1 Tuɣa din ijj n bnadem zeg Ifarisiyyen qqaren as Nikudimus, netta d ijj n umeqqran n Wudayen. 2 Yusa-dd ɣar Yeccu s ǧiřet, inna as: “A Amseřmad inu, neccin nessen belli Cek d Amseɣɣar i dd-yusin zi ɣar AREBBI, minzi war izemmar uřa d ijj ad igg řeɛřamat-a i teggid Cek, mɣir mařa akides AREBBI.” ^■   3 Yeccu yarra-dd xas, inna: “S tidett, s tidett, Necc ad ac iniɣ, uřa d ijj war izemmar ad iẓar Tageldit n AREBBI mɣir mařa ittwaxřeq-dd zi jdid.” 4 Nikudimus inna as: “Mammec izemmar ijj n uwessar ad dd-ittwaxřeq? War izemmar ad yadef ɛawed deg uɛeddis n yemmas maḥend ad dd-ittwaxřeq i twařa wiss tnayen!?” 5 Yeccu yarra-dd xas: “S tidett, s tidett, Necc ad ac iniɣ: Mařa ca n yijjen war dd-ixřiq ca zeg waman u zeg Arruḥ, war izemmar ad yadef ɣar Tgeldit n AREBBI. ^■   6 Min dd-ittwaxeřqen zi ddat, netta d ddat, u min dd-ittwaxeřqen zi Arruḥ, netta d Arruḥ. ^■   7 War tbehtem ca mařa nniɣ ac, ittxeṣṣa kenniw ad dd-tᵉttwaxeřqem zi jdid. 8 Asemmiḍ ittṣuḍ manis ixs, tᵉttesřid i uṣuḍi nnes, war tessined ca manis dd-ittas uřa mani ittraḥ. Ammu i iǧa ɛawed marra wenni dd-ittwaxeřqen zi Arruḥ.”

9 Nikudimus yarra-dd, inna as: “Mammec i ɣa yegg ad yiři man aya?”

10 Yeccu yarra-dd, inna as: “Ma Cek d amseɣɣar n Israil u war tessined ca man aya?

11 S tidett, s tidett, Necc ad ac iniɣ: Neccin nessawař x min nessen, neched x min neẓra, waxxa amenni kenniw war teqbiřem ca cchadet Nneɣ. ^■  

12 Mařa ssiwřeɣ awem x tmesřayin n temmurt, kenniw war timnem, mammec i ɣa teggem ad tamnem mařa ssiwřeɣ awem x tmesřayin n ujenna?

13 Uřa d ijj war yuři ɣar ujenna mɣir wenni dd-ihwan zeg ujenna, aqa-t d Mmis n bnadem, d Wenni iǧan deg ujenna. ^■  

14 Amecnaw mammec issgeɛɛed Musa afiɣar di řefyafi, ammu ittxeṣṣa ad ittwassgeɛɛed Mmis n bnadem ɛawed, ^■  

15 ḥima marra wenni zzayes i ɣa yamnen war itthellik ca, maca ad ɣares tiři Tudart ittduman. ^■  

16 Ammu i yexs AREBBI ddunect ař mani iwca ayenni n Mmis ḥima kuř ijjen wenni zzayes i ɣa yamnen, war ihellik ca, maca ad ɣares tiři Tudart ittduman. ^■  

17 Minzi AREBBI war dd-issekk ca Mmis ɣar ddunect ḥima ad iḥaseb ddunect, maca issekk i-t-i-dd ḥima ad zzayes tenjem ddunect. ^■  

18 Wenni zzayes i ɣa yamnen war ittwaḥaseb ca. Wenni war ittimnen ca aqa ittwaḥasab zi řexxu minzi netta war yumin ca deg Yisem n uyenni n Mmis n AREBBI. ^■  

19 D wa d řeḥkam, aqa Tafawt tusa-dd ɣar ddunect, maca iwdan xsen taǧest x Tfawt, minzi timegga nsen tuɣa atent d tiɛeffanin. ^■   20 Marra wenni itteggen tuɛeffna, icarreh Tafawt, war dd-ittis ca ɣar Tfawt, ḥima war ttwawebbxent ca timegga nnes. 21 Maca wenni itteggen tidett ad dd-yas ɣar Tfawt, ḥima ad banent timegga nnes, aqa ttwaggent di AREBBI.” ^■  

22 Awarni man aya yusa-dd Yeccu d imeḥḍaren nnes ɣar temmurt n Yahudiyya, isseɛdu din ca řweqt akidsen uca tuɣa isseɣḍaṣ. ^■   23 Uřa d Yuḥanna tuɣa isseɣḍaṣ di Ɛaynun i dd-yusin ṭṭarf i Salim, minzi dinni aman aṭṭas. Usin-dd waṭṭas dinni uca ttwasɣeḍṣen. ^■   24 Minzi Yuḥanna tuɣa ɛad war immenḍar ca di řeḥbes. ^■  

25 Imsar ijj n umḥarweḍ jar ijjen zeg imeḥḍaren n Yuḥanna d ijj n Wuday x mammec i ɣa yiři řuḍu. 26 Nitni usin-dd ɣar Yuḥanna, nnan as: “A Amseřmad nneɣ, xzar, wenni akidek iǧan x ujemmaḍ n L'Urdun, wenni min xef tcehded, aqa uřa d Netta isseɣḍaṣ u marra ttasen-dd ɣares.” ^■   27 Yarra-dd Yuḥanna, inna asen: “Bnadem war izemmar ad iqbeř uřa d ict n tmesřact mařa war d as temmewc zeg ujenna. 28 Kenniw simant nwem tcehhdem belli necc nniɣ: ‘Necc war ǧiɣ ca d Lmasiḥ!’, maca aqa necc ttwasekkeɣ-dd zzates. ^■   29 Wenni ɣar teǧa tesřit, netta d asři. Ameddukeř n wesři wenni ittbeddan zzates, ittesřa ɣares, ifarreḥ s řefraḥet tameqqrant s tmijja n wesři. S uyenni, xzar, aqa tᵉttwakemmeř řefraḥet inu tanita. 30 Ittxeṣṣa ad igma Netta u necc ad neqṣeɣ.

31 Maɣar wenni dd-yusin zi sennej, Netta sennej i marra. Wenni iǧan zi temmurt, zi temmurt issawař. Wenni dd-yusin zeg ujenna, Netta sennej i marra, ^■   32 u Netta icehhed zi min iẓra d zi min isřa, maca cchadet nnes war tt iqebbiř uřa d ijjen. ^■   33 Wenni iqebbřen cchadet nnes d wenni issarsen řxeṭ n ufus nnes belli aqa AREBBI d tidett. ^■   34 Minzi wenni dd-issekk AREBBI, issawař s wawařen n AREBBI, minzi AREBBI war ittic ca Arruḥ s řmizan. ^■   35 Tababat ttexs Tamemmit uca igga as deg ufus nnes kuřci. ^■   36 Wenni ittamnen di Tmemmit, ɣares Tudart ittduman, maca wenni war iṭṭiɛ ca Tamemmit, war iẓarr Tudart, maɣar aɣḍab n AREBBI ad xas iqqim.” ^■