1 Umi aṭṭas idsen tuɣa nwan ad arin ijj n umezruy x tmesřayin i zi nettwasseqneɛ, 2 - am mammec d aneɣ xebbaren inni iẓrin Awař zeg umezwaru u tuɣa aten d imsexxaren nnes - , 3 iban ayi-dd Netta uřa i necc, minzi ḍfareɣ marra timesřayin mliḥ zeg umezwaru, ḥima ad ac dd-ariɣ s usettef, a Tiyufilis iɛizzen, 4 ḥima ad tessned mliḥ tidett n wawařen nni zi tᵉttwasřemded.

5 Tuɣa din deg wussan n Hirudus, ajeǧid n Yahudiyya, ijj n ukehhan, qqaren as Zakariyya. Netta zi terbiɛt n ikehhanen n taddart n Abiya, uca tamɣart nnes tuɣa-tt zi tarrawt n Harun, qqaren as Iliṣabit. ^■   6 Tuɣa s tnayen idsen d imseggaden ɣar AREBBI, ḍfaren marra tiweṣṣa d řumur iseggden n SIDI břa řɛib. 7 War tuɣi ɣarsen bu uḥenjir minzi Iliṣabit tuɣa war dd-tᵉttiruw ca u tuɣa s tnayen idsen mɣaren deg wussan.

8 Aqa imsar řami tuɣa Zakariyya ittegg řxedmet n ukehhan qibač i AREBBI x nnubet n terbiɛt nnes, ^■   9 aqa yusa-dd dayes ukeccuḍ, ɛlaḥsab lqaɛida n ikehhanen, ḥima ad yadef ɣar Zzawect Tameqqrant n SIDI maḥend ad iqeddem tawhibt n řebxur. ^■  

10 Tuɣa qaɛ abarru n řgens ittẓaǧa barra di tsaɛɛet n tewhibt n řebxur.

11 Řexdenni iḍḥar as-dd Lmalak n SIDI i Zakariyya, ibedd-dd x ufusi n uɛalṭar n řebxur.

12 Umi t iẓra Zakariyya, innexřeɛ uca iggʷed.

13 Inna as Lmalak: “War tteggʷed ca, a Zakariyya, minzi tᵉttwaqbeř taẓaǧit nnek. Aqa Iliṣabit, tameṭṭut nnek, ad ac dd-taruw aḥenjir, ad t tsemmid Yuḥanna. ^■  

14 Ad ac tiři řefraḥet d třiwřiwt uca aṭṭas n iwdan ad farḥen i wexřaq nnes, ^■  

15 minzi ad yiři d ameqqran ɣar SIDI, war isess binu uřa d ccrab. Ad ittwaccur s Arruḥ Iqeddsen deg uɛeddis n yemmas, ^■  

16 uca ad dd-yarr aṭṭas n iḥenjiren n Israil ɣar SIDI, AREBBI nsen. ^■  

17 Netta ad yuyur zzates s arruḥ d jjehd n unabi Iliya, ḥima ad dd-yarr uřawen n lwalidin ɣar tarrawt nsen u inni war yuminen ɣar tussna n Umsegged, ḥima ad issewjed ijj n řgens ikmeř i SIDI.” ^■  

18 Yarra-dd Zakariyya x Lmalak: “Mammec i ɣa ggeɣ ad fehmeɣ aya, minzi necc d awessar uřa d tamɣart inu temɣar aṭṭas!” ^■  

19 Yarra-dd Lmalak, inna as: “Necc d Jibril wenni ibedden zzat i AREBBI, ttwasekkeɣ-dd ḥima ad kik ssiwřeɣ, ad cek xebbareɣ řexbar-a wanita aṣebḥan. 20 Zi řexxu ad tegnud u war tzemmared ad tessiwřed ař ass min di i ɣa imsar uya, minzi war tumined ca s wawařen inu inni i ɣa ittwakemmřen di řweqt nsen.” 21 Tuɣa řgens di barra ittraja Zakariyya uca iwdan ttbehten umi iɛeṭṭař daxeř di Zzawect Tameqqrant. 22 Umi dd-iffeɣ Zakariyya, tuɣa war izemmar ad kisen issiweř. Xenni fehmen belli iban as-dd ca n tmeẓriwt di Zzawect Tameqqrant. Tuɣa ittceyyar asen, maca iqqim ignu. 23 Umi kemmřen wussan n řxedmet n tukehhant nnes, iɛqeb-dd ɣar taddart nnes.

