1 Deg umezwaru tuɣa iǧa Wawař, Awař tuɣa-t ɣar AREBBI, Awař tuɣa-t d AREBBI. ^■   2 Wa iǧa ak-d AREBBI deg umezwaru. ^■  

3 Zzayes Netta iǧa kuřci u břa Netta war teǧa uřa d ict n tmesřact zi min iǧan. ^■   4 Dayes i teǧa Tudart u Tudart tuɣa-tt d Tafawt n iwdan. ^■   5 Tafawt tareqq di taǧest, taǧest war tt tᵉṭṭif. ^■  

6 Tuɣa din ijj n bnadem issekk i-t-i-dd AREBBI, qqaren as Yuḥanna. ^■   7 Netta yusa-dd am ccahed ḥima ad iched i Tfawt, ḥima ad zzayes amnen marra. 8 Netta war iǧi ca d Tafawt, maca tuɣa-t ḥima ad iched i Tfawt.

9 Maɣar Wanita tuɣa d Tafawt n tidett i itticen tafawt i kuř bnadem i dd-ittasen ɣar ddunect. ^■  

10 Netta tuɣa-t di ddunect u zzayes tᵉttwagg ddunect u ddunect war t tessin ca. ^■  

11 Yusa-dd ɣar wi iǧan nnes, maca wi iǧan nnes war t qbiřen.

12 Maca marra inni t iqebřen, iwca asen ṣṣulṭa ḥima ad dewřen d tarwa n AREBBI, i yenni ittamnen deg Yisem nnes, ^■  

13 inni war dd-ixřiqen uřa zeg idammen uřa zi min ixs ddat n bnadem uřa zi min ixs weryaz, maca zi AREBBI i zi dd-ittwaxeřqen.

14 Awař idweř d ddat, izdeɣ jar aneɣ, neccin neẓra aɛuǧi nnes, aɛuǧi n uyenni n Mmis zi ɣar Babas i iccuren s arḍa d tidett. ^■  

15 Iched xas Yuḥanna, iřaɣa, inna: “D Wa min xef nniɣ, aqa Netta ad dd-yas awarni ayi, waxxa amenni Netta idweř zzati, minzi Netta tuɣa-t qbeř inu.” ^■  

16 Zi řekmařet nnes niwi-dd marra, arḍa x arḍa. ^■  

17 Ccariɛa temmewc x ufus n Musa, maca arḍa d tidett usin-dd zi Yeccu Lmasiḥ. ^■  

18 Uřa d ijj war iẓri AREBBI. Ayenni n Mmis i iǧan deg weḥsin n Babas d Netta i zzayes issxebbaren. ^■  

19 Ta d cchadet n Yuḥanna řami dd-ssekken Wudayen ca n ikehhanen d Ilawiyyen zi Urcalim ḥima ad t sseqsan: “Min teɛnid cek?” ^■   20 Tuɣa iched, war issnuffar ca, iched: “Necc war ǧiɣ ca d Lmasiḥ.” ^■   21 Sseqsan t: “I min teɛnid cek xenni? Ma d cek d anabi Iliya?” Inna: “Lla, war ǧiɣ d necc!” “Ma d cek d anabi?” Yarra-dd: “Lla!” 22 Xas uca nnan as: “Min teɛnid cek? Ittxeṣṣa aneɣ ad narr i yenni d aneɣ dd-issekken. Min teqqared x yixef nnek?” 23 Inna: “Necc d tmijja i ittřaɣan di řexřa: ‘Seggmem abrid n SIDI nican!’, am mammec inna unabi Icaɛya.” ^■  

24 Inni dd-ittwassekken, tuɣa aten zeg Ifarisiyyen, 25 uca sseqsan t, nnan as: “Mařa war teǧid ca d Lmasiḥ uřa d Iliya uřa d anabi, i xenni mayemmi tseɣḍaṣed?” ^■   26 Yuḥanna yarra-dd, inna asen: “Necc sseɣḍaṣeɣ deg waman, maca aqa din jar awem wenni war tessinem ca. ^■   27 Netta d wenni i dd ɣa yasen awarni ayi, Netta iǧa qbeř inu, necc war sdiheǧeɣ ad as fesyeɣ ifiřan n sandaliyat nnes.”

