1 Adlis amezwaru i uriɣ, a Tiyufilis, uriɣ t x marra min ibda Siditneɣ Yeccu Lmasiḥ ad igg u ad isseřmed 2 ař ass i di immeksi ɣar ujenna, awarni řami iweṣṣa i rrusul i tuɣa ixḍar Netta s Arruḥ Iqeddsen, ^□  ■   3 inni umi, awarni řami tuɣa iweddeb, isscen asen ixef nnes belli aqa iddar, am d asen dd-iḍhar arebɛin n wussan s waṭṭas n řeɛřamat, issawař x Tgeldit n AREBBI. ^■  

4 Řami akidsen icca aɣrum, iweṣṣa ten ḥima war dd-tteffɣen ca zi Urcalim, maca ad qqimen ad rajan lwaɛd n Tbabat ... “i tuɣa kenniw tesřim zzayi, ammu i inna. ^■   5 Minzi Yuḥanna tuɣa isseɣḍaṣ deg waman, maca kenniw ad ttwassɣeḍṣem di Arruḥ Iqeddsen awarni drus n ca n wussan.” ^■  

6 Xenni sseqsan t inni tuɣa din imunen, nnan: “A Siditneɣ, ma di řweqt-a ad dd-tarred Tageldit i Israil ɛawed?” ^■   7 Inna asen: “War d awem dd-yusi ad taregbem x zman d zmanat i iṭṭef Tbabat di ṣṣulṭa nnes i Yixef nnes. ^■   8 Maca kenniw ad teksim jjehd xmi xawem dd ɣa ihwa Arruḥ Iqeddsen uca kenniw ad tiřim d řechud di Urcalim, di marra Yahudiyya, di Samarya u ař ineggura n ddunect.” ^■  

9 Awarni řami inna aya, ẓrin mammec immeksi Netta uca aseynu iksi t, issnuffar i-t x tiṭṭawin nsen. ^■  

10 Am d as sseḍfaren s tiṭṭawin nsen am iruḥ ɣar ujenna, xzar, aqa bedden ɣarsen tnayen n yeryazen arḍen arruḍ d acemřař. ^■  

11 Nnan asen: “A iryazen zi Ljalil, min kenniw ideɛwen tᵉttbeddam txezzarem ɣar ujenna? Aqa Yeccu wanita wenni immeksin xawem ɣar ujenna, ad dd-iɛqeb amecnaw mammec t teẓrim igeɛɛed ɣar ujenna!” ^■  

12 Xenni ɛeqben ɣar Urcalim zeg wedrar umi qqaren ‘Taddart n Zzitun’ i iǧan zzat i Urcalim uca iggʷej xas ɛřaḥař sebɛa ‘istadiyyen’, ixs ad yini ɛřaḥař ijj n kilumitr u třata meyya mitr.

13 Umi dd-udfen ɣar tendint, geɛɛden ɣar tɣurfet sennej mani tuɣa ttɣiman: Buṭrus d Yuḥanna d Yaɛqub d Andrawus d Filippus d Tuma d Matta d Bar-Tulumawus d Yaɛqub mmis n Ḥalfa, d Cimɛun umi qqaren ‘Amɛessab’, d Yahuda mmis n Yaɛqub.

14 Ina marra idsen tuɣa ṣbaren s yijj n dmam x tẓaǧit, ak-d temɣarin u ak-d Maryam yemmas n Yeccu, u ak-d aytmas. ^■  

15 Deg wussan nni ikkar Cimɛun Buṭrus jar asen, di řwest n imeḥḍaren. Tuɣa din munen ɛřaḥar mya u-ɛicrin n iwdan, u netta inna:

16 “A iryazen tawmat, tuɣa ittxeṣṣa ad ittwakemmeř awař n Tira Iqeddsen i ittwannan qbeř s Arruḥ Iqeddsen s uqemmum n Dawud x Yahuda, wenni idewřen d amgewwed n yinni iḥebbsen Yeccu, ^■  

17 minzi netta tuɣa ittwaḥseb zzayneɣ u tuɣa iṭṭef tasɣart di tsexxart-a. ^■  

18 Aqa wa tuɣa ikesseb ijj n iyyar s řmunet n ddenb nnes uca umi iwḍa x uɣembub nnes, aqa feǧqen dayes adan nnes uca ffɣen-dd ɣar barra. ^■  

19 Aqa man aya idweř ittwassen ɣar marra imezdaɣ n Urcalim ařami semman iyyar nni deg iřes n temmurt nsen ‘Ḥaql-Dama’, min ixs ad yini ‘Iyyar n idammen’. ^■   20 Minzi tura deg wedlis n Izehhiden n Dawud:

‘Ad tedweř taddart nnes d řxarbet,

uřa d ijj war dayes izeddeɣ!

uca:

Ad iksi wenneɣni tsexxart nnes n umeḥḍay.’ ^■  

21 S uyenni ittřiq, aqa ijjen zeg yeryazen inni tuɣa d imɛacaren akidneɣ kuř řweqt i di tuɣa Siditneɣ Yeccu ittadef u itteffeɣ jar aneɣ, ^■   22 zeg useɣḍeṣ n Yuḥanna ař ass i di immeksi xaneɣ, ad idweř d acehhad akidneɣ x tnukra nnes.”

23 Areccḥen tnayen: Yusuf, umi qqaren Barsabas wenni umi ttkennan Yustus, d Mattiya. ^■   24 Am tuɣa ttẓaǧan, nnan: “A SIDI, Cek tessned uřawen n marra, scen aneɣ man wen zi tnayen-a i tixḍared, ^■   25 ḥima ad icarc di tsexxart-a u di řxedmet n rrusul i di ismeḥ Yahuda ḥima ad iraḥ ɣar wemcan nnes.” 26 Xenni ggin akeccuḍ uca yusa-dd ukeccuḍ x Mattiya uca arnin t ɣar ḥiṭac n rrusul.