbas akidi, aqa aten d iryazen ittwassnen ɣar rrusul, tuɣa aten di Lmasiḥ qbeř xafi. □
8 Seǧmem s řehna x Ampliyas, amɛizz inu di Siditneɣ.
9 Seǧmem s řehna x Urbanus, wenni d amsexxar akidneɣ di Lmasiḥ,
u Astaxis amɛizz inu.
10 Seǧmem s řehna x Apillis wenni ittwafarzen di Siditneɣ.
Seǧmem s řehna x aytbab n taddart n Aristubulus.
11 Seǧmem s řehna x Hirudiyun wenni d řaǧ inu.
Seǧmem s řehna x aytbab n taddart n Narkissus inni iǧan di Siditneɣ.
12 Seǧmem s řehna x Tarifina d Tarifusa tinni ittamaren di Siditneɣ.
Seǧmem s řehna x Parsis, amɛizz, wenni ittamaren aṭṭas di Siditneɣ.
13 Seǧmem s řehna x Rufus wenni ittwafarzen di Siditneɣ, uřa x yemmas tenni ɛawed am ict n tyemmat i necc.
14 Seǧmem s řehna x Asinkritus, Fligun, Hirmas, Batrubas, Hirmis uca x wawmaten inni akidsen.
15 Seǧmem s řehna x Filuluɣus d Juliya d Niriyus d učmas d Ulimbas d marra imqeddasen inni akidsen.
16 Seǧmem x wayawya s usudem iqeddsen.
Marra timesmunin n Lmasiḥ marra ttseǧament xawem. ■
17 Maca ttzawgeɣ kenniw, a tawmat, maḥend ad teḥḍam zi wi itteggen amesebḍi d tɛinkrifin, barra i tɣuri i teɣrim. Beɛɛdem xasen. ■
18 Minzi amecnaw ina war sexxaren ca i Siditneɣ Yeccu Lmasiḥ, maca i uɛeddis nsen. S řehrud iṣebḥen d wawařen izewwqen xeddɛen uřawen n iḥafiyyen. ■
19 Minzi ṭṭaɛet nwem tᵉttwassen ɣar marra iwdan. S uyenni farḥeɣ zzaywem, maca xseɣ ad tiřim d imiɣisen di tcuni uřa d imezdagen zi řɣar. ■ 20 AREBBI n řehna ad iteḥḥa cciṭan sadu iḍaren nwem deɣya. Arḍa n Siditneɣ Yeccu Lmasiḥ ad kiwem yiři. Amin.
21 Ittseǧam-dd xawem Timutiyu wenni ixeddmen akidi s řehna,
uřa d inni zi řaǧ inu: Lukiyus d Yasun d Susipatrus. ■
22 Necc, Tartiyus, wenni yuran tabrat-a, ttseǧameɣ xawem di Siditneɣ s řehna.
23 Ittseǧam-dd xawem Xayus s řehna. Netta yareḥḥeb zzayi uřa zi tmesmunt marra.
Ittseǧam-dd xawem Irastus s řehna. Netta d amkellef x lbaladiyya d Kwartus, umatneɣ. ■
Awař ɣar uneggar
24 I wenni ɣar teǧa ṣṣulṭa maḥend ad kenniw iḍmen ɛlaḥsab Řexbar Aṣebḥan inu i ittwabarrḥen zi jjihet n Yeccu Lmasiḥ, ɛlaḥsab asargab n ssirr wenni tuɣa innufaren deg ikuden n řweqt n řebda, 25 maca aqa ittwasseḍhar-dd řexxu s Tira Iqeddsen s ufus n inabiyyen u ittwascen i marra řegnus ɛlaḥsab řumur n AREBBI wenni iǧan i řebda ařami d as i ɣa ṭṭaɛen s l’iman, ■ 26 aqa i Netta wenni d Bab n tiɣit weḥḥdes, i Netta umi ɣa yiři uɛuǧi s Yeccu Lmasiḥ i řebda qaɛ. Amin.
27 Arḍa n Siditneɣ Yeccu Lmasiḥ ad kiwem yiři marra. Amin.