28 Man aya imsar di Baytɛanya x ujemmaḍ n L'Urdun, mani tuɣa Yuḥanna isseɣḍaṣ.

29 Tiwecca nnes iẓra Yuḥanna Yeccu iggur-dd ɣares, inna: “Xzarem, aqa-t d Izmar n AREBBI i ittekksen ddnub x ddunect! ^■   30 D Wa min xef nniɣ: ‘Ad dd-yas awarni ayi ijj n Weryaz nni iǧan zzati, minzi Netta tuɣa-t qbeř inu.’ 31 Necc war t ssineɣ ca, maca ḥima ad ittwassargeb ɣar Israil, x uyenni usiɣ-dd ḥima ad ssɣeḍṣeɣ deg waman.”

32 Yuḥanna iched, inna: “Ẓriɣ Arruḥ ihwa-dd am ict n tedbirt zeg ujenna, tarsa xas. ^■   33 Necc war t ssineɣ ca, maca Wenni d ayi dd-issekken ḥima ad ssɣeḍṣeɣ deg waman, Netta inna ayi: ‘Wenni teẓrid ihwa-dd xas Arruḥ uca yarsa xas, d Wa d wenni isseɣḍaṣen s Arruḥ Iqeddsen.’ 34 U Necc ẓriɣ, cehdeɣ belli Wanita d Mmis n AREBBI.”

35 Tiwecca nnes tuɣa Yuḥanna ibedd ak-d tnayen n imeḥḍaren nnes. 36 Am tuɣa ixezzar ɣar Yeccu i din igguren, inna: “Xzarem, d Wa d Izmar n AREBBI!” ^■   37 Tnayen n imeḥḍaren sřin as am tt iqqar uca ḍfaren Yeccu. 38 Inneqřeb-dd Yeccu, iẓra i-ten ḍeffaren t-i-dd, isseqsa ten: “Min xef tarezzum?” Nitni nnan as: “A Amseřmad nneɣ, mani tzeddɣed?” 39 Inna asen: “Araḥem-dd, ad tẓarem!” Ruḥen akides, ẓrin mani izdeɣ, qqimen akides ass nni. Tasaɛɛet tuɣa-tt ɛřaḥař d ɛecra.

40 Andrawus, umas n Cimɛun, tuɣa-t d ijjen zeg yenni isřin aya zi Yuḥanna uca ḍeffaren Yeccu. 41 D wa i yufin amezwaru umas Cimɛun, inna as: “Aqa nufa Lmasiḥ!” 42 Issiweḍ i-t-i-dd ɣar Yeccu. Ixzar dayes Yeccu, inna: “Cek d Cimɛun, mmis n Yuna, ad ac řaɣan: ‘Kifa!’ ”, isem wanita ixs ad yini ‘Buṭrus’, aqa-t d ‘aẓru’. ^□  ■  

43 Tiwecca nnes tuɣa ixs Yeccu ad iraḥ ɣar Ljalil. Immeřqa ak-d Filippus, inna as: “Ḍfar ayi-dd!” 44 Filippus tuɣa zi Baytṣayda, tandint n Andrawus d Cimɛun. ^■   45 Filippus yufa Natanayil, inna as: “Nufa wenni xef yura Musa di Ccariɛa uřa d inabiyyen, aqa-t d Yeccu, mmis n Yusuf zi Nnaṣira.” ^■   46 Natanayil inna as: “Ma ad taɣ izemmar ad dd-teffeɣ zi Nnaṣira ca n tcuni?” Filippus inna as: “Araḥ-dd, texzared!” 47 Yeccu iẓra Natanayil iggur-dd ɣares, inna xas: “Xzar, wa d ijj n mmis d tidett n Israil nni war dayes bu řɣecc!” 48 Natanayil inna as: “Manis d ayi tessned?” Yeccu inna as: “Ẓriɣ cek swadday i wartu qbeř ma ad ac dd-iřaɣa Filippus.” 49 Natanayil yarra-dd xas: “A Amseřmad inu, Cek d Mmis n AREBBI, Cek d Ajeǧid n Israil.” 50 Yeccu inna as: “Ma tumned s min d ac nniɣ: ‘Aqa ẓriɣ cek swadday i wartu!’? Ad tẓared min iǧan ktar zi man aya.” 51 Inna as: “S tidett, s tidett, Necc ad awem iniɣ, zi ssa d tsawent ad tẓarem ajenna innurzem u lmalakat n AREBBI ttařyent hekkwant ɣar Mmis n bnadem!” ^■