Lmuɛjiza tamezwarut n Yeccu
2
1 Deg wass wiss třata temsar din ict n tmeɣra di Qana, ict n tendint di Ljalil. Tuɣa din yemmas n Yeccu. 2 Uřa d Yeccu d imeḥḍaren nnes ttwaɛarḍen-dd ɣar tmeɣra. 3 Řami iqḍa binu, tenna as yemmas i Yeccu: “War ɣarsen bu binu!” 4 Yeccu inna as: “Min jar ayi akidem, a tamɣart? Tasaɛɛet inu war dd-tiwiḍ ɛad!” 5 Yemmas tenna i imsexxaren: “Min d awem i ɣa yini, ggem t.” 6 Tuɣa din setta n iqeddwaḥ n weẓru daysen aman, mmarsen dinni am mammec nnumen tteggen Wudayen řuḍu, kuř ijjen zzaysen ɣares řqedd n tnayen ař třata n ‘imitriten’. □ 7 Yeccu inna asen: “Ccurem iqeddwaḥ s waman!” Uca ccuren ten s waman ař aqemmum. 8 Xas uca inna asen: “Řexxu aymem-dd zzaysen, wcem t i bab n wurar.” Uca ssiwḍen t. 9 Umi bab n wurar iqeǧeb aman i idewřen d binu, - maca netta war issin manis dd-ikka, maca imsexxaren nni d as dd-yuymen aman, ssnen - , iřaɣa-dd bab n tmeɣra x wesři.
10 Inna as: “Kuř bnadem ittqeddam binu aṣebḥan d amezwaru. Mařa inewjiwen swin aṭṭas, ad asen iwc binu war iḥřin, maca cek txemmřed binu iṣebḥen ař i řexxu.”
11 D ta d řeɛřamet tamezwarut i igga Yeccu, di Qana di Ljalil. Isseḍhar-dd aɛuǧi nnes uca umnen zzayes imeḥḍaren nnes.
12 Awarni man aya ihwa-dd ɣar Kafarnaḥum, Netta d yemmas, d aytmas, d imeḥḍaren nnes, uca qqimen din ca n wussan.
Yeccu di Zzawect Tameqqrant
13 Řami dd-tiweḍ Tɣarṣt n Useɛdu, Řɛid n Wudayen, igeɛɛed Yeccu ɣar Urcalim.
14 Yufa di Zzawect Tameqqrant inni din izznuzan iyenduzen d wuǧi d idbiren, uřa d iṣarrafen n tenɛacin inni din iqqimen. ■
15 Igga ijj n urekkuḍ zeg iseɣwan i Yixef nnes, uca yuẓẓeř xasen marra zi Zzawect Tameqqrant, uřa d uǧi d ifunasen d iṣarrafen, uca izeǧeɛ iṣuldiyyen nsen di temmurt, inneqřeb ṭṭwabeř nsen.
16 Inna i yenni izznuzan idbiren: “Kksem man aya ssa. War ttarrim ca Taddart n Baba d taddart n ssuq!”
17 Xenni ɛeqřen imeḥḍaren nnes belli tura: “Cḍaret i Taddart nnek icca ayi.” ■
18 Maca Udayen arrin-dd, nnan as: “Man řeɛřamet i d aneɣ ɣa temřed, belli aqa ɣarek řḥeqq ḥima ad tegged man aya?” ■
19 Yeccu yarra-dd, inna asen: “Hedmem Zzawect Tameqqrant tanita uca di třata n wussan ad tt ssbeddeɣ.” ■ 20 Nnan as Wudayen: “Zzawect Tameqqrant tebna di setta u-arebɛin n iseggʷusa, ma Cek texsed ad tt-i-dd-tessbedded di třata n wussan?” 21 Maca Netta tuɣa issawař x Zzawect Tameqqrant n arrimet nnes.
22 Awarni řami dd-ikkar Yeccu zi taddart n imettinen, ɛeqřen imeḥḍaren nnes min d asen inna uca umnen di Tira Iqeddsen u deg wawař i inna Yeccu. ■
23 Umi Yeccu tuɣa di Urcalim, di Řɛid n Tɣarṣt n Useɛdu, umnen waṭṭas dayes řami ẓrin řeɛřamat i igga. 24 Maca Yeccu war isscen ca ixef nnes ɣarsen, minzi Netta issen marra iwdan, 25 war iḥdij ca ad as iched ḥed x bnadem, minzi issen min iǧan di bnadem. ■