24 Awarni ussan nni teksi tamɣart nnes Iliṣabit s ddeyset. Teffar ixef nnes xemsa n iyuren uca tebda teqqar: 25 “Ammu i zzayi igga SIDI deg wussan nni umi ɣari dd-ixzar, ḥima ad xafi ikkes aseḥqar n iwdan.” ^■  

26 Deg uyur wiss setta issekk-dd AREBBI Lmalak Jibril ɣar ict n tendint di Ljalil, qqaren as Nnaṣira, 27 ɣar ict n teɛzarect d tanexḍabt ɣar weryaz zi taddart n ujeǧid Dawud, qqaren as Yusuf. Tuɣa isem n teɛzarect nni Maryam. ^■   28 Yudef-dd ɣares Lmalak, inna as: “Sřam xam, a tamimunt! Siditneɣ akidem! Cem aqa tᵉttwabarked jar temɣarin!” 29 Umi t teẓra, tennexřeɛ zeg wawař nnes uca txarreṣ min ixs ad yini sřam-a. 30 Inna as Lmalak: “War tteggʷed ca, a Maryam, minzi tufid arḍa ɣar AREBBI. 31 Ad teksid ddeyset uca ad tarwed Aḥenjir, ad t tsemmid ‘Yeccu’. ^■   32 Wanita ad yiři d ameqqran, ad xas ttřaɣan Mmis n Umɛuǧi x kuřci, u ad as iwc SIDI AREBBI řɛarc n jeddis Dawud. ^■   33 Netta ad iḥkem x taddart n Yaɛqub i řebda, war ittiři uneggar i Tgeldit nnes.” ^■   34 Tenna Maryam i Lmalak: “Mammec i ɣa yiři uya am war mřiceɣ ca ak-d weryaz?” 35 Yarra-dd Lmalak, inna as: “Arruḥ Iqeddsen ad am iřeḥḥef uca jjehd n Umɛuǧi x kuřci ad xam yarsa. S uyenni ad yiři wenni i dd ɣa ixeřqen zzayem d amqeddas u ad t semman Mmis n AREBBI. 36 Xzar, Iliṣabit, řaǧ nnem, nettat ɛawed aqa-tt s ddeyset di tewsar nnes. Aqa d ayur n setta i nettat umi qqaren ‘War dd-tᵉttiruw!’ 37 Minzi war din min yewɛaren i AREBBI.” ^■   38 Tenna Maryam: “Xzar, necc d tayya n SIDI, ad ayi imsar ɛlaḥsab awař nnek.” Xas uca yuyur xas Lmalak.

39 Deg wussan nni tekkar Maryam, truḥ deɣya ɣar idurar, ɣar ict n tendint n Yahudiyya. 40 Tudef ɣar taddart n Zakariyya, tseǧem x Iliṣabit. 41 Umi tesřa Iliṣabit i sřam n Maryam, imsar aqa inhezz useymi deg uɛeddis nnes. Uca tedweř Iliṣabit teccur s Arruḥ Iqeddsen, 42 tesɣuyy s jjehd, tenna i Maryam: “Cem aqa tᵉttwabarked jar temɣarin, tᵉttwabarek řɣiǧet n uɛeddis nnem! 43 Zi manis ɣari aya, ḥima ad ɣari dd-tas yemmas n Sidi inu? 44 Řami dd-tiweḍ tmijja n sřam nnem ɣar umezzuɣ inu, inhezz useymi deg uɛeddis inu s řefraḥet. 45 Sseɛd n tenni yumnen aqa ad ittwakemmeř min d as ittwanna zi SIDI.” ^■  

46 Tenna Maryam:

“Řeɛmar inu issemɣara di SIDI,

47 ifarḥ buḥbeř inu s AREBBI, Řɛunṣar inu n Tudart,

48 s minzi ixzar ɣar umeddur awaḍeɛ n tayya nnes.

Xzar, zi řexxu marra arrawen ad ayi semman ‘D tamimunt!’

aqa Isem nnes iqeddes.

50 Arreḥmet nnes x tarwa d jjiřat,

x yenni t ittweqqaren. ^■  

51 S uɣiř nnes aqa yiwi-dd řeɣřeb.

Ifartek inni iɛeffaren deg ixarriṣen n wuřawen nsen. ^■  

52 Inni ɣar teǧa ṣṣulṭa iɣḍeř i-ten zi řekrasi nsen,

imwaḍɛen issgeɛɛed i-ten. ^■  

53 Issjiwen s řxar inni iǧuẓen,

isqad aytbab n wagřa s ifassen xwan. ^■  

54 Amsexxar nnes Israil, iɛawen i-t,

aqa iɛqeř x arreḥmet nnes, ^■  

55 am mammec issiweř ak-d řejdud nneɣ,

ak-d Ibrahim d zzariɛet nnes,

i řebda.” ^■  

56 Tekka Maryam ɛřaḥař třata n iyuren ɣar Iliṣabit, xenni teɛqeb ɣar taddart nnes.

57 Řami dd-tiweḍ řweqt n Iliṣabit ḥima ad dd-taruw, tejj-dd aḥenjir. 58 Sřin jjiran d řaǧ nnes belli AREBBI isscen as arreḥmet nnes aṭṭas, farḥen nitni akides. ^■  

59 Deg wass wiss tmenya usin-dd ḥima ad xetnen i useymi uca semman t s yisem n babas Zakariyya, ^■   60 maca tarra-dd yemmas, tenna: “Lla, ad ittwasemma Yuḥanna.” ^■   61 Nnan as: “War iǧi ḥed zi řaǧ nnem, ttřaɣan as-dd s yisem-a.” 62 Xenni ciyyaren ɣar babas mammec ixs ad t isemma. 63 Ittar tařwiḥt uca yura xas, inna: “Isem nnes Yuḥanna.” Uca tbehten iwdan marra. 64 Řexdenni yarzem aqemmum nnes d yiřes nnes uca issiweř ɛawed, ibarek AREBBI.

65 Tehwa-dd tiggʷudi x marra jjiran nsen, ssiwřen aṭṭas x marra man aya di kuř idurar n Yahudiyya. 66 Marra inni isřin i man aya, xemmřen t deg wuřawen nsen, nnan: “Aqa min ɣa yiři uḥenjir-a?” Tuɣa afus n SIDI akides.

67 Ittwaccur Babas Zakariyya s Arruḥ Iqeddsen, inebba, inna:

68 “Ad ittwabarek SIDI, AREBBI n Israil,

minzi ifekkar di řgens nnes

uca yiwi asen-dd aṣřaḥ.

69 Issbedd aneɣ-dd ijj n yicc n weṣřaḥ,

di taddart n Dawud, amsexxar nnes, ^■  

70 am mammec tuɣa d aneɣ inna

s uqemmum n inabiyyen iqeddsen nnes,

inni din tuɣa zeg wecḥař uya, ^■  

71 maḥend ad aneɣ ifekk zi řɛedyan nneɣ,

u zeg ifassen n yinni i d aneɣ icarrhen,

72 maḥend ad igg arreḥmet nnes i řejdud nneɣ

u ad iɛqeř x řɛuhud nnes iqeddsen,

73 x tajaǧit tenni ijjuǧ i Ibrahim, jedditneɣ,

ḥima ad d aneɣ iwc ^■  

74 maḥend ad nfekk zeg ifassen n řɛedyan nneɣ,

u ad as nsexxar břa tiggʷudi, ^■  

75 s tqeddast d tsegda,

marra ussan n tudart nneɣ. ^■  

76 I cek, a aḥenjir, ad ac ttřaɣan anabi n Umɛuǧi x kuřci,

minzi ad traḥed zzat i uɣembub n SIDI,

ḥima ad tessewjded ibriden nnes, ^■  

77 ḥima ad iwc i řgens nnes tussna n Tudart,

i iǧan s weɣfar n ddnub nsen, ^■  

78 s řaǧaɣ n arreḥmet n AREBBI nneɣ,

i zi xaneɣ i ɣa iḥinn řefjar zi řuɛřa,

79 ḥima ad issirɣ tfawt i yenni iqqimen

di taǧest d tiři n řmewt,

ḥima ad igewwed iḍaren nneɣ deg webrid n řehna.” ^■  

80 Am iggam uḥenjir, yarenni dayes Arruḥ u tuɣa-t di řexřa ař ass i di dd-iḍhar i Israil. ^■